LE SUKUʼUNOʼOB kajaʼanoʼob Rusiaoʼ xáanchaj maʼ tu chaʼabal u meyajtikoʼob Jéeoba. Chéen baʼaleʼ tu añoil 1991, jach kiʼimakchaj u yóoloʼob úuchik u kʼaʼamloʼob bey junpʼéel religión tumen u gobiernoil Rusiaeʼ. Teʼ año jeʼeloʼ, mix 16 mil sukuʼunoʼob yaan kaʼachiʼ. ¡Mix máak tukult wa yaan u yantal óoliʼ 170 mil sukuʼunoʼob teʼ kʼiinoʼobaʼ! Tiʼ le bukaʼaj sukuʼunoʼobaʼ táakaʼan xan le ku taaloʼob áantaj táanxel luʼumiloʼ (Mat. 9:37, 38). Koʼox tʼaan tiʼ jujuntúuliʼ.

Matthew, kajaʼan Gran Bretañaeʼ, 28 años yaantiʼ ka kʼaʼam u religión le sukuʼunoʼob tumen u gobiernoil Rusiaoʼ. Tu añoil 1991, le sukuʼunaʼ bin tiʼ junpʼéel asamblea tuʼux aʼalaʼab tiʼ junpʼéel discurso jach kʼaʼabéet áantaj teʼ múuchʼuliloʼob yanoʼob Europa del Esteoʼ. Junpʼéel tiʼ letiʼobeʼ, letiʼe yaan San Petersburgooʼ. Teʼ lugaraʼ jach yaʼab máakoʼob ku tsʼaʼabal xook tiʼob, baʼaleʼ chéen juntúul siervo ministerial ku yáantajiʼ. Mattheweʼ ku yaʼalik: «Maʼ xuʼul in tuukul tiʼ le bukaʼaj áantaj kʼaʼabéetoʼ. Tin waʼalaj tiʼ Jéeoba jach in kʼáat bin áantaj Rusia». Letiʼeʼ tu juntartaj junpʼíit taakʼin yéetel yaʼab baʼax tu konaj utiaʼal ka xiʼik áantaj Rusia. Tu añoil 1992, tu chʼaʼaj u maletaeʼ, ka bin áantajiʼ. ¿Bix binik tiʼ le sukuʼunaʼ?

Mattheweʼ ku yaʼalik: «Maʼ in wojel kaʼach le idioma ku tʼankoʼoboʼ. Yéetel maʼ tu páajtal kaʼach in tsikbaltik tiʼ le máakoʼob baʼax ku yaʼalik le Bibliaoʼ». Uláakʼ baʼax talamchaj tiʼeʼ letiʼe u kaxtik tuʼux u kajtaloʼ, letiʼeʼ ku yaʼalik: «Hasta maʼ kʼajaʼanten jaytéen anchaj in kaxtik tuʼux kin pʼáatal sáamsamaliʼ». Kex maʼ jach maʼalob biniktiʼ tu káajbaleʼ, Mattheweʼ ku seguer u yaʼalik: «Le baʼax maas maʼalob tsʼoʼok in beetkoʼ, letiʼe in bin Rusiaoʼ». ¿Baʼaxten? «Tumen tsʼoʼok in maas kanik confiar tiʼ Jéeoba yéetel yaʼab u téenel tsʼoʼok in wilik bix u yáantken.» Ka máan kʼiineʼ, kʼuch u beetuba anciano yéetel precursor especial. Bejlaʼeʼ táan u meyaj tu najil Betel, naatsʼ tiʼ u kaajil San Petersburgo.

Hiroo, juntúul sukuʼun yaan 25 años tiʼeʼ, tu graduartuba tiʼ le Escuela tiʼ Entrenamiento Ministerial beetaʼab tu kaajil Japón tu añoil 1999. Letiʼeʼ animartaʼab tumen juntúul tiʼ le instructoroʼob utiaʼal ka xiʼik áantaj táanxel  luʼumiloʼ. Hirooeʼ u yojel kaʼach jach kʼaʼabéet áantaj Rusia, le oʼolal joʼopʼ u kanik ruso. Chéen baʼaleʼ yaan uláakʼ baʼax tu beetaj, letiʼeʼ ku yaʼalik: «Binen kajtal seis meses Rusia. Tumen in wojel jach ku beetik keʼeleʼ, binen tu mesil noviembre utiaʼal in wilik wa jeʼel u béeytal in aguantartikeʼ». Kaʼ tsʼoʼok u máan le keʼeloʼ, suunaj Japón, tu yilaj maʼ u sen xuup utiaʼal u juntartik taakʼin yéetel ka máan kʼiineʼ bin kajtal Rusia.

