Uw rogon u wan’um e n’en ni be yog e girdi’ nra thil gubin ban’en u roy u fayleng ni polo’ ko rofen ni December 21, 2012 ko calendar ni Maya? Rogon e tafinay rom riy e ra aw ni ga ra felfelan’ ngay ara ra kireban’um ngay ara ga ra darifannag. Ere gur, re n’ey e yugu reb e yiiy nde puluw u murung’agen tomuren e re fayleng ney, fa?

Ma uw rogon ni kan tamilangnag fare thin ni “tomren e fayleng” u Bible? (Matthew 24:3) Boch e girdi’ e yad ma rus ya yad ma lemnag ni ra yik’ e fayleng. Ma boch i yad e ba felfelan’ ni ngar guyed e n’en nra buch u tomuren e fayleng. Maku boch e girdi’ e kar chalbangad ni yad be rung’ag ni ke chugur e tomur, machane dawori taw. Ere, mit ney e lem ko girdi’ e ba puluw fa danga’?

Dabisiy ni ga ra gin ko n’en ni ga ra fil u Bible u murung’agen tomuren e fayleng. Ya gathi kemus ni be yog e Bible fan ni ngad felfelan’gad ko re n’ey, machane ku be tamilangnag ni dabisiy ni bay e girdi’ ni yad be lemnag ni ke pag nap’an ma dawori taw e tomur. Ere, gamad be pi’ e athamgil ngom ni ngam lemnag e pi fulweg u boch e deer ni ma fith e girdi’ u murung’agen tomuren e fayleng nrogon ni be tamilangnag e Bible.

FULWEG U BIBLE: “Fayleng e kam tay nga daken e def riy nri be par nib mudugil, ndabiyog ni ngan mithmitheg.”​—PSALM 104:5.

Fayleng e dabin kirebnag ko nifiy ara yugu boch ban’en. Ya n’en ni be fil e Bible e nge par e girdi’ u fayleng ni manemus. Rogon ni bay ko Psalms 37:29 e be gaar: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Psalm 115:16; Isaiah 45:18.

Tomuren ni sunumeg Got e fayleng me yog nib “fel’” ma ke mada’ ko ngiyal’ ney ma dawori thil e lem rok. (Genesis 1:31) Ere, der lemnag ni nge kirebnag e fayleng, ya be micheg nra “kirebnag e piin ni kar kirebniged e fayleng” ma re n’ey e be yip’ fan nra ayuweg e fayleng ndariy biid ni yira kirebnag.​—Revelation 11:18.

Sana ga ra lemnag ni fare thin ni bay ko 2 Peter 3:7 e be weliy murung’agen e fayleng nra yik’. Ya be yog e re thin nem ni gaar: “Lan e lang nge re fayleng ney ni ba’ e chiney e ka re bugithin nem rok Got e ir e ke tay ndabi kireb nge yan i mada’ ko ngiyal’ ni nge yib e nifiy i kirebnag.” Ere, e re thin ney e be yip’ fan ni yira kirebnag e fayleng ko nifiy, fa? Ba ga’ ni fa yu bugithin ni “lan e lang” nge “fayleng” nge “nifiy” e be yip’ fan yugu boch ban’en. Ni bod ni bay ko Genesis 11:1 ni gaar: “Som’on e i par e girdi’ nu fayleng ni taab thin e yad ma yog ma taareb rogon e yu bugithin ni yad ma yog.” Ere, fare bugithin ni “fayleng” ni bay ko re thin ney e be yip’ fan e girdi’ nu fayleng.

