“Tin ni gimed ra ning ngak e en ni Chitamangiy u fithingag e ra pi’ ngomed.”​—John 16:23.

Ba tamilang ko thin ni yog Jesus ni baadag Jehovah ni ngad meybilgad ngak u daken fithingan Jesus Kristus, ma gathi ngad meybilgad ni gad be fanay e liyos, ara u daken e pi thothup, ara pi engel, ara pi ga’ rodad ni kar m’ad kafram. Faan gad ra meybil ngak Got u daken fithingan Jesus, ma aram e gad be dag ni ke tamilang u wan’dad ni be rung’ag Got e meybil rodad ni bochan e n’en ke rin’ Jesus ni fan ngodad. I gaar Jesus: “Dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.”​—John 14:6.

“Mu weliyed ngak urngin e magafan’ romed [“urngin ban’en ni bay u gum’ircha’med,” NW].”​—Psalm 62:8, BT.

Nap’an ni gad ra meybil ngak Jehovah, ma susun e ngad nonad ngak ni bod rogon ni gad be non ngak e chitamangidad ni gad ba t’uf rok. Susun e ngaud nonad ngak u fithik’ e tayfan ni ke yib u gum’ircha’dad, ma gathi ngad beeged boch e meybil ni kan yoloy nga lan yu ken e babyor ara ud sulod u daken boch e meybil ni kad filed ke mit ngodad.

“Mmudugil u wun’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.”​—1 John 5:14.

Be yog Jehovah Got ngodad u lan e Bible e n’en nra rin’ ni fan ngodad, nge n’en ni baadag ni ngad rin’ed ni fan ngak. Faanra nge m’agan’ Got ko meybil rodad, mab t’uf ni ngad meybilgad nib puluw ko tin “nib m’agan’ ngay.” Faanra ngad rin’ed e re n’ey, mab t’uf ni ngad filed e Bible ya nge yag nda nanged Got nib fel’ rogon. Faan gad ra rin’, ma aram e ra m’agan’ ko meybil rodad.

Mu Yibilay e Tin nib T’uf Rom. Rayog ni ngad yibilayed ngak Got e tin nib t’uf rodad u reb e rran ngu reb ni bod rogon e ggan, nge mad, nge gin ngad pared riy. Ku rayog ni ngad yibilayed e gonop ya nge yag nda nanged e n’en nib fel’ ni ngad dugliyed. Ku rayog ni ngad meybilgad ngak Got ni nge pi’ gelngidad ya nge yag nda athamgilgad u fithik’ e pi magawon ni gad be mada’nag. Rayog ni ngad yibilayed e michan’ ni nge yag ngodad, nge denen rodad ni ngan n’ag fan, mu kud ninged e ayuw rok Got.​—Luke 11:3, 4, 13; James 1:5, 17.

Mu Yibilay Boch e Girdi’. Piin gallabthir nib t’uf pi fakrad rodad e yad ma felfelan’ ni faan yad ra guy pi fakrad ni yad be t’ufeged yad. Gadad pi fak Jehovah, ma baadag ni nge bagadad mi i lemnag bagadad, mu ud ayuweged gadad. Ba puluw ni ngad yibilayed e en mabgol rodad, nge chon e tabinaw rodad, nge pi fakdad, nge pi fager rodad. I yoloy James nreb i gachalpen Jesus ni gaar: “Me bigimed me pi’ e meybil rok bigimed ngak Got.”​—James 5:16.

Ngam Pining e Magar. Baaray e n’en be yog e Bible u murung’agen Got ni ir e En Ke Sunmiydad. Be gaar: “Be micheg ir u daken urngin e tin nib fel’ ni be rin’, ya ma pi’ e n’uw ngomed u lang nge galwog u ngal’an; me ir e ma pi’ e ggan ngomed ma ma fal’eg lanin’med.” (Acts 14:17) Faan gad ra fal’eg i lemnag urngin ban’en ni ke rin’ Got ni fan ngodad, ma ra k’aringdad e re n’ey ni ngad pininged e magar ngak u daken e meybil. Bin riyul’ riy e, susun e ngkud daged ni gad be pining e magar ngak Got ni aram e ngaud folgad rok.​—Kolose 3:15.

