Ŵa Mboni sya Yehofa aŵele ali mkukamulichisya masengo ma Baibulo gakulekanganalekangana pakusaka kulijiganya Baibulo. Naga mu yiŵecheto yine mwana Baibulo ja Dziko Latsopano la Malemba Opatulika, akusakamulichisya masengo jelejo, ligongo Baibuloji jikusakamulichisya masengo lina lisyesyene lya Mlungu. Konjechesya pelepa ŵajilembile mwakulondola, soni mwakupikanika chenene.

•   Jikusakamulichisya masengo lina lisyesyene lya Mlungu. Ŵakuwandisya ma Baibulo ŵane alepele kumchimbichisya mkulemba jusyesyene jwa Baibuloji. Mwachisyasyo, ŵakugopolela Baibulo jine ŵalembile mena gakupunda 70 ga ŵandu ŵele ŵaŵatendekasisye kuti Baibuloji jisimanikwe m’chiŵecheto chawo. Nambo chakusimonjesya chili chakuti, ŵagopolela Baibuloji ŵatyosisye lina lya mkulemba jusyesyene jwa Baibulo jwali Yehofa Mlungu.

   Mwakulekangana ni yeleyi, Baibulo ja Dziko Latsopano lyawuchisye lina lyakuti Yehofa m’malo gakwe. Linali lyasimanikwaga malo masausande gejinji mu yakulembedwa ya pandanda ya Baibulo. Nambo ŵandu ŵaŵagopolelaga Baibulo ja Dziko Latsopano nganasaka kuti mena gamanyikwe.

•   Jagopoleledwe mwakulondola. Ngaŵa kuti Mabaibulo gosope ŵagagopolele mwakulondola mwakulandana ni utenga wawuli mu yakulembedwa ya pandanda ya Baibulo. Mwachisyasyo Baibulo jine, maloŵe gagali pa Mateyu 7:​13 ŵagagopolele kuti, “Ajinjile pachipata chakanganika, ligongo chipata chakwinjilila ku moto chili changakanganika soni msewu wakwe wakwaula kweleko uli wangasawusya kwenda.” Nambo yakulembedwa ya pandanda ya m’Baibulo, ŵakamulichisye masengo maloŵe gakuti, “chonasiko,” ngaŵaga “moto.” Komboleka kuti ŵagopolelaŵa ŵaŵisile maloŵe gakuti “moto” ligongo lyakuti ŵaganisyaga kuti ŵandu ŵakusakala ŵaŵawile tachilagasidwa kwa umi wawo wosope ku moto. Nambo nganisyo syelesi ngasikukamulana ni Baibulo. Ni ligongo lyakwe Baibulo ja Dziko Latsopano, pa lilembali jikusasala kuti, “Jinjilani pachipata chakanganika, ligongo litala lyekulungwa soni lyangasawusya kwendamo likwawula kuchonasiko, soni ŵandu ŵajinji akwendamo.”

•   Jikusapikanika chenene. Baibulo jegopoleledwe chenene jikusasosekwa kuti jiŵeje jangasawusya kuŵalanga soni jakupikanika chenene. Aganichisye yayili pa Mateyu 5:3, Yesu pakuŵecheta jwakamulichisye masengo maloŵe gele kugagopolela mwagaŵelele mpaka gagopolele kuti, “ŵana upile ŵandu ŵakulaga mmitima mwawo mu usimu.” Pakuti maloŵega mpaka gaŵe gakusawusya kugapikanichisya mu Chingelesi cha masiku agano, Baibulo ja Dziko Latsopano jagopolele maloŵega mulitala lyakuti ŵandu pakuŵalanga apikaneje mwangasawusya. Jikusasala kuti “Ŵana upile ŵandu ŵakusamanyilila yakusosecela yawo yausimu.”

 Konjechesya pakamulichisya masengo lina lya Mlungu, kugopoleledwa mwakulondola soni kuti jili jakupikanika chenene, Baibulo ja Dziko Latsopano jikwetesoni umbone wine. Umbone wakwe uli wakuti, Baibuloji mundu mpaka ajipate mwakupeleka mbiya syampaka akombole. Yakuyichisya yakwe yili yakuti ŵandu mamiliyoni gejinji akusaŵalanga Baibuloji m’chiŵecheto chawo. Atamose kwa ŵandu ŵele yikaliji yakusawusya kuti ajipate Baibuloji.