Tsʼoʼok u máan 12 años xiʼik Hiroo kajtal Rusia yéetel tsʼoʼok u béeytal u yáantaj tiʼ jejeláas múuchʼuliloʼob, yaan tiʼ le múuchʼuliloʼob tuʼux áantajnajoʼ yaan cien u túulal j-kʼaʼaytajoʼobiʼ yéetel chéen letiʼ u ancianoiliʼ. Tsʼoʼoleʼ tiʼ junpʼéel tiʼ le múuchʼuliloʼob tuʼux áantajnajoʼ yaan horaeʼ letiʼ láaj nuʼuktik U Muchʼtáambalil Kʼaʼaytaj, le Escuela utiaʼal k-Kaʼansik u Tʼaan Diosoʼ, U Xookil U Pʼíich Tulumil Kanan yéetel cinco u pʼéelal U Xookil Libro teʼ Múuchʼuliloʼ. Tsʼoʼoleʼ tu juunal ku bin kaʼach u líiʼs u yóol le sukuʼunoʼoboʼ. Hirooeʼ ku yaʼalik: «Le in wáantik le sukuʼunoʼob u muʼukʼaʼankúunt u fejoʼoboʼ, jach tu kiʼimakkúuntaj in wóol». ¿Baʼax utsil tsʼoʼok u kʼamik yoʼolal lelaʼ? Letiʼeʼ ku seguer u yaʼalik: «Teneʼ ancianoen yéetel precursoren táanil tiʼ in taal kaʼach way Rusiaeʼ, pero bejlaʼeʼ maas maʼalob in biskinba yéetel Jéeoba. Tsʼoʼok in kanik maas confiar tiʼ letiʼ». Tu añoil 2005, Hirooeʼ tsʼoʼok u beel yéetel Svetlana, bejlaʼeʼ tu kaʼatúulal táan u beetik u precursoriloʼob.

Matthew, de 34 años yéetel Michael, u yíitsʼin de 28 añoseʼ, tiʼ kajaʼanoʼob Canadaeʼ. Le ka binoʼob xíimbal Rusiaeʼ, binoʼob xan tiʼ junpʼéel muchʼtáambal yéetel tu yiloʼob jach yaʼab máak ku biniʼ, chéen baʼaleʼ chéen junpʼíit sukuʼunoʼob áantik le máakoʼob u xokoʼob le Bibliaoʼ. Mattheweʼ ku yaʼalik: «Teʼ múuchʼulil tuʼux binoʼonoʼ ku muchʼkuba 200 máakoʼobiʼ, chéen baʼaleʼ tuláakal le muchʼtáambaloʼoboʼ ku nuʼuktaʼal tumen juntúul sukuʼun tsʼoʼok u yantal u jaʼabil yéetel juntúul siervo ministerial táankelem». Le baʼax tu yilaj le sukuʼunaʼ le péeks utiaʼal ka xiʼik áantajiʼ, le oʼolal tu añoil 2002, bin Rusia.

Ka máan cuatro añoseʼ, Michaeleʼ bin xan áantaj teʼ tuʼux bin u sukuʼunoʼ yéetel tu tsʼáaj cuenta láayliʼ jach kʼaʼabéet áantajeʼ. Tumen siervo ministerialeʼ tsʼaʼab u yil le cuentasoʼ, le publicacionoʼoboʼ bey xan le territorioʼoboʼ. Tsʼoʼoleʼ tsʼaʼab xan u máans discursoʼob yéetel ka u beet meyajoʼob jeʼex le ku beetik u secretarioil le múuchʼuliloʼ. Áantajnaj xan utiaʼal u beetaʼal asambleaʼob yéetel u líiʼsaʼal u Najiloʼob Reino. Tak bejlaʼa kʼaʼabéet áantaj teʼ tuʼux binoʼ. Teʼ kʼiinoʼobaʼ Michaeleʼ anciano yéetel jach yaʼab meyaj táan u beetik, letiʼeʼ ku yaʼalik: «Jach ku taasik kiʼimak óolal k-áantik k-sukuʼunoʼob. Minaʼan uláakʼ baʼal maas maʼalob jeʼel u béeytal k-beetik ichil k-kuxtaleʼ».

