Yaan taatatsiloʼob ku meyajoʼobeʼ ku chʼaʼtuklik u bisik u paalaloʼob tiʼ junpʼéel guardería wa tiʼ uláakʼ lugaroʼob tuʼux ku kanáantaʼal mejen paalaloʼob. Chéen baʼaleʼ, ¿maʼalob wa ka a bis a hijo teʼ lugaroʼobaʼ?

•  Le baʼax unaj a tuklikoʼ

•  Le baʼax unaj a beetkoʼ

 ¿Jeʼel wa u beetik u maas suuktal in chan hijo yéetel yaanal máakoʼobeʼ? Maʼ xaaniʼ. Teʼ edad jeʼeloʼ jach séeb u kaanbal le mejen paalaloʼoboʼ yéetel séeb u suuktaloʼob tiʼ uláakʼ máakoʼob. Le beetkeʼ wa chichan a paalaleʼ ilawil a máansik maas yaʼab tiempo tu yéeteloʼob (Deuteronomio 6:6, 7).

•    Wa táan a tuklik a bisik a chan hijo guarderíaeʼ tukult baʼax jeʼel a beetik utiaʼal maʼ u xuʼulul u suuktal ta wéeteleʼ.

 ¿Yaan wa u pʼáatal maʼ ten u beet in cuenta in chan hijo? Junpʼéel libro ku tʼaan tiʼ le mejen paalaloʼoboʼ, ku yaʼalik: «Mientras maas yaʼab tiempo ku máansik le mejen paalal yéetel u yéet xookoʼoboʼ maas yaan u páakʼaltiʼob le baʼax ku yilkoʼob u beetaʼaloʼ» (libro Hold On to Your Kids [Aférrese a sus hijos]).

•    Wa táan a tuklik a bisik a chan hijo guarderíaeʼ maʼalob ka a tukult lelaʼ: «¿Yaan wa u seguer u beetik in cuentail yéetel u yuʼubik baʼaxoʼob kin kaʼansiktiʼ?».

 ¿Jeʼel wa u maas áantik in hijo kéen káajak u bin escuelaeʼ? Yaan máaxoʼobeʼ ku yaʼalikoʼobeʼ jeʼel u maas áantkeʼ pero uláakʼoʼobeʼ ku yaʼalikoʼobeʼ chéen tiʼ jujunpʼéel baʼaloʼob jeʼel u yáantikeʼ wa jach tiʼ mix baʼal. Penelope Leach, juntúul psicóloga ku atendertik mejen paalaleʼ, ku yaʼalik: «Maʼ a tuklikeʼex wa le escuelaoʼ letiʼe baʼax ken u beet u bin utsil tiʼ a hijoʼexoʼ, mix xan a tuklikeʼex wa mientras maas chichan a hijoʼex ka biskeʼex escuelaeʼ maas maʼalob kun bintiʼ, wa mientras maas u kaʼantal u xookeʼ maas yaan u kiʼimaktal u yóol. Wa ka tuklikeʼex leloʼ jeʼel u xuʼulul a tsʼáaikeʼex importancia tiʼ le kaʼansaj táan a tsʼáaikeʼextiʼ desde ka síijoʼ».

•   Wa táan a tuklik a bisik a hijo guarderíaeʼ tukult tubeel wa jach kʼaʼabéet bey xan wa jeʼel u yáantik a hijoeʼ.

 ¿Jeʼel wa u páajtal u pʼáatal juntúul tiʼ toʼon utiaʼal u kanáantik k-chan hijoeʼ? Yaan horaeʼ ichil le familiaoʼ le íichamtsil yéetel le atantsiloʼ ku meyajoʼob tumen yaʼab u xuupoʼob yéetel yaʼab baʼaloʼob taak u manikoʼob. Chéen baʼaleʼ, ¿jach wa kʼaʼabéet u beetkoʼob lelaʼ?

•   Wa táan a tuklik a bisik a chan hijo guarderíae’ tukult tubeel wa jach kʼaʼabéet. Maʼalob xan ka a tsikbalt yéetel a núup wa jeʼel u páajtal u menostal a xuupeʼex utiaʼal u páajtal u pʼáatal juntúul tiʼ teʼex u kanáant a chan hijoʼexiʼ.

