Mang Fan nib T’uf ni Ngam Nang Fan e Thin nu Bible?
KENGGIN E RE KE BABYOR NEY | RAYOG NI NGAM NANG FAN E THIN NU BIBLE
Mang Fan nib T’uf ni Ngam Nang Fan e Thin nu Bible?
“Bible e ba ke babyor ko teliw. Machane, re ke babyor ney e de ga’ fan ko girdi’ nu China.”—LIN, CHINA.
“Faanra dabiyog ni nggu nang fan e pi babyor nib thothup ni yima fil ko teliw rog ni Hindu, me ere, uw rogon me yag ni nggu nang fan e Bible nib Thothup?”—AMIT, INDIA.
“Gu ma tayfan e Bible ya ba ke babyor ni ke kakrom, ma kug rung’ag ni aram e re ke babyor nth’abi yoor e girdi’ ni ma chuw’iy. Machane, dawor gguy ba ken e Bible biid.” —YUMIKO, SAPAN.
Boor e girdi’ u ga’ngin yang e fayleng ni yad ma tayfan e Bible. Machane, ri buchuuw ban’en ni yad manang u murung’agen e Bible, maku boch i yad e dariy ban’en ni manang u murung’agen. Ba ga’ ni bokum milyon e girdi’ ni yad ma par u Asia ni aray rogorad. Machane, ku boor e girdi’ u yugu boch e nam ni boor e girdi’ riy ni bay e Bible rorad ni gathi ri boor ban’en ni yad manang u murung’agen e Bible.
Machane, sana rayog ni nge lungum, ‘Mang fan nib t’uf ni nggu nang fan e thin nu Bible?’ Faan ga ra gay rogon ni ngam nang fan e thin ko re ke babyor ney nib thothup, ma rayog ni nge ayuwegem ni:
• Ngam pirieg e felfelan’
• Ngam pithig e pi magawon u lan e tabinaw rom
• Ngam gel ko magafan’
• Nge fel’ e tha’ u thilmed boch e girdi’
• Ngam nang rogon ni ngam maruwel ko salpiy rom nib fel’ rogon
Am lemnag e n’en ni buch rok Yoshiko ni ma par u Sapan. Kafram e i lemnag ko mang e be weliy e Bible murung’agen. Ere, dugliy ni nge beeg e Bible. Mang angin ni yib riy ngak? I yog ni gaar: “Thin nu Bible e ir e ke ayuwegeg ni nge yib fan e yafas rog, me yag ni nge l’agan’ug ko pi n’en ni ka bay boch nga m’on. Chiney e dakugur ma lemnag ni dariy fan e yafas rog.” Amit ni faan kan weliy murung’agen e dugliy ni nge fil e n’en ni bay u Bible. I yog ni gaar: “Kar gu ngat ko n’en ni kug fil. Boor e thin u lan e Bible nra ayuweg e girdi’.”
Bokum milyon e girdi’ ni ke ayuwegrad e thin nu Bible. Ere, mang ndab mu fal’eg i yaliy e thin riy, mag guy rogon nrayog ni nge yib angin ngom?
[Kahol ko page 3]
Ra ga baadag ni ngkum nang boch rogon nrayog ni nge yib angin e thin nu Bible ngom, mag guy fare brochure ni kenggin e A Satisfying Life—How to Attain It ni thin ni Meriken ni ke ngongliy e Pi Mich Rok Jehovah.