Ajawule pa ndandanda

Baibulo Jegopoleledwe mu Chiŵecheto Chakuŵecheta Ŵandu Masiku Agano

Kopoka kwa Baibulo ja Chilambo Chasambano ja Malemba Gachigiliki

Baibulo Jegopoleledwe mu Chiŵecheto Chakuŵecheta Ŵandu Masiku Agano

Mundu jwine jwamlijiganye mnope lina lyakwe Alan S Duthie, jwalembile mu buku jakwe kuti: “Naga akusakulupililaga kuti Baibulo jili maloŵe ga Mlungu gakwawula kwa ŵandu, nikuti Mlungujo akusaŵaga ali mkuŵechetana ni m’weji. . . . Naga dini jikusakwayaga yakutendekwa yosope yapaumi wawo, nikuti nombe najo Baibulo jikusosekwa jigopoleledwe muchiŵecheto chakusaŵecheta ŵandu lisiku lililyose.”—Bible Translations and How to Choose Between Them.

Ŵandu ŵakusanonyelaga Maloŵe ga Mlungu akusajitichisya maloŵega ni mtima wawo wosope. Jemanjaji ngakusakayichila ata panandi kuti: “Malemba gosope galembedwe mwakulongoleledwa ni Mlungu, soni gali gakamuchisya pakwiganya, pakwamuka, pakongola yangalondeka, soni pakamuchisya kuti tutendeje yakuŵajilwa.” (2 Timoteyo 3:16) Atamose kuti Baibulo jalembedwe kalakala, nambope maloŵe gakwe gali “gaumi soni gamachili.” Soni mpaka jitukamuchisye kumalana ni yakusawusya ya paumi wetu. (Ahebeli 4:12) Buku ja Mlunguji kuti jiŵe jakupikanika soni kuti ŵandu akomboleje kukamulichisya masengo mfundo syakwe, nikuti jikusosekwa jigopoleledwe m’chiŵecheto chakusaŵecheta ŵandu lisiku lililyose. Chakulinga chakwe chili chakuti atamose ŵandu ŵangalijiganya mnope ajipikanichisyeje.

Ŵandu ŵakusaganonyela Maloŵe ga Mlungu ali ŵakusangalala ni kopoka kwa Baibulo ja Chilambo Chasambano ja Malemba Gachigiliki mu Chiyao. Ŵa Mboni sya Yehofa ni ŵakopwesye Baibulo jegopoleledwe mu chiŵecheto chakuŵecheta ŵandu masiku agano pa Epulo 24, 2022. Baibuloji jigopoleledwe mwakupikanika chenene soni mwakulondola. Yayitendekasisye kuti ŵandu awupikaneje chenene utenga wa Mlungu kupundana ni kalakose mu chiŵecheto cha Chiyao. Nambo mwine mpaka awusye kuti, ana ŵani ŵagopolele Baibulo jakupikanika cheneneji?

Ŵagopolela Ŵaŵamchimbichisye Mlungu

Atamose kuti Baibulo ja Chilambo Chasambano ja Malemba Gachigiliki, jigambile kutanda kusimanikwa mu Chiyao, nambope jiŵele jili jipali m’Chingelesi kutandila m’chaka cha 1950. Pandaŵijo, bungwe ja Watch Tower Bible and Tract Society ni jijakopwesye Baibuloji m’Chingelesi. Bungweji jiŵele jili mkuwandisya ma Baibulo kwandaŵi jelewu. Sanja ja Mlonda ja Sepitemba 15 1950, jasasile kuti, “Ŵandu ŵa mu komiti jagopolela Baibuloji ŵalolechesye kuti . . . akamanyika soni kuti mena gawo gakawandisidwa, kanga pali ni umi kapena panyuma pa chiwa chawo. Chakulinga cha Baibuloji chili kwakamuchisya ŵandu kuti aliwoneje lina lya Mlungu kuŵa lyakusosekwa mnope.”

