Ke Yag ni Nge Rin’ Hulda e N’en ni Nameg
FAANRA kam man nga Sangir Besar nreb e donguch nib achig ni bay u Indonesia boch e duw ni ke yan, ma rayog ni kam guy dalip i walag nib pin u dap’el’ay ko re donguch nem. Yigoo yimanangrad u rom ni bochan e machib ni yad ma tay ni yad be ayuweg e girdi’ ni nge tamilang e Bible u wan’rad. Machane ngiyal’ nem e yad be rin’ reb e maruwel ni yugu ba thil.
Fare donguch nu Sangir Besar ni bay ko lel’uch u Indonesia
Som’on e ranod nga maday ngar feked boch e malang nib tomal nga talang. Bay boch e pi malang ney nib ga’ ni bod ga’ngin e bat’ ni yima fanay ko soccer. Ngemu’ mi yad par nga daken nochi chiya ni kan ngongliy ko ren mar fanayed e ama ngaur bilbiliged e pi malang nem nge par ni ke achichig nga ba pi fak e nimen. Tomuren mar ted e pi malang nem nga pakit ngar feked u ba tawo’ nga lang ko gin yad ma par riy. Ngemu’ mar feked e pi malang nem ngar ted nga lan bogi tutuw nib ga’ min fek ngan tay nga lan e karrow nib ga’ ya nge yag nni fanay ni fan ko kanawo’ ni yibe ngongliy.
Be kunuy Hulda e malang u dap’el’ay
Bagayad e pi walag nib pin ney e ka nog Hulda ngak. Bochan rogon e par rok, ma aram e rayog ni nge yoornag e tayim ni be rin’ e re maruwel ney riy nga urngin e tayim ni be maruwel e gal ni baaram e walag riy. Ba ga’ ni ma fanay e salpiy ni ke yognag ko re maruwel ney ni fan ko tin nib t’uf ko tabinaw rok. Machane chiney e baadag ni nge tay boch e re salpiy nem nga bang ni fan nga yugu ban’en. Baadag ni nge fanay reb e tablet ya nge yag ni nga i yan ko fare app ni JW Library®. Manang Hulda ni pi video nge yugu boch ban’en ni bay ko re app nem e ra mon’ognag e machib ni be tay nge rogon ni be tamilang e Bible u wan’.
L’agruw e awa ni ma maruwel Hulda riy ni kakadbul u lan reb nge baley e pul ni be bilbilig e malang ni nge suguy e dug u bochi karrow nib achig. Tomur riy me gaman e salpiy rok ni nge chuw’iy reb e tablet.
Yaan Hulda ni be kol e tablet rok
I yog Hulda ni gaar, “Yugu aram rogon nri aw parwog miki amith fithik’ i dowag ni bochan e re maruwel ney, machane nap’an ni yag ni nggu fanay e re tablet ney ni nge ayuwegeg ni nge yib angin e machib nug be tay miki mom rogon ni nggu fal’eg rogog ni fan ko muulung, ma rib papey nug pagtalin e amith nug tay.” Ki yog nre tablet ney e ayuweg u tabolngin fare m’ar ni COVID-19 ni garer ni bochan e un muulung ma yibe machib u online. Ere gad be un ngak Hulda ko felfelan’ ni bochan e ke yag ni nge rin’ e n’en ni nameg.
