AZI’NÉ 03
Tè o sang-a anè anou zi Biible a leu?
Biible a wè méla’né tè é zaa, nzeung nguiè ménteukné tè é pou nzaané. A ghô mmô’, o nông ntsaa lézhè métsoo mi Biible a zi’né, kèè ngô mmô’ o nông ntchô’ô lè. Tè o ghô pou sang anè méla’né mbô anè ménteukné mi é fhô a nteu ta’ nzwing akèté pa’a mèt-é? Tè ajoumi Biible a leu, a ghô kwa’ nkuitè yimpè anè aya’a? Tè mpè ghô ping sang anè méla’né mi? Épouô té ngô mémillion é veung nguè hmm. Mpè jiô kèè wou ngnwèt, o ghô veung-è jou poup lè.
1. Tè Biible a shoung ménou mi mè taa-taa kèè ménou mi é lé kwa’ ntôkô assi?
Biible a si ngô akèté zi “a shoung ménou mi é si ngô anouneu.” (Ecclésiaste 12:10) A shoung ménou mi é lé kwa’ ntôkô assi, anè épouô pi é lé kwa’ nang-a ngông. (Tông-ô Luc 1:3; 3:1, 2.) Méghang pêté té nzaané pô émô’ méghang azhènou pi é tsa’a anou anè métsoo ngou’, pô veung-è léghè mélé’é mi Biible a kim, ngheu épouô, ngheu méji’ mbô émô’ métsoo mi é lé tôkô assi, é si ngô anouneu.
2. Tè mbô pa’ Biible a ta’ nzwing akèté la, mela’akô mpè ghô leu nguè a ghô zeung nkuitè yimpè anè aya’a?
Biible a shoung métsoo tè zaané émi épouô é lé nông té nzhè. Mpè pè éfœu’: A lé shoung émô’ métsoo mi é tchiitè scianci, épouô té nzaané é ping nông té mveung-è nguè a anouneu. Scianci a ping ngô anè aya’a, nông-ô mveung-è léghè Biible a shoung-ô anouneu. Mè ghô “pou sang anè Biible anè aya’a, é ping fou zôkô sang-a éwou.”—Psaume 111:8.
3. Mpè ghô pou sang anè ajoumi Biible a leu anè pa’ ézôô é shi’ ghô poup, mela’akô?
Biible a wè méla’né a mi é shoung-ô “anou anè métsoo mi é zè té tôkô assi.” (Isaïe 46:10) A lé teue-njheu, nda’né métsoo tè zaané, é ping shi’ ngnimné mbooté. A lé zeung nteue-njheu, mbou nda’né épô métsoo tè zaané anè pa’ lénang é shi’ ghô poup anè aya’a. Mpè tsa’ émô’ méla’né Biible anè azi’né jiô. Ntsi zi méla’né mèt é lé lôk mbooté poup, é pou kœu’nè wou!
TCHHI-NÈT NTSA’A MBÔNG-Ô
Jiô pa’ Biible pô scianci é pooté shoung-ô ta’ anou poup. Ping-è nzeung ntsa’ émô’ méla’né Biible mi é kœu’né épouô.
4. Scianci pô Biible é pooté shoung-ô ta’ anou
A lè éfœu’ mvhô, lélœuè épouô é kwang nguè ndoo éssi atsetsa’ é zapnè anè azou. Jiô VIDÉO wouô.
Jiô ajoumi akèté Job a lé leu tè a ghô ajouô méngou’ 3 500. Tông-ô Job 26:7, mbing ntsô’ nzèté jiô:
-
Léghô yi ndoo éssi atsetsa’ “é té anè azou zapné,” a tsui léghè Biible a shoung-ô anouneu, é lèkô?
A lèè ngôô ajouô méngou’ 200 nda’, pa’ méghang scianci é lé jou’ pa’ ntshi é koumné poup. Téta’, ping njiô ajoumi Biible a lé leu tè a ghô ajouô méngou’ 3 500. Tông-ô Job 36:27, 28, mbing ntsô’ ménzèté mouô:
-
Akô kœu’nè wou anè ntsi zi Biible a kè’té shoung pa’ ntshi é koumné poup-é?