Baibulo ja Chilambo Chasambano ja Malemba Geswela jakopweche josope mu 1961. Atamose kuti mena ga ŵagopolelaŵa gangamanyika mpaka apano, yeleyi yangatutendekasya kuti tukayichileje yakulinga yawo soni kulupichika kwawo. Maloŵe gakundanda kwa Baibulo jajakopweche mu 2013 gatite: “Pakumanyilila kusosekwa kwa utenga wa m’Baibulo, tuyiweni kuti yili yakusosekwa kulinganyasoni maloŵe gane ga m’Baibulo pakulosya kuti tukusachimbichisya utenga wakwe. Myoyo tukuyiwona kuti tukwete udindo wekulungwa wakugopolela utenga wa m’Baibulo mwakulondola. . . . Chakulinga chetu ngaŵape kwamba kugopolela mwakuya mnope muŵaŵechetelaga yiŵecheto yandanda, nambo kulolechesyasoni kuti tugopolele yindu yakupikanika soni yangasawusya kuŵalanga.”

Ma Baibulo ga Chilambo Chasambano chinga josope kapena mbali jakwe gakopweche gakupunda 245 miliyoni. Nambosoni ma Baibuloga gakopweche mu yiŵecheto yakwana 221. Nambo, ana ŵandu ŵajinji ŵakusaŵalanga Baibuloji apatile yindu yamtuli?

Baibulo jajikusachimbichisya lina lya Mlungu?

Yesu ŵajiganyisye ŵakulijiganya ŵakwe kuti apopoleje kuti: “Atati ŵetu ŵakwinani, lina lyawo lichimbichikwe.” (Mateyu 6:9) Baibulo jikusatukamuchisya kumanyilila lina lisyesyene lya Mlungu lyalili Yehofa. Linali likusasimanikwa malo chiŵandika 7,000 m’Baibulo. (Ekisodo 3:15; Salimo 83:18, NWT) Ŵandumetume ŵa Yesu ali awile, mpingo wa Chiklistu wakwete nganisyo syakulemwecheka siŵakwete Ayuda syakuŵambala kamulichisya masengo lina lya Mlungu. (Masengo 20:29, 30; 1 Timoteyo 4:1) Mwamti ŵaŵakopelaga mbali ja Malemba ga Chigiliki ŵatyosyagamo lina lisyesyene lya Mlungu lyakuti Yehofa nikuŵikagamo lina lyakuti “Mlungu” kapena “Ambuje.”

Baibulo ja Chilambo Chasambano jikusijakamuchisya ŵandu ŵajinji kuti anonyeleje kuŵalanga Baibulo soni kumanyilila lina lya Mlungu m’chiŵecheto chawo

Komiti Jagopolela Baibulo ja Chilambo Chasambano jawuchisye lina lya Yehofa mu Malemba ga Chigiliki ga Chiklistu. * Mwamti linali likusasimanikwa malo gakwana 237. Komiti jagopolelaji ngaŵa kuti jawuchisye linali pakwamba kusaka kola linali, nambo paliji pana magongo gakupikanika soni ŵalijiganyisye mwakusamala ya nganiji. Mwachisyasyo, lilemba lya Luka 4:18 maloŵe gakwe ŵagajigele pa Yesaya 61:1. Malemba gandanda ga Chihebeli, lina lya Yehofa lyasimanikwaga pa fesi jatusasileji. Myoyo ni ligongo lyakwe mu Baibulo ja Chilambo Chasambano, lilemba lya Luka 4:18 lyagopoleledwe chamti myi: “Msimu wa Yehofa uli pa une. Jwalakwe ŵasagwile une kuti lalichile ngani syambone kwa ŵakulaga.”

Kagopolele keleka kakusikakamuchisya ŵakuŵalanga kuti akomboleje kulekanganya pasikati pa Yehofa ni mwanache jwakwe jwali Yesu Klistu. Mwachisyasyo, ma Baibulo gejinji gagopolele lilemba lya Mateyu 22:44 chamti myi: “Ambuje ŵasalile Ambuje ŵangu kuti.” (Buku Jeswela) Nambo ana Ambuje ŵakwasalila ajawo pelepa ali ŵani? Sonitu maloŵe ga pa lilembali ŵagajigele pa Salimo 110:1. Mwamti mu Malemba gandanda ga Chihebeli, pa lilembali pana lina lya Mlungu. Myoyo Baibulo ja Chilambo Chasambano jagopolele lilemba lya Mateyu 22:44 kuti: “Yehofa ŵasalile Ambuje ŵangu kuti.” Mwamti kulekangana kwakupali pasikati pa Yehofa Mlungu ni Mwanache jwakwe nganijiŵa ngani jakusisika jakusosekwa kujijawulila kusukulu. (Maliko 13:32; Yohane 8:17, 18; 14:28) Myoyo kuti tukupate umi wangamala, tukusosekwa kumanyilila chenene kulekangana kwakupali pasikati pa Mlungu ni Yesu. Ni ligongo lyakwe lilemba lya Masengo 2:21 likusati: “Jwalijose jwakuŵilanjila pa lina lya Yehofa chachikulupuka.”