Ma rogon ni ku be tamilangnag e 2 Peter 3:7 e lan e lang nge fayleng nge nifiy e yu bugithin ni be yip’ fan ban’en. Yibe taareb rogonnag e verse 5 nge 6 ko fare Ran ni tharey e fayleng u nap’an Noah. Ya ngiyal’ nem ma goo girdi’ ni yad ba kireb e thangrad, machane dariy ban’en ni buch ko fayleng. Ere, fare “fayleng” ni kan tharey ko Ran e be yip’ fan e girdi’ nib kireb ni kan thang. Ma fare “lan e lang” ni kan kirebnag e be yip’ fan e piin ni yad be gagiyegnag e girdi’ e ngiyal’ nem. (Genesis 6:11) Ere, ku aram e n’en ni be yip’ fan fare thin ni bay ko 2 Peter 3:7 ni be weliy ni yira thang e girdi’ nib kireb nge piin ni yad be gagiyegnagrad.

FULWEG U BIBLE: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 JOHN 2:17.

“Fare fayleng” nra chuw e gathi be yip’ fan e re fayleng ney ni gad be par riy, ya be yip’ fan e girdi’ nde puluw e ngongol rorad ko n’en nib m’agan’ Got ngay. Got e ra ‘chuweg’ e piin nib kireb ya nge yag ni nge felfelan’ e girdi’ nib mat’aw ko par u fayleng. Ma re n’ey e rayog ni ngan taarebrogonnag nga reb e togta ni ma sey e girdi’ ni bochan nib t’uf ni nge chuweg bang u dow be’ ni bay e cancer riy, ya nge yag ni nge par faanem nib fas. (Psalm 37:9) Ere, aram reb i fan ni “tomuren e fayleng” e ban’en ni yira felfelan’ ngay.

Fare thin ni “tomuren e re m’ag ney” nrogon ni kan fanay u yugu reb e Bible e ku taareb rogon fan ko “tomuren e fayleng” ni aram ban’en ni ngan felfelan’ ngay. (Matthew 24:3) Ere, faanra ra magay e girdi’ nib fas u fayleng u tomuren ni kan thang e piin nib kireb, ma be yip’ fan ni piin nib mat’aw e yad ra par u fayleng u fithik’ e felfelan’. Ma aram fan ni be weliy e Bible murung’agen e “binem e tamilang.”​—Luke 18:30.

I yog Jesus ni ireram e “bin ni beech e tamilang.” Ngiyal’ nem e ra sulweg e par ko girdi’ nga rogon ni lemnag Got ko som’on. (Matthew 19:28) Ma aram e rayog ni ngad felfelan’gad

• Ko par u paradis u fayleng nib gaman gubin ban’en rodad ma gad ba gapas.​—Isaiah 35:1; Mikah 4:4.

• Ko maruwel nib fel’.​—Isaiah 65:21-23.

• Ko par ndariy e m’ar riy.​—Isaiah 33:24.

• Ni ngan sul ngan pagal bayay.​—Job 33:25.

• Ko pi yam’ ni yira faseg bayay.​—John 5:28, 29.

Faan gad ra rin’ e “tin nib m’agan’ Got ngay” ma dariy fan ni ngad rusgad ko n’en nra buch u tomuren e re fayleng ney. Ya susun ni aram ban’en ni gad ra athapeg.

FULWEG U BIBLE: “Ngiyal’ ni gimed ra guy e pi n’ey ni be m’ug, ma aram e ngam nanged ni gagiyeg rok Got e ke chugur ni nge taw.”​—LUKE 21:31.

Rogon i yog reb e professor ni Richard Kyle fithingan u lan e babyor rok ni The Last Days Are Here Again e gaar, “rogon ni ke thil boch ban’en nge pi magawon ko par rodad e be micheg nriyul’ ni gad be chugur nga tomuren e fayleng” nib ga’ ni bochan ni dabiyog rodad ni ngad weliyed fan.

Pi profet ni kar yoloyed e Bible e gathi yad be gay rogon ni ngar weliyed fan ni be buch e pi kireb e ngiyal’ ney. Machane, n’en ni thagthagnag Got nga lanin’rad e aram e n’en ni kar yoloyed murung’agen, ya nge tamilangnag ngodad ni ke chugur nga tungun e re fayleng ney. Ere, mu beeg boch murung’agen e pi yiiy ni baaray mag lemnag ni faanra riyul’ ni ke lebug ko ngiyal’ ni gad be par riy.