-
Tè méleung Biible mi o tông la, é gheu tè o ku’né sang anè Biible?
5. Biible a lé teue-njheu nda’né mémia ménou mi é lé nông ngô shi’ tôkô assi
Tông-ô Isaïe 44:27–45:2, mbing ntsô’ nzèté jiô:
-
Biible a lé teue-njheu nda’né émiè épô métsoo anè pa’ tissông Babylône a shi’ gwheuè assi poup, a ping ntôk méngou’ 200 tè a pooté?
Pêté a tsui léghè Cyrus yi a lè efô ala’ Perse pô nnô ntchou yi, é lé tak ala’ Babylône anè ngou’ 539 av. n. è. b Pô lé fak ntshi yi é lé kènè Babylône, mbing nông mbaa tissông anè méghang-mbo, nguiè aji’è ndè’è. Pô lé jheuè tissông Babylône té lœuô’ ntchou mela’mi a lè nkô’ôtsuèt mèt, mbô mè ndeukné té kèè méntchou tissông. A aya’a, mbô a nda’ ntôk méngou’ 2 500 pa’ mè lé taka tissông Babylône, a ping nké nzèè afeum ala’. Ping-è njiô ajoumi Biible a lé la’né.
Tông-ô Isaïe 13:19, 20, mbing ntsô’ nzèté jiô:
-
Ajoumi a lé gheuè tissông Babylône, a tsui léghè ala’né Biible a lé pooté, é lèkô?
Fitou afeum ala’ Babylône anè aya’a, a nteu ala’ Irak
6. Biible a lé teue-njheu nda’né métsoo mi é si ntôkô assi anè aya’a
Biible a tông léleung njheu tchiô é lè “ménzôknzeum élé’é ala’.” (2 Timothée 3:1) Ping-è njiô ajoumi Biible a lé la’né nguè a shi’ tôkô assi anè aya’a.
Tông-ô Matthieu 24:6, 7, mbing ntsô’ nzèté jiô:
-
Biible a nteu méleung mouô, nda’né nguè akô a lé nông ngô shi’ tôkô assi anè ménzôknzeum élé’é ala’é?
Tông-ô 2 Timothée 3:1-5, mbing ntsô’ ménzèté mouô:
-
Biible a lé teue-njheu nda’né nguè a shi’ ghô anè ménzôknzeum élé’é ala’, atshuè épouô ménông a ghô é lèkô?
-
Tè o jiô jou léghè, atshuè épouô ménông mèt azi Biible a lé teue-njheu nda’né, a si mbootè? O leuè poup mela’akô?
ÉMÔ’ ÉPOUÔ É LEU NGUÈ: “Biible a lèè ngôô akèté métsoo mi mè taa-taa.”
-
Akô tswhi ngheu tè o veung té mi’té nguè mè ghô sang anè Biible?
KIMTÉ
Pêté anè métsoo mi é lé tôkô assi, ngheuè scianci, mbô méla’né mi é nteu Biible, é pou ntsui léghè mè ghô pou sang anè Biible.
O ghô tsô’ é lèkô?
-
Tè Biible a shoung ménou mi mè taa-taa, kèè ménou mi é lé kwa’ ntôkô assi?
-
Émô’ ménou mi scianci pô Biible é pooté shoung-ô ta’ azou éwou, é si ngô émiè?
-
Tè o kwang nguè Biible a ghô teue-njheu nda’né métsoo mi é shi’ tè tôkô assi? O leuè poup mela’akô?
KU’NÈ FA’A LÉZHÈ
Tè Biible a shoung émô’ métsoo anè scianci émi é té poup-ô?
“Tè scianci pô Biible é pooté shoung-ô ta’ azou?” (Akèté zi a nteu internèt)
Biible a leu nguè akô anè “ménzôknzeum élé’é ala’é”?
Jiô pa’ méla’né Biible mi é lé nông ntchiitè ala’ Grèce é lé pooté poup.
Jiô pa’ méla’né Biible é lé tshouné mmô’ gning a lékoumné ntsi zi a lè ndôkô njiô Biible poup.
“Meung ndè té mveung-è nguè Ndem a éwou” (La Tour de Garde no 5 2017)
