Ana Yesu Akusatukulupusya Chamtuli?
Kwanga Kwakutyochela m’Baibulo
Yesu jwakulupwisye ŵandu pajwapeleche umi wakwe kuti atuwombole. (Mateyu 20:28) Myoyo, m’Baibulo akusamkolanga Yesu kuti ali “Mkulupusyo jwa chilambo chosope.” (1 Yohane 4:14) Jikusasalasoni kuti, “Pangali jwine jwalijose jwele mpaka akombole kulupusya ŵandu, pakuti pa chilambo chosope chapasi pangali lina line lyele Mlungu liŵapeleche kwa ŵandu kuti tukulupuche nalyo.”—Masengo 4:12.
Yesu ‘jwawilile ŵandu wosope’ ŵakusalosya chikulupi mwa jwalakwe. (Ahebeli 2:9; Yohane 3:16) Kaneko, “Mlungu ŵamjimwisye ku ŵawe,” ni jwawujile kwinani mpela chakupanganyidwa chausimu. (Masengo 3:15) Kwinaniko, Yesu akukombola “kwakulupusya ŵandu ŵele ŵakuŵandichila kwa Mlungu kupitila mwa Jwalakwe, pakuti Jwalakwejo akwete umi ndaŵi syosope kuti ŵapopeleleje [“ŵachondeleleje,” NWT] jemanjajo kwa Mlungu.”—Ahebeli 7:25.
Ligongo chichi Yesu akusasosekwa kutuchondelela kwa Mlungu?
Wosopewe tuli ŵakulemwa. (Aloma 3:23) Ulemwa ukusatutendekasya kuti tukaŵa paunasi wambone ni Mlungu, soni ukusatutendekasya kuti tuweje. (Aloma 6:23) Nambo Yesu ali mpela “namangoswe” kwa ŵale ŵakusakulupilila mbopesi jakutuwombola. (1 Yohane 2:1) Jwalakwe akusamchondelelaga Mlungu kuti apikane mapopelo gawo soni kuti ŵakululuchile yakulemwa yawo kupitila mu mbopesi jiŵapeleche pakutuwila. (Mateyu 1:21; Aloma 8:34) Sonitu Mlungu akusapikana kuŵenda kwakuchondela kwakusatendaga Yesu ligongo kuli kwakamulana ni yakusasaka Mlungujo. Mlungu ŵamtumisye Yesu pachilambo kuti “ŵakulupusye” ŵandu.—Yohane 3:17.
Ana kwamba kulupilila Yesu kuli kwakwanila kuti mundu akulupuche?
Iyayi. Pana yejinji yakusosekwa kutenda mundu kuti akulupuche, ngaŵape kwamba kumkulupilila Yesu. (Masengo 16:30, 31) Panganiji Baibulo jikusati, “Muchikusaŵela chilu kuti, naga chili changali msimu chili chewe, iyoyo soni chikulupi changali yitendo chili chewe.” (Yakobo 2:26) Myoyo kuti tukulupuche tukusosekwa:
Kulijiganya ya Yesu soni Atati ŵakwe ŵali Yehofa.—Yohane 17:3.
Tulosyeje kuti tukusamkulupilila Yesu soni Yehofa.—Yohane 12:44; 14:1.
Tulosyeje kuti tukwete chikulupi mwakupikanila malamusi gakwe. (Luka 6:46; 1 Yohane 2:17) Yesu jwasasile kuti ngaŵa kuti jwalijose jwakumkolaga kuti “Ambuje,” tachikulupuka, nambo ŵelepewo “ŵakusatenda lisosa lya Atati [ŵakwe] ŵakwinani.”—Mateyu 7:21.
Tupitilisye kulosya chikulupi atamose patukusimana ni yipwetesi. Yesu jwasasile mwakupikanika chenene mfundo jeleji paŵatite: “Nambo jwalijose jutachipilila mpaka pambesi, ni jutachikulupuka.”—Mateyu 24:13.