Mattheweʼ tsʼoʼok u beel yéetel Marina. Michaeleʼ tsʼoʼok u beel yéetel Olga. Letiʼobeʼ láayliʼ táan u yáantkoʼob le múuchʼuliloʼob jeʼex u beetik yaʼab sukuʼunoʼob bejlaʼoʼ.

Tu añoil 1994, le yaan 16 años tiʼ Tetyanaoʼ, kʼuch seis precursor especialoʼob tu múuchʼulil yaan tu kaajil Ucrania. Le precursoroʼobaʼ tiʼ u taaloʼob kaʼach tu luʼumil Eslovaquia, Polonia yéetel República Checa. Tetyanaeʼ jach ku kʼaʼajsik le sukuʼunoʼobaʼ, letiʼeʼ ku yaʼalik: «Jach j-meeyjiloʼob yéetel jach jatsʼuts u modosoʼob, ku béeytal u náatsʼal tsikbal máak tu yéeteloʼob yéetel jach u kʼaj óoloʼob le Bibliaoʼ». Le úuchik u yilik bix u yáantaʼal le precursoroʼob tumen Jéeobaoʼ, le péeks u yaʼal: «Teneʼ in kʼáat in meyajt Jéeoba jeʼex u beetkoʼoboʼ».

Le ken yanak vacaciones tiʼ Tetyanaeʼ, ku bin yéetel uláakʼ sukuʼunoʼob tuʼux mix juntéen úuchuk kʼaʼaytaj, jeʼex teʼ náanach kaajoʼob yanoʼob Ucrania yéetel Bielorrusiaoʼ. Tumen jach jatsʼuts u yilik u bin áantaj tiʼ lugaroʼob beyaʼ, káaj u tuklik u bin Rusia. Táanil tiʼ u bin kajtaleʼ, bin junpʼéel tiempoiʼ yéetel pʼáat tu yiknal juntúul kiik bijaʼan xan áantajiʼ. Tetyanaeʼ tu kaxtaj meyaj utiaʼal u béeytal u yantal baʼax kʼaʼabéettiʼ. Tu añoil 2000, bin utiaʼal ka pʼáatak Rusia. ¿Bix biniktiʼ?

 Tetyanaeʼ ku yaʼalik: «Tumen maʼ tu béeytal in boʼotik u rentail junpʼéel najeʼ anchaj in rentartik chéen junpʼéel chan cuarto. Maʼ chéen chʼaʼabil u kuxtal máak tiʼ junpʼéel lugar maʼ u yotochiʼ. Kex yaan kʼiin taakchaj in suut tin kaajaleʼ, Jéeobaeʼ mantatsʼ tu yáanten in wil baʼax oʼolal unaj in pʼáatal teʼ tuʼux binen áantajoʼ». Bejlaʼeʼ Tetyanaeʼ táan u beetik u misionerail Rusia. Letiʼeʼ ku yaʼalik: «Le bukaʼaj años táan in meyajtik Jéeoba táanxel luʼumiloʼ, tsʼoʼok u kaʼansikten yaʼab baʼaloʼob jatsʼutstak maʼ ken in tuʼubse, yéetel tsʼoʼok u yantalten yaʼab amigoʼob. Tsʼoʼoleʼ u maas maʼalobileʼ, tsʼoʼok u maas nojochtal in fe».

Masako, juntúul kiik kajaʼan Japoneʼ, 50 años yaantiʼ. Letiʼeʼ jach úuch taakchajak u beetik u misionerail, chéen baʼaleʼ ku tuklik kaʼach mix bikʼin kun béeytal u beetik tumen kʼojaʼan. Le ka tu yuʼububa chan maʼalobeʼ, tu chʼaʼtuklaj u bin áantaj Rusia. Kex maʼ chéen chʼaʼabil úuchik u kaxtik tuʼux kun kajtal yéetel u yantal junpʼéel meyaj fijo tiʼeʼ, Masakoeʼ joʼopʼ u kaʼansik japonés yéetel káaj xan u meyaj tiʼ limpieza. ¿Baʼax áant utiaʼal ka pʼáatak Rusia?

