Yindu yejinji ku Ukraine mpela misewu, milato nambosoni malo kwagakusatyochela machili ga magesi yijonasiche mnope ligongo lyakuwulika kwa mabomba. Atamose yili myoyo, abale ŵetu nganaleka kusongana soni kukamula masengo ga Uchimwene atamose kuti ndaŵi syejinji kukuŵaga kwangali magesi.

Anastasia soni Debora, ŵakutenda upayiniya ku Kyiv, ŵasasile kuti akusatama lisiku lyosope kuli kwangali magesi. Akusachaja yipangiso yawo yamakono pandaŵi jampaka akombole soni akusakamulichisya masengo mayunisi ga mufoni kuti asimanikweje pamisongano. Ndaŵi syejinji Intaneti jikusasawusya mnope misongano pajimasile.

Chakusawusya chinesoni chakusasimana nacho abale ni alongo ligongo lyakusima kwa magesi, chili chakuti akulaga kukamulichisya masengo yipangiso yakutendekasya kuti mpweya uŵeje wakutukutila. Abale ŵane akusakamulichisya masengo majenileta kuti akole magesi nambosoni kukamulichisya masengo yipangisoyi. Ŵane mwa jemanjaji akutama ni ŵachibale ŵawo ŵakwete yipangisoyi pele ŵane akusagamba kupilila kusisimako. Nambo chakusangalasya chili chakuti mnyumba syejinji sya abale mwana yipangiso yakutendekasya mpweya kuŵa wakutukutila. Akusapata mpweyawu pakamulichisya masengo gasi, jwangakusadalila magesi.

Iryna, jwali mpayiniya ku Ivano-Frankivsk, akusalingalinga kuyiwona yindu mwakuŵajilwa. Jwalakwe jwatite “Naganisisye yakuti ngayiganichisyaga mnope yindu yanganimba ngombwele kuyichenga. Ni ngusagamba kutenda yampaka ngombole pa awala jelejo. Ngusaganisya yampaka ndende pandaŵi jagasimile magesi soni ngusalolechesya kuti ndesile dawunilodi mabuku ni yindu yine yakusosekwa mkanipaŵe.”

Atamose kuti abale ni alongo ŵetu akusimana ni yakusawusya yejinji ku Ukraine, jemanjaji akulingalingape kutenda yejinji pakumtumichila Yehofa. Tuli ŵakusimichisya kuti jwalakwe chapitilisye kwajaliwa abale ni alongoŵa ligongo lya kulipeleka kwawo “pakutenda yindu yambone.”—Agalatiya 6:9.

Pakwikanaga pa Disemba 6, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilichika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale ŵa m’madela gosope ga m’chilambochi.

• Abale ni alongo 47 awile

• Abale ni alongo 97 ŵawulele

• Abale ni alongo 11,537 atilile mmadela gane ga m’chilambochi

• Nyumba syakwana 590 sigumulidwe

• Nyumba syakwana 645 sijonasiche mnope

• Nyumba syakwana 1,722 sijonasiche panandi

• Nyumba sya Uchimwene syakwana 7 sigumulidwe

• Nyumba sya Uchimwene syakwana 19 sijonasiche mnope

• Nyumba sya Uchimwene syakwana 68 sijonasiche panandi

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 54,212 apatile chikamuchisyochi kutyochela ku makomitiga, mwamti abaleŵa apatile malo gambone gakutama

• Ŵakulalichila ŵakwana 26,811 atilile m’yilambo yine, mwamti ŵakulupilila achimjawo akwakamuchisya