KENGGIN E RE KE BABYOR NEY | BAY ANGIN E MEYBIL NI GAD MA TAY, FA?
Fan ni Ma Yog Got Ngodad ni Ngad Meybilgad Ngak
Be piningdad Got ni ngad manged fager rok.
Pi fager e yad ma par nib fel’ rogon e numon u thilrad ya nge yag ni par nib fel’ e tha’ u thilrad. Ere, ku arrogon Got ni ma pi’ e athamgil nga lanin’dad ni ngaud nonad ngak, ma ke bing e kanawo’ ngodad nrayog ni ngad manged fager rok. Ke yog ni gaar: “Ma aram e bay um pininged gag. Ma bay um bad nguum meybilgad ngog ma bay gu fulweg taban e meybil romed.” (Jeremiah 29:12, BT) Faanra um non ngak Got ma rayog ni ngam ‘chugur ngak, me chugur ngom.’ (James 4:8) Be micheg e Bible ngodad ni gaar: “Ba chugur [Jehovah] ngak urngin e piin ni yad ma non ngak.” (Psalm 145:18) Faanra ud meybilgad ngak Got ni gubin ngiyal’, ma aram e rayog ni ngari chugur e tha’ u thildad.
“Ba chugur [Jehovah] ngak urngin e piin ni yad ma non ngak.”—Psalm 145:18
Baadag Got ni nge ayuwegem.
I yog Jesus ni gaar: “Rayog ni nge pi’ bigimed e pi matam ba malang ngak fak ni faanra ning fak e ggan ngak? Ara pi’ ba porchoyog ngak ni faanra ning e nig ngak? Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere Chitamangimed ni bay u tharmiy e ri ra pi’ e tin nib fel’ ban’en ngak e piin ni yad ra ning ngak!” (Matthew 7:9-11) Arrogon, be pi’ Got e athamgil nga lanin’um ni ngaum meybil ngak ni bochan e ma ‘lemnag rarogom’ ma baadag ni nge ayuwegem. (1 Peter 5:7) Ku ma pi’ e athamgil nga lanin’um ni ngam weliy e pi magawon rom ngak u daken e meybil. Be gaar e Bible: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.”—Filippi 4:6.
Ba t’uf e tirok Got ban’en ko girdi’.
Piin ni yad ma fil murung’agen rogon ni ma ngongol e girdi’ e kar pirieged ni bokum milyon e girdi’ e yad ma guy nib t’uf rorad ni ngaur meybilgad. Mus ngak e piin nde mich Got u wan’rad ara piin ni be maruwar Got u wan’rad ni yad ma guy nib t’uf ni ngar meybilgad. * Re n’ey e be micheg nriyul’ nni sunmiy e girdi’ nib t’uf e tirok Got ban’en rorad. I yog Jesus ni gaar: “Nge felan’ e piin ni kar pirieged u lanin’rad ni kar gafgowgad ndabi siy ni nge yog Got ngorad.” (Matthew 5:3) Reb e kanawo’ nrayog ni ngad rin’ed e re n’ey riy e aram e ngaud nonad ngak Got ni gubin ngiyal’.
Mang angin nra yib ngodad ni faan gad ra fol ko n’en ni be yog Got ngodad ni aram e ngaud meybilgad ngak?
^ Immoy reb e survey ni tay reb e ulung u Meriken ni ka nog e Pew Research Center ngay ko duw ni 2012 min pirieg riy ni 11 e pasent ko piin nde mich Got u wan’rad nge piin ni gathi rib mich Got u wan’rad e ba ga’ nra reb e pul ma taab yay ni kar meybilgad.