Ana pakwete paliwusisye yiwusyo mpela yeleyi? Naga yili m’yoyo nganaŵa jika. Ŵandu ŵajinji pacilambo cosope akusaliwusyasoni yiwusyo yakusosekwayi. Ana mpaka apate kwanga kwakwe?

Ŵandu ŵajinji mpaka ajanje kuti, “Elo!” Ligongo cici? Ligongo lyakuti apatile kwanga kwakamula mtima kwa yiwusyo yeleyi kutyocela m’Baibulo. Ana akusaka kumanyilila yajikusasala Baibulo panganisi? Mpaka apate kwanga kwa yiwusyoyi naga akunda kulijiganya Baibulo kwalulele ni ŵa Mboni sya Yehofa. *

Kusala yisyene, patukusaka kutagulilana ni ŵandu ngani sya m’Baibulo, ŵandu akusaŵeceta yakulekanganalekangana. Ŵane akusati, “Yindupile mnope.” Ŵane akusati, “Baibulo jili jakusawusya kujipikanicisya.” Ŵanesoni akusati, “Yindu yeleyi mpaka yisokonasye yangusakulupilila.” Nambo ŵandu ŵane akusajiwona nganiji mwakulekangana. Jemanjaji akusakunda kulijiganya Baibulo. Kwende tulole yisyasyo yamnono ya ŵandu ŵeleŵa:

• “Najawulaga ku dini ja Cikatolika, ja Cipulotesitanti, ja Cisikhi, ja Cibuda, soni natesile majiganyo gapenani gakwayana ni dini. Atamose yaliji m’yoyo yiwusyo yangu yejinji yakwamba Mlungu nganiyijanjidwa. Nambo paŵayice jwa Mboni sya Yehofa kumangwetu, naliji jwakusangalala ligongo lyakuti ŵajanjile yiwusyo yangu pakamulicisya masengo Baibulo, kaneko nakundile lijiganyo lya Baibulo.”—Gill, England.

• “Nakwete yiwusyo yejinji yakwayana ni umi, nambo acimlongola ŵa dini jangu ngananjangaga mwakamula mtima. Nambo paŵayice jwa Mboni sya Yehofa ŵanjanjile yiwusyo yangu pakamulicisya masengo Baibulope. Paŵambusisye naga ngusaka kulijiganya yejinji, nakundile.”—Koffi, Benin.

• “Nasakaga kumanyilila yayikusatendekwa mundu pawile. Nakulupililaga kuti mundu jwawile mpaka awulasye ŵandu ŵacijumi, nambo nasakaga kumanyilila yajikusasala Baibulo panganiji. M’yoyo, mjangu jwine jwa Mboni ŵatandite kunjiganya Baibulo.”—José, Brazil.

• “Nalingagalingaga kuŵalanga Baibulo nambo nganinajipikanicisyaga. Kaneko paŵayice ŵa Mboni sya Yehofa, ŵandagulile mwakupikanika cenene yakulocesya yine ya m’Baibulo. Nasacililaga kulijiganya yejinji.”—Dennize, Mexico.

• “Nakayicilaga naga Mlungu akusasamala ya une. M’yoyo, najipopelele nganiji kwa Mlungu jwali msyene Baibulo. Lisiku lyakuyicisya ŵa Mboni paŵayice kumangwetu, nakundile kuti anjiganyeje Baibulo.”—Anju, Nepal.

Yakutendekwa yeleyi yikutukumbusya maloŵe ga Yesu gakuti, “Ŵana upile ŵandu ŵakulaga m’mitima mwawo mu usimu.” (Matayo 5:3) Mwacipago, ŵandu akusasacilila kummanyilila Mlungu. Nambo Mlungu msyene ni jwampaka ŵakamucisye ŵandu, soni akusatenda yeleyi kupitila m’Maloŵe gakwe, Baibulo.

Sano, ana lijiganyo lya Baibulo likusatendekwa catuli? Ana wawojo mpaka lyakamucisye catuli? Ngani jakuyicisya cijijanje yiwusyo yeleyi.