Ana akumanyilila kuti dini syejinji siŵisile nganisyo syakwe pakupata mbiya, ngaŵaga pakwakamuchisya ŵandu kuti amlambileje Mlungu? Achimlongola ŵa dini akusiŵalipisyagasoni ŵandu naga achimlongolawo akamwile masengo gane mumpingomo. Konjechesya pelepa dinisi sikusasumisyagasoni yindu yakulekanganalekangana. Achimlongola ŵa dinisi akusapochelaga mbiya syejinji soni akusakolaga yipanje yejinji. Alole yisyasyo yakuyichisyayi:

•   Kuwungunya kwine kukulosya kuti mlongola jwine jwa dini ja Chikatolika, kwa yaka 13 jwakamulichisye masengo mbiya sya dini pakutenda hayala ndeje kwa maulendo 150. Jwalakwe jwatesilesoni mahayala galimoto syakudula mnope kwa maulendo 200. Jwakamulichisyesoni masengo mbiya syakwana madola 4, miliyoni pakulinganyichisya nyumba jakwe.

•   Jwakulalichila jwine ku Africa akusatendesyaga misongano ja dini jakwe ndaŵi ni katema. Mwamti ŵandu masawusande-masawusande akusapikanilaga ma ulaliki gakwe. Jwalakwe akwete chalichi chekulungwa mnope. Chalichichi chikusasumisyaga yindu yakulekanganalekangana mpela “mawuta gakusimonjesya,” matawelo soni malaja gelembe lina kapena chimanyilo cha dinijo. Msyene diniji ali jwamsichile mnope, nambo ŵakusasongana kukupikanila yakulalichila ya mlongolaju, ali ŵakulaga.

•   Dini siŵili sya Chibuda ku China, sikusamanyika kuti sili makampani gele chakulinga chakwe chili kupata mbiya. Dini jine jakumanyika mnope (Shaolin Temple) jikusatendaga malonda gakulekanganalekangana. Achimlongola ŵa diniji alisoni achakulungwakulungwa ŵakusalolelaga yamalondayo.

•   Makampani gane ku America gatandite kwatenda hayala ŵandu ŵakusapeleka misyungu pangani sya ulungu. Mwakamulana ni lipoti line, ŵakupeleka misyunguŵa akusatendekasyaga miyambo ja dini soni kwakamuchisya ŵamasengo ŵa mmakampaniga pangani sya dini.

 Ana akuyiwona kuti yili yakuŵajilwa kuti dini sitendeje ya malonda? Ana Mlungu akusapikana uli pakwamba ya ŵandu ŵakusasaka kupata yipanje mu lina lya dini?

 Mlungu jwangasakaga kuti ŵandu atendeje yamalonda mu lina lya dini. Baibulo jikusalosyaga kuti munyumamu, Mlungu nganiyimnonyelaga kwawona ŵambopesi ali mkwiganya ŵandu pakusaka kupata “malipilo.” (Mika 3:11) Sonitu Mlungu ŵajamwiche ŵandu ŵakutunduka ŵaŵatendaga yamalonda panyumba jakwe jakulambilila, ni kugatenda malogo kuŵa “mbanga jakuŵamo ŵachiswamba.”—Yelemiya 7:11.

 Nombe najo Yesu yamsakalisye paŵawawonaga ŵandu ali mkupata mbiya mu lina lya dini. Mundaŵi ja Yesu, achimlongola ŵa dini ŵapataga yipanje kutyochela kwa ŵamalonda ŵakutunduka. Achimlongola ŵa diniŵa, ni ŵaŵakundaga kuti ŵamalondawo ayicheje ku nyumba jakulambilila ku Yelusalemu kukutenda malonda gawo. Jemanjaji ŵalilaga masuku pa mtwe ŵandu ŵaŵasakaga kumlambila Mlungu yisyesyene. Ligongo lya yeleyi, Yesu mwakulimba mtima ŵatopwele ŵa malondaŵa pa nyumba jakulambililajo. Jwalakwe jwasalile kuti, “Akajitenda nyumba ja Atati ŵangu kuŵa malo ga malonda!”—Yohane 2:14-16.

 Yiŵatendaga Yesu pakumtumichila Mlungu, yalosisyesoni mwaŵajiwonelaga nganiji Atati ŵakwewo. (Yohane 8:28, 29) Jwalakwe nganiŵalipisyaga ŵandu mbiya paŵajiganyisye yakwamba Mlungu. Konjechesya pelepo nganiŵaŵendaga ŵandu kuti ampe chakupeleka patesile chakusimonjesya. Jwalakwe ŵalisisye ŵandu ŵasala, ŵaposisye ŵakulwala soni ŵajimwisye ŵandu kuchiwa. Nambo nganiŵalipisyaga ŵanduwo. Jwalakwe nganatendaga masengo gakwe gakumtumichila Mlungu pakusaka kulipatila. Pajatu jwalakwe nganakola atamose nyumba.—Luka 9:58.