Yu ngiyal’ e rayog ni nge kireban’dad ni bochan e der gur Got ni nge fulweg taban e meybil rodad ni keb u gum’ircha’dad. Ere gur, aram e ngad lemnaged ndakir lemnagdad Got? Danga’! Am tay fanam i yan ko n’en ke buch rok boch e girdi’ ni be dag nsana rayog nib t’uf ni nge dab da talgad ko meybil.

Steve ni kan weliy murung’agen ko bin som’on e article e yog ni gaar, “Faan gomanga dag ulul ko meybil, ma sana kab kafram ni ke mulan’ug.” Ere mang e ayuweg Steve? I tabab ni nge fil e Bible, ma aram me nang nib t’uf ni nga i meybil ndabi tal. I gaar: “Gu meybil ngak Got nggu pining e magar ngak ko ayuw ni be pi’ e pi fager rog ngog u fithik’ e t’ufeg. Dariy ba ngiyal’ ni kug felfelan’ ni bod rogon e chiney.”

Uw rogon Jenny ni i lemnag ni ir be’ ndariy rogon ni nge motoyil Got ngak? I gaar: “Immoy ba ngiyal’ ni taw ngay mug lemnag nri dariy fag, ere gu wenig ngak Got ni nge ayuwegeg nggu nang ko mang fan ni gu be lem ni aray rogon.” Uw rogon ni ayuweg e re n’ey? Ki ulul ngay ni gaar: “Meybil ni gu ma tay e ke ayuwegeg ni ngaug lemnag rarogog ni bod rogon ni ma lemnag Got. Ki ayuwegeg ni nge tamilang u wan’ug ni yugu aram rogon ni be yog lanin’ug ngog ndariy fag, machane gathi aram rogon ni be lemnageg Got. Meybil e ki ayuwegeg ni nge dabi mulan’ug ma ngaug par ni gu be athamgil.” Ere mang angin ni ke yib riy? “Meybil e ke ayuwegeg ni nggu nang nib riyul’ Jehovah, ma gub t’uf rok, maku ir reb e Got ni ma lemnageg, ma ir e Chitamag, nge Fager rog ni gubin ngiyal’ ni bay ni be ayuwegeg ni faanra gu be athamgil ni nggu rin’ e tin baadag.”

Kum lemnag e n’en ni buch rok Isabel. Nap’an ni yan i nang ni ke diyen, ma aram me yog e pi togta rok nnap’an nra gargel mab m’ar e bitir rok ni boor ban’en ndabiyog ni nge rin’. Ere ri kireban’ nib gel. Ku bay boch e girdi’ nrogned ngak ni nge li’ e re tir nem u meyal. I yog ni gaar: “Gu lemnag ni bay gum’ ni bochan gelngin e magafan’ nug be tay.” Ere mang e rin’? Ki ulul ngay ni gaar: “Ug par ni gu be meybil ngak Got ni nge ayuwegeg.” Boch nga tomuren me gargeleg bochi pagel me tunguy Gerard ngak. Re tir nem e ba m’ar ni boor ban’en ndabiyog ni nge rin’. Ere gur, i lemnag Isabel ni ke fulweg Got taban e meybil rok? Arrogon! Ni uw rogon? I gaar: “Gu ra guy e re tir rog ney e chiney ni ke gaman 14 e duw rok ni be par nib felfelan’ ni yugu aram rogon nib m’ar ni boor ban’en ndabiyog ni nge rin’, ma be dag ngog ni ireray e bin th’abi fel’ e kanawo’ ni ke fulweg Jehovah taban e meybil rog riy. Maku ireray e bin th’abi fel’ e tow’ath ni ke pi’ Jehovah Got ngog.”

Pi thin ney ni ke yog e pi girdi’ ney ni keb u gum’ircha’rad e ra k’aringdad ni ngad lemnaged e n’en ni yog fare psalmist ni gaar: “Somol, bay mmotoyil ko meybil rok e piin ba sobut’; bay mu pi’ e athamgil nga lanin’rad.” (Psalm 10:17, BT) Ireray boch i fan ndab da talgad ko meybil ngak Got!

Boor e meybil rok Jesus ni gad ra pirieg u lan e Bible. Bin nri boor e girdi’ ni manang e aram fare kenggin e meybil ni fil ngak pi gachalpen. Ere mang e rayog ni ngad filed riy?