Ni gargelnageg ko fare binaw nu Santo Domingo, ko Dominican Republic, aningeg pi walageg, ma gag e th’abi bitir romad. Ba tolang e skul ko gallabthir romad, ma yow baadag ni ngar chuguliyew pi fakrow u fithik’ e girdi’ nib fel’ ma yad ba yul’yul’. Aningeg e duw u m’on nni gargelnageg me mada’nag e gallabthir rog e missionary ko Mormon. Ma bochan nra guyew nib yaram, mab beech e munmad rok e gal missionary ni pumoon nem, ma kur guyew ni yow ma tayfan e girdi’, ma de n’uw nap’an me dugliy e gallabthir rog ni tabinaw romad e ra mang e bin som’on e tabinaw ko re binaw nem nra un ko teliw ko Mormon ara fare Church of Jesus Christ of Latter-day Saints.

Ere, nap’an nggu ilal, ma gu ma felfelan’ ko n’en ni gamad ma rin’ ko galesiya ko Mormon, mab ga’ fan u wan’ug e n’en ni yibe fil ngomad u murung’agen rogon e par ko tabinaw, nge rogon ni ngan ngongol ngak yugu boch e girdi’. Kug felfelan’ ni kug mang reb e Mormon, ma kug nameg nra boch nga m’on ma gu ra mang reb e missionary.

Nap’an ni ke gaman 18 e duw rog, ma kug warod chon e tabinaw rog nga Meriken ya nge yag ni nggu un ko skul nib tolang. Gonap’an reb e duw ni ke yan, me yib be’ nib ppin ni walagen e nina rog nge pumoon rok ni yow e Pi Mich Rok Jehovah nga Florida ni ngar guyew gamad. Ma rognew ngomad ni nggu uned ngorow nga reb e Bible convention. Ma kug gin ni gu be guy urngin e girdi’ ni yad be pithig e Bible rorad, ma yad be beeg e thin riy, maku yad be yoloy boch ban’en nga but’. Ere, gu ning bang e babyor nge pen, ya nge yag ni kug yoloy boch ban’en nga but’ ni bod yad.

Tomuren fare convention me yog fare pin ni walagen e nina rog nge pumoon rok ni bochan ni gu baadag nggu mang reb e missionary, ma rayog ni ngar ayuwegew gag ni nggu nang boch ban’en u murung’agen e Bible. Kug lemnag nib fel’ e n’en ni ka rognew ngog, ya boor ban’en ni gu manang u murung’agen e Book of Mormon ko n’en ni bay u lan e Bible.

Nap’an ni gamad ra non u telefon, ma yow ma pi’ e athamgil ngog ni nggu fal’eg i gay e pi n’en nib michan’ug ngay, ma nggu taareb rogonnag ko thin ni  bay u lan e Bible.Ya yow baadag ni nggu gay rogon ni nggu nang fan e tin riyul’ u lan e Bible.

Boor ban’en ni kug fil ko teliw ko Mormon ni ke mich u wan’ug, machane gathi ri gu manang rogon nib taareb e thin riy ko thin nu Bible. Munmun me pi’ fare ppin ni walagen e nina rog ba ken e Awake! ngog ko November 8, 1995, ni bay boch e article riy ni be weliy murung’agen boch e machib ko Mormon ni ke fal’eg e Pi Mich Rok Jehovah. Kug gin ya boor ban’en ni ma machibnag e teliw ko Mormon nri gathi ri gu manang fan. Ma aram e n’en ni ke k’aringeg ni nggu fal’eg i gay e pi n’en ni kug beeg ko fare ke Awake! ko website ko Mormon. Mu kug wan gu pirieg nrib riyul’ e pi nem u nap’an ni kug wan ko pi museum ko Mormon u Utah.

Gu ma lemnag ni fare Book of Mormon nge Bible e der togopuluw reb e thin riy nga reb. Machane, nap’an ni gu fal’eg i beeg e thin ko Bible, mu gu nang ni bay boch e machib ko Mormon nib togopuluw ko thin ni bay u Bible. Ni bod rogon ni be yog e Bible ko Ezekiel ko 18:4 ni en nra denen e ra yim’. Machane, rogon ni be yog ko Alma 42:9 ko fare Book of Mormon e be gaar: “Dariy ba ngiyal’ nra yim’ be’ ni ke denen.”

