1 Pedru 4:1-19
4 Kristu upurarana ipira upe, ape pexari yepewasu pemanduari irumu, nyãse awa upurara ipira upe uxariana ipuxuwerasawa.
2 Tiarama kuri pemunya kuaye pepira uputariwaa yawe peiku ramere kua mundu upe, maa pemunya kuaye Deus uputariwaa yawe.
3 Usikana penye arama kua pemunyawaa kuera kuaye aintauputariwaa yawe kuaita tiwaita judeu, nyãse kuxima peyuxari, pemunya kuaye pepira uputariwaa yawe, pekau, pemunya puxuwera turusu, pekau turusu, peiku kuera idulu rese kua tenyuntuwara.
4 Asui aintausikie aintaumaa penye tiresewara peajudari ainta kuiri sese kua tenyuntuwara, ape aintaukasuari penye.
5 Maa aintaumbeu kuri aintaresewara ixupe kua umbeusara aintaresewara kuaita upakawaita, umanuwaita yuiri.
6 Nyãse sesewara kuera umbeu kua nyenga purangawaa ainta supe yuiri kuaita umanuwaita, upaka arama kuri aintairumu kua espiritu kuaye upakawaa yawe Deus umbeu rameana aintarese kuaye apigawaita yawe aintapira upewaitare.
Yawajudari arama uruyariwaita
7 Kuayentuana senunde upawa arama panye maa, ape pemaa pesui puranga, pekuawa ara pepurandu arama Deus irumu puranga.
8 Ape turusu perikute peyugustari, nyãse kua gustarisawa uyumimi siya puxuwerawa.
9 Peyusuanti puranga yepewasu, tepesaisu aintauri.
10 Peyuajudari puranga kuaye Deus uxariwaa yawe penye arama peyaweyawe, kuaye upurakiwaita ukuawawaita yawe sese kua Deus purangasawa turusuwaa.
11 Yepe umbue rame urikute umbue kuaye umbuesara Deus nyenga, yepe upuraki rame urikute upuraki kuaye upurakisara yawe kirimbawasawa irumu Deus uxariwaa ixupe, pemee arama kuri purangawaa Deus supe aintairumu panye kuaita pemunyawaita irumu kua Jesus Kristu. Yamee ixupe purangawaa kua umundusara yuiri yawewarawate. Amem.
Yapurara Kristu resewara
12 Hagustariwaita, tepesikie pemaa kua tata sendiwaa uriwaa pepiri usaã arama penye, tepemanduari pepurara amu kiti aintasui kuaita amuita.
13 Maa peyumusuuri pepurara rame Kristu irumu, suuri arama yuiri kuri penye turusu uyukuawa irumu kuri kua ipurangasawa.
14 Suuri kuri penye aintaumpurarakari rame penye Kristu rera resewara, nyãse uiku perese kua Deus Espiritu purangawaa.
15 Tepexari yepe pesuiwara upurara maye uyukásara mira yawe, u mundawasu yawe, u umunya puxi yawe, u umuserana amu yawe.
16 Maa yepe upurara rame uruyari resewara ae, tikuri utiĩ ae, maa urikute umee purangawaa Deus supe sera resewara.
17 Nyãse usikana sangawa uyupiru arama umbeu aintaresewara kuaita Deus ruka puraita, asui uyupiru rame yanerese, maitaa kuri aintausasawa kuaita tiwaita uruyari kua Deus nyenga purangawaa?
18 Ape iwasu rame umukaturu kua apigawa purangawaa, maa kititaa aintausu kuaita tiwaita umanduari Deus, puxuwerawaita ainta?
19 Ape aintaurikute aintaumunya puranga panye kuaita upurarawaita kuaye Deus uputariwaa yawe, aintaurikute yuiri aintauxari aintapia sese kua umunyawaa panye maantu, kua supiwa ae.