Jegopoleledwe chenene soni jakupikanika chenene

Ŵagopolelaŵa ŵawungunyisye yindu mwakusamala mnope kuti agopolele chenene Maloŵe ga Mlungu. Jemanjaji ŵagopolelaga kutyochela ku Malemba gandanda ga Chigiliki. Ni ŵagagopolele mwakupikanika soni mu chiŵecheto chakusaŵecheta ŵandu masiku agano. Mwachisyasyo, ŵaŵagopolele Baibulo ja Chilambo Chasambano ŵalinjililesoni kugopolela maloŵe gane gakusawusya ga m’Chigiliki. Mu yiŵecheto yejinji masiku agano, maloŵe gane (msali) gakusasosekwa kugapwatikanya ni maloŵe gane pakusaka kulosya ndaŵi jayikutendekwa yindu. Ndaŵiji mpaka jiŵe jakalakala, jasampano, kapena jakusogolo. Nombe nacho Chigiliki chikwete maloŵe gakulosya ndaŵi jayikutendekwa yindu, kanga yikutendekwa kwandaŵi jamnono, yimasile kutendekwa, kapena yikupitilisya kutendekwa. Mwachisyasyo, alole maloŵe gaŵaŵechete Yesu pa Mateyu 6:33. Mu Chigiliki, maloŵe gakuti “kusosasosa” gakusalosyaga kuti chinducho ngachikutendekwa kamo nambo chikupitilila. Myoyo kagopolele ka Baibulo ja Chilambo Chasambano ka lilembali kakusatukamuchisya kupikanichisya chenene yaŵaŵechete Yesu. Lilembali lyagopoleledwe kuti: “Mpitilisye kusosasosa chandanda Uchimwene ni chilungamo chakwe, ni kaneko jwalakwe chachimpa jemanja yindu yine yosopeyi.” Yeleyi yikamulanasoni ni muŵagopolele lilemba lya Mateyu 7:7, lyalikusati: “Mpitilisye kuŵenda, ni chachimpa. Mpitilisye kusosasosa, ni chimchipata. Mpitilisye kugogoda, ni chachimwugulila.”—Aloma 1:32; 6:2; Agalatiya 5:15.

Kulolechesya kuti Maloŵe ga Mlungu gakusimanikwa pachilambo chosope chapasi

Kopoka kwa Baibulo ja Chilambo Chasambano ja Malemba Gachigiliki mu Chiyao, kugambile kuŵa kutanda, kusogoluku tuchikola upile wakola Baibulo josope. Ŵakuŵalanga ngakusosekwa kukayichila kuti Baibulo ja Chiyao jeleji, jichiŵa jegopoleledwe chenene soni jakupikanika chenene mpela mwajiŵelele ja Chingelesi.

