Yaʼab máakeʼ sáamsamal ku kíimskubaʼob meyaj utiaʼal u yantaltiʼob le baʼax kʼaʼabéettiʼoboʼ. Tsʼoʼoleʼ le baʼaxoʼob ku yúuchul teʼ kʼiinoʼobaʼ ku beetik u maas peortal le kuxtaloʼ. ¿Baʼaxten k-aʼalik leloʼ?

• Tumen kéen yanak problemaseʼ tuláakal baʼal ku koʼojtal, tak le janaloʼ.

• Ku pʼáatal minaʼan meyaj, tsʼoʼoleʼ wa yaneʼ jach junpʼíit u boʼolil.

• Kéen úuchuk junpʼéel nojoch loobileʼ ku yilaʼal óotsilil tumen ku perdertik u yotoch máak yéetel tuláakal le baʼax yaantiʼoʼ.

• Wa ku suuktal a kanáantik a taakʼineʼ kex ka peorchajak le kuxtalaʼ yaan u páajtal a manik baʼaxoʼob kʼaʼabéettech.

• U yantal taakʼin tiʼ máak wa uláakʼ baʼaloʼobeʼ maʼ tu asegurartik le kuxtaloʼ, tumen tiʼ jeʼel baʼalak kʼiineʼ jeʼel u perdertik u valoreʼ.

• Le taakʼinoʼ maʼ tu páajtal u manik le kiʼimak óolaloʼ mix le yaabilaj yaan ichil junpʼéel familiaoʼ.

Le Bibliaoʼ ku yaʼalik: «Wa yaan baʼal k-jaante, yaan k-nookʼ bey xan tuʼux k-antaleʼ yaan u kiʼimaktal k-óol yéetel le baʼaloʼobaʼ» (1 Timoteo 6:8).

U kiʼimaktal u yóol máak yéetel baʼax yaantiʼeʼ u kʼáat u yaʼal conforme yéetel le baʼaxoʼob yaantiʼoʼ, maʼ tu tsʼíiboltik u maasil. Le consejoaʼ kʼaʼabéet u chʼaʼik en cuenta máak maases kéen pʼáatak minaʼan taakʼin tiʼ.

Utiaʼal maʼ a estresareʼ ilawil maʼ a xuʼuxupik a taakʼin tiʼ baʼaloʼob maʼ kʼaʼabéetiʼ. Wa ka manik baʼaloʼob chéen minaʼan u cuentaileʼ yaan a pʼaxkaba.