Letiʼeʼ tsʼoʼok catorce años yanak Rusia, le oʼolal ku yaʼalik: «Le baʼaxoʼob jatsʼutstak tsʼoʼok in kʼamik ikil in táakpajal teʼ kʼaʼaytajoʼ, le áantken utiaʼal maʼ u lúubul in wóol ken talamchajak in kuxtal. Jach jatsʼuts u bin kʼaʼaytaj máak tuʼux kʼaʼabéet u yáantaʼal le sukuʼunoʼoboʼ». Letiʼeʼ ku seguer u yaʼalik: «Ichil le bukaʼaj tiempo tsʼoʼok in meyajtik Jéeobaoʼ, letiʼeʼ tsʼoʼok u tsʼáaikten tuláakal baʼax kʼaʼabéet, jeʼex janal, nookʼ, tuʼux in kajtal yéetel uláakʼ baʼaloʼob. Tuláakal lelaʼ bey junpʼéel milagroeʼ». Le kiikaʼ tsʼoʼok u yáantaj teʼ múuchʼuliloʼob yanoʼob Rusiaoʼ yéetel tsʼoʼok xan u bin áantaj Kirguistán. Tsʼoʼoleʼ tsʼoʼok u béeytal xan u yáantik le grupoʼob yanoʼob ich inglés, chino yéetel uigur. Teʼ kʼiinoʼobaʼ táan u beetik u precursorail San Petersburgo.

Yaʼab familiaʼobeʼ tsʼoʼok u binoʼob meyaj táanxel luʼumil utiaʼal u yantaltiʼob junpʼéel maʼalob kuxtal. Chéen baʼaleʼ yaan uláakʼ familiaʼobeʼ tsʼoʼok u binoʼob táanxel luʼumil utiaʼal u maas meyajtikoʼob Jéeoba, jeʼex úuchik u beetik Abrahán yéetel Sara úuchjeakileʼ (Gén. 12:1-9).  Lelaʼ bey tsʼoʼok u beetik Mijailo yéetel Inga, u yatan. Letiʼobeʼ lukʼoʼob Ucrania yéetel binoʼob kajtal Rusia tu añoil 2003. Teʼeloʼ maʼ xáanchaj ka tu kaxtoʼob máakoʼob jach taak u kaanbaloʼob tiʼ le Bibliaoʼ.

Mijailoeʼ ku yaʼalik: «Juntéenjeakileʼ binoʼon kʼaʼaytaj tiʼ junpʼéel lugar mix juntéen úuchuk kʼaʼaytajiʼ. Teʼeloʼ, juntúul nojoch máakeʼ, tu jeʼekʼabtaj le joonajoʼ, ka tu kʼáatajtoʼon: ‹¿Táan wa a máaneʼex kʼaʼaytaj?›. Toʼoneʼ t-aʼalajtiʼ jach letiʼe táan k-beetkoʼ, letiʼ túuneʼ tu yaʼalajtoʼon: ‹Teneʼ in wojel yaan u kʼuchul u kʼiinil a taaleʼex. Le baʼax tu yaʼalaj Jesusoʼ deporsi yaan u kʼuchul u kʼiinil u béeytal›. Ka tsʼoʼokeʼ tu yaʼalajtoʼon baʼax ku yaʼalik Mateo 24:14. Teʼ lugar jeʼeloʼ t-ilaj xan diez u túulal koʼoleloʼob tiaʼanoʼob ichil u religión le bautistaʼoboʼ, letiʼobeʼ jach taak u kʼaj óoltikoʼob u jaajil. Tiʼ letiʼobeʼ ku meyaj kaʼach le libro Vivir para siempre utiaʼal u xokikoʼob le Biblia tuʼ kʼiinil sábado yéetel domingooʼ. Tsʼoʼoleʼ tumen yaʼab baʼax taak u kankoʼobeʼ ku beetkoʼob preguntaʼob, le oʼolal k-xáantal tu yiknaloʼob. Ken xiʼikoʼon tu yotochoʼobeʼ k-kʼayik u kʼaayiloʼob le Reinooʼ yéetel k-múul janal tu yéeteloʼob. Lelaʼ chéen junpʼéel tiʼ le baʼaxoʼob maases kin kʼaʼajsikoʼ». Inga yéetel Mijailoeʼ, jach kiʼimak u yóoloʼob úuchik u binoʼob áantaj Rusia, le baʼax tu beetoʼobaʼ tsʼoʼok u yáantaj utiaʼal ka maas náatsʼkoʼob tiʼ Jéeoba, u maas yaabiltoʼob le máakoʼob tuʼux ku kʼaʼaytajoʼoboʼ yéetel utiaʼal maʼ u yaatal u yóoloʼob úuchik u binoʼob Rusia. Teʼ kʼiinoʼobaʼ, Mijailoeʼ táan u beetik u superintendenteil tiʼ circuito yéetel u yatan.