Gathi kemus ni kug pirieg nib thil e thin ni bay u lan e Book of Mormon ko thin ni bay u lan e Bible, ya ki maruwar lanin’ug u rogon ni yad ma fil boch ban’en nib l’ag rogon ko nam rorad ngak girdien e teliw rorad. Ni bod ni yima fil ngorad ni fare milay’ nu Eden e bay u reb e binaw ni ka nog e Jackson County, Missouri ngay, ni bay u lan u Meriken. Ma pi tayugang’ ko re teliw nem e yad ma fil ni “nap’an nra gagiyegnag Got e fayleng ma ra fanay e am nu Meriken ni nge gagiyegnag e fayleng ni polo’.”

Ere, gu ma lemnag ko mang e ra buch ko fare nam ni gargelnageg riy, ara tin ni ka bay e nam. Ma reb e blayal’ ma kug fith be’ ni yibe skulnag ni nge mang reb e missionary ko Mormon u murung’agen e re n’ey, u nap’an ni kug nonow u telefon. Kug fith ngak ni faanra bay e mahl, mab m’agan’ ngay ni nge un ko cham nge li’ reb e girdien e Mormon ni be’ u reb e nam. Kug gin ngay ni gaar ra rin’! Kug fal’eg i gay boch murung’agen e machib ko n’en nib michan’ug ngay, ma kug fith boch ban’en ko pi tayugang’ ko fare galesiya ko Mormon. Ma rogon ni ka nog ngog e pi fulweg ko deer rog e ban’en nib mith ni ba t’uf ni nggu son ya ra munmun ma fini tamilang.

De fel’ u wan’ug e fulweg ni ka nog ngog, ere kug fal’eg i lemnag e n’en ni gu be nameg nge fan ni gu baadag ni nggu mang reb e missionary ko Mormon. Kug nang nreb i fan ni gu baadag ni nggu mang reb e missionary e nge yag ni nggu ayuweg e girdi’. Maku reb i fan e gu baadag ni nge tay e girdi’ fag. Machane, da gu lemnag ni nge fel’ e tha’ u thilmow Got. Ere, yugu aram rogon ni ug beeg e Bible kafram, ma de ga’ fan e thin riy u wan’ug. Dagnang e n’en nib m’agan’ Got ngay ni fan ko fayleng ara fan ko girdi’ ni be par u daken e fayleng.

Nap’an ni gamad be fil e Pi Mich Rok Jehovah e Bible u taabang, ma kug fil ko mini’ fithingan Got, nge mang e ma buch u nap’an nra yim’ be’, nge mang fare liw rok Jesus u rogon ni nge lebguy e n’en nib m’agan’ Got ngay. Ere, chiney e ka fin gu nang fan buchuuw murung’agen e re ke babyor ney nrib fel’, ma gu ma felfelan’ ngay ni nggu weliy murung’agen e pi n’en ni kug fil riy ngak yugu boch e girdi’. Kafram i yib ma gu manang ni bay Got, machane chiney e rayog ni nggu non ngak u daken e meybil ni bod rogon reb e fager ni gamow ma non. Kan taufe nigeg ni gag reb e Pi Mich Rok Jehovah ko pul ni July 12, ko duw ni 2004. Ma nel’ e pul nga tomuren, ma kug un ko machib u polo’ e tayim rog.

Ke gaman lal e duw ni kug maruwel ko tochuch ko Pi Mich Rok Jehovah u Brooklyn, New York. Ma ri gub felfelan’ ni be yag ni nggu pi’ e ayuw ko fare maruwel ni ngan fal’eg e Bible nge ku boch e babyor ni bay rogon ko thin nu Bible nra ayuweg bokum milyon e girdi’ u ga’ngin yang e fayleng. Ma gub felfelan’ ni be yag ni nggu ulul i ayuweg yugu boch e girdi’ ni ngar nanged murung’agen Got.