Yiwusyo Yakutyochela kwa Ŵakuŵalanga
Ana “jwamkongwe” jwakusamkolanga pa Yesaya 60:1 ali ŵani, soni ana jwalakwe ‘akwimuka ni kutanda kuŵala’ chamti uli?
Mwakamulana ni Baibulo ja Chilambo Chasambano, pa Yesaya 60:1 tukusaŵalanga kuti: “Mjimuche mmwe ŵakongwe! Mlosye kuŵala kwenu, ligongo lilanguka lyenu liyiche. Uchimbichimbi wa Yehofa umyichile.” Nganiji jikusalosya kuti jwamkongweju jwaliji Siyoni, kapena kuti Yelusalemu lyalyaliji likulu lya msinda wa Yuda pandaŵijo. a (Yes. 60:14; 62:1, 2) Msindawu wajimilaga mtundu wosope wa Ayisalayeli. Nambo maloŵe ga Yesayaga gakusayikasya yiwusyo yiŵili: Chandanda, ana Yelusalemu jwajimwiche chakachi nikutanda kulosya kuŵala kwausimu, soni yeleyi yatendekwe chamti uli? Chaŵili, ana maloŵe ga Yesayaga gakukwanilichikwa mnope masiku getu gano?
Ana Yelusalemu jwajimwiche chakachi nikutanda kulosya kuŵala kwausimu, soni yeleyi yatendekwe chamti uli? Msinda wa Yelusalemu pampepe ni Nyumba ja Mlungu yajonasiche pandaŵi jele Ayuda ŵaliji ku ukapolo ku Babulo kwa yaka 70. Nambo kaneko, Amedi ni Apelesi ali awugomeche msinda wa Babulo, Ayisalayeli ŵaŵaliji pasi pa ulamusi wa Babulo ŵakwete ufulu wakuwujila kumangwawo kuti akatandilesoni kumtumichila Yehofa. (Esa. 1:1-4) Myoyo, kutandila mu 537 B.C.E., kagulu ka Ayisalayeli ŵakulupichika katandite kuwujila kumangwawo. (Yes. 60:4) Jemanjaji ŵatandite kupeleka mbopesi kwa Yehofa, kutenda yisangalalo, nambosoni kulinganya nyumba ja Mlungu. (Esa. 3:1-4, 7-11; 6:16-22) Yeleyi, yatendekasisye kuti uchimbichimbi wa Yehofa utandilesoni kuŵala pa ŵandu ŵa Mlungu ku Yelusalemu. Mwamti jemanjaji, ŵaŵele lilanguka ku mtundu wosopewo, wawaliji m’chipi chausimu.
Nambope, yakulochesya ya Yesaya yakwamba kuwuchisyasoni yagambile kukwanilichikwa panandi ku Yelusalemu jwakala. Mwamti Ayisalayeli wosope nganapitilisya kumpikanila Mlungu. (Neh. 13:27; Mala. 1:6-8; 2:13, 14; Mat. 15:7-9) Kaneko, jemanjaji ŵayikene pakumkana Mesiya, juŵaliji Yesu Klistu. (Mat. 27:1, 2) Mu 70 C.E., msinda wa Yelusalemu soni nyumba ja Mlungu yajonanjidwesoni.
Yehofa jwaliji ali asasile kala ya konanjidwa kweleku. (Dan. 9:24-27) Mwamti yikuwoneka kuti nganichiŵa chakulinga cha Yehofa kuti yakulochesya yosope yakwamba kuwuchisyasoni yayikusasimanikwa m’buku ja Yesaya chaputala 60 yikwanilichikwe pa Yelusalemu jwa pachilambopa.