Yury yéetel Oksana, u yataneʼ, kajaʼanoʼob Ucrania. Letiʼobeʼ binoʼob xíimbal tu Betelil Rusia tu añoil 2007, yéetel tu bisoʼob Aleksy, u hijoʼob. Bejlaʼeʼ 13 años yaan tiʼ Aleksy. Le tiaʼanoʼob Beteloʼ, tu yiloʼob junpʼéel mapa tuʼux ku yeʼesaʼal le lugaroʼob tuʼux maʼatech u yúuchul kʼaʼaytajoʼ. Oksanaeʼ ku yaʼalik: «Le ka t-ilaj le mapaoʼ t-tsʼáaj cuenta yaʼab tuʼuxoʼob kʼaʼabéet áantaj. Le oʼolal t-chʼaʼtuklaj k-bin k-áantaj Rusia». ¿Yaan wa uláakʼ baʼax áantoʼob? Yuryeʼ ku yaʼalik: «Kʼajaʼanteneʼ t-xokaj le xook ku kʼaabaʼtik ‹¿Jeʼel wa u páajtal a bin áantaj táanxel tuʼuxeʼ?› yéetel uláakʼ publicacionoʼob ku tʼaanoʼob tiʼ leloʼ. * Táanil tiʼ k-bineʼ, yáax binoʼon k-il le lugar aʼalaʼabtoʼon tumen u najil Beteloʼ yéetel joʼopʼ k-kaxtik meyaj bey xan junpʼéel naj tuʼux k-pʼáatal». Tu añoil 2008 túuneʼ binoʼob áantaj Rusia.

Tu káajbaleʼ maʼ chéen chʼaʼabil tu kaxtiloʼob meyajiʼ, tsʼoʼoleʼ yaʼab u téenel anchaj u binoʼob kajtal yaanal tuʼux. Yuryeʼ ku yaʼalik: «Orarnajoʼon yaʼab u téenel tiʼ Jéeoba utiaʼal maʼ u lúubul k-óol yéetel ka seguernak k-kʼaʼaytaj. Tsʼoʼoleʼ confiarnajoʼon tiʼ letiʼ yéetel mix juntéen tu pʼatoʼon. Béeychaj k-ilik bix u kanáantkoʼon Jéeoba ikil k-tsʼáaik táanil u Reino. Lelaʼ jach tu yáantoʼon k-bisba maas maʼalob» (Mat. 6:22, 33). ¿Yaan wa baʼax tu kanaj Aleksy úuchik u binoʼob áantaj Rusia? U maamaeʼ ku yaʼalik: «Le baʼax t-beetoʼ jach yaʼab úuchik u yáantik in hijo. Ka tu tsʼáaj nueve años tiʼeʼ tu chʼaʼtuklaj u yokjaʼ yéetel bejlaʼeʼ ku beetik u precursor auxiliaril cada ken yanak vacaciones tiʼ tumen ku yilik jach kʼaʼabéet áantaj wayeʼ. Jach ku kiʼimaktal k-óol ken k-il bix u tsʼáaik u yóol teʼ kʼaʼaytajoʼ». Teʼ kʼiinoʼobaʼ, Yury yéetel Oksanaeʼ yaantiʼob kex óoliʼ 35 años yéetel táan u beetik u precursor especialiloʼob.

Le baʼaxoʼob ku yaʼalik le sukuʼunoʼob teʼ xookaʼ, ku yeʼesikeʼ utiaʼal u bin áantaj máak tuʼux kʼaʼabéeteʼ jach unaj u confiar tiʼ Jéeoba. Kex maʼ chéen chʼaʼabil u bin tiʼ le sukuʼunoʼob tu káajbaloʼ tsʼoʼok u yilkoʼob bukaʼaj kiʼimak óolal ku taasik u yáantaʼal le máakoʼob uts u puksiʼikʼal u kʼaj óoltoʼob Diosoʼ. ¿Jeʼel wa u páajtal a bin áantaj tuʼux maas kʼaʼabéeteʼ? Wa ka beetkeʼ, yaan a wuʼuyikaba jeʼex tu yuʼubiluba Yury le ka bin áantaj tuʼux maas kʼaʼabéetoʼ, letiʼeʼ tu yaʼalaj: «Chéen junpʼéel baʼax beetik u yaatal in wóol, letiʼe úuchik maʼ in séeb beetkoʼ».