UTIAʼAL LE TSʼOKAʼAN U BEELOʼOBOʼ
2. Múul meyajneneʼex
¿BAʼAX TÁAKAʼANIʼ?
Le máaxoʼob tsʼokaʼan u beeloʼoboʼ beyoʼob jeʼex juntúul piloto yéetel le máax áantik utiaʼal u nuʼukt junpʼéel aviónoʼ. Letiʼobeʼ maʼ tu tuukuloʼob chéen tu yoʼolaloʼobiʼ, kex ka yanak problemaseʼ ku paklan áantkubaʼob.
LE BIBLIAOʼ KU YAʼALIK: «Bey túunoʼ maʼ kaʼatúuloʼobiʼ, baʼaxeʼ junpʼéeliliʼ wíinkliloʼob» (Mateo 19:6).
«Utiaʼal u bin maʼalobil tiʼ le máaxoʼob tsʼokaʼan u beeloʼoboʼ kʼaʼabéet u múul meyajoʼob» (Christopher).
¿BAʼAXTEN KʼAʼABÉET?
Wa maʼ tu kanik múul meyaj le máaxoʼob tsʼokaʼan u beeloʼoboʼ le kéen yanak problemas tiʼobeʼ yaan u paklan culparkubaʼob, tu lugar u yutskíintikoʼob le problemaoʼ yaan u maas nojochkíintkoʼob.
«Jach kʼaʼabéet u kanik múul meyaj le máaxoʼob tsʼokaʼan u beeloʼoboʼ. Wa maʼ tin kanik múul meyaj yéetel in wíichameʼ bey chéen ka múul kajlakoʼoneʼ, cada quien ken u chʼaʼtukult baʼax ken u beete» (Alexandra).
¿BAʼAX JEʼEL A BEETKEʼ?
TUUKULNEN TIʼ LELAʼ
-
¿Ka tuklik wa chéen a tiaʼal le taakʼin ka náajaltikoʼ?
-
¿Maas wa kiʼimak a wóol a wuʼuyikaba wa minaʼan a núup ta wiknal?
-
¿Ka wilik wa a biskaba maʼalob yéetel u láakʼtsiloʼob a núup?
MÚUL TSIKBALTEʼEX LELAʼ
-
¿Tiʼ baʼaxoʼob jach maʼalob k-tsʼáaikba de acuerdo?
-
¿Tiʼ baʼaxoʼob unaj k-maas múul meyaj?
-
¿Baʼaxoʼob jeʼel u páajtal k-beetik utiaʼal k-maas maʼalobkíintik bix k-múul meyajeʼ?
BEETEʼEX LELAʼ
-
Kʼaʼajakteʼexeʼ le kéen tsʼoʼokok u beel máakeʼ bey jeʼex ka okok tiʼ junpʼéel equipoeʼ. Tu lugar a báaxal tu contra a equipoeʼ unaj a paklan áantkabaʼex.
-
Maʼ a kaxtik chéen a wutsil, tu lugar leloʼ ilawil baʼax jeʼel u páajtal a beetik utiaʼal u bin utsil tiʼ tu kaʼatúulaleʼexeʼ.
«Maʼ unaj u joʼopʼol u yilkoʼob tiʼ máax yaan u culpailiʼ. Maʼ unaj u baʼateloʼobiʼ, baʼaxeʼ unaj u múul meyajoʼob» (Ethan).
LE BIBLIAOʼ KU YAʼALIK: «Maʼ a kaxtikeʼex chéen a wutsileʼex, baʼaxeʼ kaxteʼex u yutsil u maasil» (Filipenses 2:3, 4).