• Mahl, uyungol, durru’, nge liliy nib machreg ni ma af.​—Matthew 24:7; Luke 21:11.

• Be gel e kireb i yan.​—Matthew 24:12.

• Be kirebnag e girdi’ e fayleng.​—Revelation 11:18.

• Girdi’ e goo yad e yad be lemnagrad, mab t’uf e salpiy u wan’rad, ma ke t’uf e fafel rorad ma ke tomur Got u wan’rad.​—2 Timothy 3:2, 4.

• Be kireb e tha’ u thilin girdien e tabinaw.​—2 Timothy 3:2, 3.

• Yooren e girdi’ e yad manang ni ke chugur e tomur, machane dariy fan u wan’rad.​—Matthew 24:37-39.

• Yira machibnag fare thin nib fel’ u murung’agen Gil’ilungun Got u ga’ngin yang e fayleng.​—Matthew 24:14.

Ere, rogon ni yog Jesus e ngiyal’ ni gad ra guy e “pi n’ey ni urngin” ma aram e kad nanged ni ke chugur nga tomuren e fayleng. (Matthew 24:33) Ba mich u wan’ e Pi Mich Rok Jehovah ni ke lebug e pi n’ey, ma aram fan ni yad ma machibnag e n’en ni ke michan’rad ngay ko girdi’ u lan 236 e nam.

FULWEG U BIBLE: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad! Ma dabiyog ni ngar milgad riy ya bod e amith ni ma yib ngak be’ ni ppin ni be n’en ni nge gargel.”​—1 THESSALONIKA 5:3.

Be taarebrogonnag e Bible e tomur nga rogon e amith ni ma yib ngak be’ nib pin ni nge gargel, ya manang fare ppin nib mutrug ni fare amith e ra yib ngak nib tomgin. Ma nap’an nra gel fare amith i yan, ma aram e ke nang ni kari chugur ni nge gargel. Ere, taareb rogon ko pi pow ni be m’ug ni be dag ni gad be chugur i yan ko tomur. Ni bod rogon nra yog e togta e ngiyal’ nra gargel fare ppin riy, ma rayog ni nge sagaal, machane ba mudugil u wan’ nra munmun me gargel. Ere, yugu aram rogon ni dawori yib e tomur nrogon ni be lemnag boch e girdi’, machane rogon ni ke lebug e pi yiiy e be micheg ni gad bay ko “tin tomren e rran.”​—2 Timothy 3:1.

Rayog ni ngam fith ni nge lungum: “Faanra kari gagiyel e pow ni gad bay ko tomur, me ere mang fan ni boor e girdi’ ndar nanged e re n’ey?” Ku be tamilangnag e thin nu Bible nra chugur e tomur ma boor e girdi’ nra darifannag e pi n’en ni be micheg ni gad bay ko tomur. Yugu aram rogon ni be buch e pi n’ey, machane bay boch e girdi’ ni yad be moning ni be lungurad: “Chitamangidad e kar m’ad, machane urngin ban’en ni ka be par ni ka rogon ni ka  nap’an e ngiyal’ ni sum e fayleng riy ke mada’ ko chiney!” (2 Peter 3:3, 4) Ere, ba tamilang e pi pow ko tin tomuren e rran, machane boor e girdi’ ni yad ra darifannag.​—Matthew 24:38, 39.

Re article ney e be weliy boch e pi n’en ni ke micheg e Bible ni gad bay ko tomur. * Ga baadag ni ngkum nang boch murung’agen? Faanra arrogon, mag non ngak e Pi Mich Rok Jehovah ngar ayuweged gur ko fol Bible ndariy puluwon. Rayog ni ngan fil e Bible ngom u tabinaw rom, ara yugu bang ni ga baadag, ara u telefon. Kemus ni ngam tay buchuuw e tayim ni fan ko re n’ey, ma angin nra yib ngom e dariy gin nra mus riy.