 Táanil tiʼ a chʼaʼtuklik a bisik a chan hijo guarderíaeʼ ilawil u ventajasil yéetel u desventajasil. Wa kéen tsʼoʼokok láayliʼ a kʼáat a bis guarderíaeʼ, yaan uláakʼ baʼaloʼob unaj a chʼaʼik en cuenta.

 Le Bibliaoʼ ku yaʼalik: «Le máax yaan u naʼatoʼ ku jach ilik tuʼux ku tsʼáaik u yook» (Proverbios 14:15). Jeʼex u yaʼalik le Bibliaoʼ antes a chʼaʼtuklik máax kun kanáantik a chan hijoeʼ maʼalob ka a tukult tubeel.

 Ilawil uláakʼ lugaroʼob tuʼux jeʼel u kanáantaʼaleʼ

•   Yaan taatatsiloʼobeʼ ku biskoʼob kanáantbil u mejen paalaloʼob tiʼ najoʼob tuʼux ku kanáantaʼaloʼob. Teʼ najoʼobaʼ maʼ yaʼab mejen paalaloʼob ku bisaʼaloʼobiʼ yéetel yaan horaeʼ chéen juntúul wa maas tiʼ juntúul máaxoʼob kanáantkoʼob.

•   Yaan xan taatatsiloʼobeʼ ku kanáantaʼal u paalaloʼob tumen juntúul u láakʼtsiloʼob wa ku contratarkoʼob juntúul niñera wa juntúul máax meyaj tu yotochoʼob.

 Cada junpʼéel tiʼ le baʼaxoʼob tsʼoʼok aʼalikoʼ yaan u ventajail yéetel u desventajail. ¿Baʼaxten maʼ ta kʼáatik tiʼ uláakʼ taatatsiloʼob bix u bintiʼob ikil u kanáantaʼal u paalaloʼob teʼ tuʼuxoʼob ku yaʼalik le xookaʼ? Le Bibliaoʼ ku yaʼalik: «Le naʼatoʼ utiaʼal le máaxoʼob ku kaxtikoʼob nuʼuktajoʼ» (Proverbios 13:10).

 ¿Baʼax unaj a beetik wa tsʼoʼok a chʼaʼtuklik a bisik a hijo guardería?

 Averiguart bix le lugaroʼ

•   ¿Yaan wa tiʼ le lugar tuláakal le permisos ku kʼáatik le autoridadoʼ? ¿Bix kʼaj óolaʼanil?

•   ¿Limpio yéetel seguro wa le lugaroʼ?

•   ¿Baʼax ku sen tsʼaʼabal u beet le mejen paalaloʼob teʼ lugaroʼobaʼ? a

 Averiguart máaxoʼob kanáantik le mejen paalaloʼoboʼ

•   ¿Capacitartaʼanoʼob wa? ¿Kaʼansaʼan wa tiʼob bix ken u tsʼáaʼob xook? ¿U yojloʼob wa u tsʼáaʼob primeros auxilios wa baʼax jeʼel u beetkoʼob wa ku kuʼupul u yiikʼ juntúul chan paaleʼ (RCP)?

•   Investigart bix kʼaj óolaʼanil le máaxoʼob ku meyajoʼob teʼeloʼ, por ejemploeʼ, ¿maʼ wa yáax bisaʼanoʼob cárceliʼ?

•   ¿Cada wa tu kʼeʼexel le máaxoʼob ku meyajoʼoboʼ? Wa beyoʼ a chan hijoeʼ mantatsʼ kun kʼaʼabéettal u suuktal yéetel jejeláas máakoʼob.

•   ¿Yaʼab wa mejen paalal ku kanáantik cada juntúul tiʼ le máaxoʼob ku meyajoʼoboʼ? Wa beyoʼ maʼ xaaneʼ maʼ kun atenderbil maʼalob a chan hijo. Chéen baʼaleʼ maʼ unaj u tuʼubul xan techeʼ cada chan paaleʼ jelaʼan le atención unaj u tsʼaʼabaltiʼoʼ.

•   ¿Wa ku kʼaʼabéettal a waʼalik wa baʼax tiʼ le máaxoʼob kanáantik a chan hijooʼ jeʼel wa u yóotik u yu’ubecho’obe’? ¿Jeʼel wa u ya’aliko’obtech jeʼel baʼaxak ka úuchuk tiʼ a chan hijoeʼ?