Tukuŵecheta yeleyi ligongo lyakuti, Likuga Lyakulongolela lya Mboni sya Yehofa ni lyaliŵele lili mkulolela mwakusamala masengo gagopolelaga. Mwamti lyasagwile yakuti masengo gagopolelaga gakamulidweje ni kagulu ka ŵandu. (Misyungu 11:14) Sonitu tumagulutu, ŵatutamilikasisye pachilambo chosope chapasi. Myoyo pakusaka kuti tumagulutu tukamuleje chenene masengo, Dipatimenti jakamuchisya ŵagopolela ŵajitamilikasisye ku likulu lya Mboni sya Yehofa lya pachilambo chosope chapasi. Dipatimentiji jikusajangaga yiwusyo yakutyochela kwa ŵagopolela ŵala, soni kulolechesya kuti ma Baibulo ga Chilambo Chasambano ga m’yiŵecheto yakulekanganalekangana gaŵe gakulandana. Konjechesya pelepa ŵagopolela Baibuloŵa akusakamulichisya masengo pologalamu ja pa kompyuta jajikusijakamuchisya kukamula chenene masengo gawo. Mwachisyasyo, pologalamu jeleji jikusijakamuchisya ŵagopolela kumanyilila mugagopoleledwele mu Chingelesi, maloŵe galigose ga Chihebeli soni Chigiliki. Yeleyi yikusiyakamuchisya kuti nombe nawo asagule maloŵe gakuŵajilwa ga m’chiŵecheto chawo. Nambo, ngaŵa kuti akusagamba kudalila pologalamuji, pakusasosekwa ŵandu kuti masengo gagopolelaga gajende chenene. Atamose yili myoyo, nambope mapologalamu ga pakompyutaga gakamuchisye kuti magulu gagopolelaga, gagopoleleje Baibulo ja Chilambo Chasambano mwakuŵajilwa soni yakupikanika chenene.

Myoyo tukwalimbikasya kuti aŵalanje Baibulo ja Chilambo Chasambano ja Malemba Gachigiliki. Komboleka kuŵalanga Baibuloji pa webusayiti kapena pa pologalamu ja JW Laibulale, nambosoni mpaka apate Baibulo ja payala kutyochela ku mpingo wa Mboni sya Yehofa wa kumangwawoko. Panasoni yine yakusangalasya yayili m’Baibuloji. Mwachisyasyo, jili jakupikanika chenene soni jangasawusya kuŵalanga. Konjechesya pelepa kundanda kwa buku jilijose kwana mtwe wakuti Ngani Syasili M’bukuji. Mitweji chijakamuchisye kuti amanyilile mwakata yayili m’buku jilijose ja m’Baibulo soni kwakamuchisya kupata mwangasawusya malemba gane. Nambosoni Baibuloji jikwete mbali jakuti Kugopolela kwa Maloŵe Gane. Chakusosekwa mnope chili chakuti, pakuŵalanga Baibuloji ngasakayichila kuti akuŵalanga maloŵe ga Mlungu gegopoleledwe chenene mu chiŵecheto chakuŵecheta ŵandu masiku agano.

Yayili mu Baibulo ja Chilambo Chasambano

Ngani Syasili M’bukuji: Kundanda kwa buku jilijose ja m’Baibuloji kwana mtwe welewu. Chakulinga chakwe chili kwakamuchisya kupata mwangasawusya mafesi ga m’Baibulo.

Jegopoleledwe chenene: Ŵagopolelaŵa ŵawungunyisye yindu mwakusamala mnope kuti agopolele chenene Maloŵe ga Mlungu mu Chingelesi. Jemanjaji ŵagopolelaga kutyochela ku Malemba gandanda ga Chigiliki. Apano jigopoleledwesoni mu Chiyao chakupikanika chenene

Jangasawusya kuŵalanga: Mtundu wa yilembo yakamulichisye masengo pakugopolela Baibuloji uli wakamuchisya kuti akalagaga pakujiŵalanga

Ndime sipanganyidwe ni mafesi: Mafesi gakupanganya ndime. Yeleyi yili yakumkamuchisya jwakuŵalanga kuti akuyeje chenene nganisyo sya juŵalembile bukujo

Maloŵe gamwiŵanda: Gakusalosyaga kagopolele kane ka maloŵe, mugalembedwele maloŵego mu yiŵecheto yandanda soni kulondesya muyaŵelele yindu

Kapate ka maloŵe: Mu mbali jakuti “Maloŵe ga mu Baibulo Gakamuchisya Kupata Lilemba” chapate maloŵe gagalembedwe pakuya alifabeti ni chakulinga chakwakamuchisya kumanyilila kwagakusimanikwa maloŵego m’Baibulo

Kugopolela kwa Maloŵe Gane: Mbaliji jikusalondesya mwakata kagopolele ka maloŵe gejinji ga m’Baibulo.

^ Gakusamanyikwasoni kuti Malangano Gasambano.