 Yesu ŵasalile ŵakumkuya ŵakwe kuti akatumichilaga Mlungu pakusaka kupata mbiya. Jwalakwe jwatite, “Mwapochele mwalulele, myoyo kapelecheni soni mwalulele.” (Mateyu 10:8) Ŵakumkuya ŵa Yesu ŵandandaŵa, ŵaŵaŵele Aklistu, ŵapikanile maloŵega. Kwende tulole yisyasyo yakuyichisyayi:

•   Ndumetume Petulo, jwele pandaŵi jine ŵajendaga yalumo ni Yesu, mundu jwine lina lyakwe Simoni, ŵampele mbiya pakusaka kuti akole udindo soni machili mumpingo. Nambo Petulo ndaŵi jijojo ŵakanile mbiyasyo ni ŵamjamwiche Simoni kuti, ‘Mkajonasiche pampepe ni mbiya syenu. Ana m’mwe mkuganisya kuti mpaka mkombole kupata mtuka wa Mlungu pakupeleka mbiya?’—Masengo 8:18-20.

•   Nombe najo ndumetume Paulo jwajendaga madela gakulekanganalekangana pakumtumichila Mlungu. Atamose kuti jwalakwe jwakamulaga masengo gakwe mwakulimbichila m’mipingo ja Chiklistu, nambo yakusaka yakwe nganiyiŵa kulipatila mbiya. Jwalakwe yalumo ni Aklistu achimjakwe ‘nganatendaga malonda ni maloŵe ga Mlungu.’ (2 Akolinto 2:17) Mwamti jwalakwe jwasasile kuti, “Twakamulaga masengo chilo ni musi kuti tukamlagasya jwalijose jwa jemanja ndaŵi jitwaliji mkulalichila Ngani Syambone sya Mlungu.”—1 Atesalonika 2:9.

 Yili yisyene kuti Aklistu ŵandandaŵa ŵasosekwaga mbiya syakamulichisya masengo pakulalichila soni kuti akomboleje kwamuchisya ŵane. Nambo jemanjaji nganiŵalipisyaga ŵandu mbiya pa masengo gaŵakamulaga mumpingo. Mwakamulana ni malemba gagali pasipa, ŵandu ŵapelekaga mwakusaka kwawo:

•   2 Akolinto 8:12: “Naga mundu akusaka kupeleka, Mlungu akusapochela yele yakwete mundujo, soni ŵangamkanganichisya kuti apeleche yele yamkanakola.”

   Yeleyi yikugopolela kuti: Chakusosekwa mnope ngaŵa winji wa yindu yakupeleka mundu, nambo chakulinga chakupelechela yinduyo.

•   2 Akolinto 9:7: “Jwalijose apeleche mwakusachila mpela yiŵatite paganisya mu mtima mwakwe, ngaŵaga kwine alimkudandawulaga kapena kumkanganichisya, pakuti Mlungu akusanonyela mundu jwakupeleka mwakusangalala.”

   Yeleyi yikugopolela kuti: Mlungu jwangasakaga kuti ŵandu apelecheje yakupeleka mwakutenda kwakanganichisya. Jwalakwe akusasangalala naga mundu akupeleka mwakusaka kwakwe.

 Baibulo jikusasala mwangapita mumbali kuti Mlungu jwangajitichisya dini syosope. (Mateyu 7:21-23) Yakulochesya yine ya m’Baibulo, yikusalandanichisyaga dini syaunami ni lihule. Yeleyi yili myoyo ligongo lyakuti dinisi sikusakamulanaga ni maboma ni chakulinga chakuti sipateje mbiya soni yindu yine yejinji. Sikusatendaga yeleyi kwineku ni kwakalamuchilaga ŵandu ŵawo. (Chiwunukuko 17:1-3; 18:3) Yakulochesya ya m’Baibulo yeleyi, yikusalosyasoni kuti Mlungu pachangakaŵapa chasijamuche dini syaunami.—Chiwunukuko 17:15-17; 18:7.

 Nambo pandaŵi ajino, Mlungu ngakusaka kuti yitendo yakusakala yayikutendekwa mu dini syaunami yasokonasye ŵandu soni yalepelekasye kummanyilila jwalakwe. (Mateyu 24:11, 12) Jwalakwe akwaŵenda ŵandu ŵambone kuti alijiganye yampaka atende kuti amtumichileje mwakuŵajilwa soni kuti akopoche mu dini syaunami.—2 Akolinto 6:16, 17.