Ana maloŵe ga Yesayaga gakukwanilichikwa mnope masiku getu gano? Elo, nambo pambali ja jwamkongwe jwine jwakuwanichisya jwali “Yelusalemu jwakwinani.” Pakwamba ya Yelusalemu jweleju, ndumetume Paulo jwalembile kuti: “Jwalakwejo ali mama ŵetu.” (Agal. 4:26) Yelusalemu jwakwinani juli mbali ja gulu ja Mlungu jakwinani jajipanganyidwe ni yakupanganyikwa yausimu yakulupichika. Gulu jeleji jikwete ŵanache ŵakupwatikapo Yesu soni ŵasagulwe ŵakwana 144,000 ŵakwete chembecheyo chakutama kwinani mpela chiŵakwete Paulo. Mwamti jemanjaji akusapanganya “mtundu weswela” wawuli “Yisalayeli jwa Mlungu.”—1 Pet. 2:9; Agal. 6:16.
Ana Yelusalemu jwakwinani jwajimwiche soni kutanda kuŵala chamti uli? Jwatesile yeleyi kupitila mwa ŵanache ŵakwe ŵasagulwe ŵapachilambopa. Ana yaŵasimene nayo jemanjaji yikusakamulana chamti uli ni yakulochesya yayikusasimanikwa m’buku ja Yesaya chaputala 60?
Aklistu ŵasagulwe ŵasosekwaga ‘kwimuka’ ligongo lyakuti ŵaliji mu chipi chausimu pakuŵa pandaŵijo yijiganyo yaunami yawandile mnope panyuma pakuti ŵandumetume wosope awile. (Mat. 13:37-43) Yeleyi yatendekasisye kuti jemanjaji aŵe pasi pa Babulo Jwamkulungwa wawuli ulamusi wa pachilambo chosope wa dini jaunami. Mwamti ŵasagulweŵa ŵaŵelepe pa ukapolo mpaka “pambesi pa ndaŵi ajino,” ndaŵi jajatandite mu 1914. (Mat. 13:39, 40) Kaneko pali pagambile kupita kandaŵi kamnono, jemanjaji ŵagopweche ku ukapolowu, mwamti ndaŵi jijojo ŵatandite kulosya kuŵala kwausimu mwakukamula masengo gakulalichila. b Kwa yaka yejinji, ŵandu ŵakutyochela m’mitundu josope aŵele ali mkwinjila mu kuŵala kweleku kupwatikapo ŵandu ŵane ŵaŵasigalile ŵali mu Yisalayeli jwa Mlungu. Jemanjaji ali “ayimwene” ŵakusiŵakolanga pa Yesaya 60:3.—Chiw. 5:9, 10.
Kusogoloku, Aklistu ŵasagulweŵa chachilosya kuŵala kwa Yehofa mu litala lyekulungwa mnope. Ana yeleyi yichitendekwa chamti uli? Jemanjaji pachachimalisya umi wawo wa pachilambo chapasi, chachiŵa mbali ja “Yelusalemu Jwasambano” kapena kuti jwamkongwe jwa Klistu jwali achayimwene soni ŵambopesi ŵakwana 144,000.—Chiw. 14:1; 21:1, 2, 24; 22:3-5.
Yelusalemu Jwasambanoju chachijigala mbali jakusosekwa mnope pakukwanilichikwa kwa lilemba lya Yesaya 60:1. (Alole kamulana kwakupali pasikati pa lilemba lya Yesaya 60:1, 3, 5, 11, 19, 20 ni Chiwunukuko 21:2, 9-11, 22-26.) Mpela muyaŵelele kuti msinda usyesyene wa Yelusalemu waliji likulu lya boma mundaŵi ja Ayisalayeli, nombe Yelusalemu Jwasambano pampepe ni Klistu chachiŵa boma m’chilambo chasambano. Ana Yelusalemu Jwasambano chachituluka chamti uli “kutyochela kwinani kwa Mlungu”? Yeleyi yichitendekwa mwakutenda yindu yele yichikwaya chilambo chapasi. Mwamti mitundu josope ja ŵandu ŵakusamjogopa Mlungu “jichijenda m’lilanguka lya mumsindawo.” Jemanjaji chachigopoledwa ku ulemwa soni chiwa. (Chiw. 21:3, 4, 24) Yakuyichisya yakwe yichiŵa ‘kuwuchisyasoni yindu yosope,’ mpela mwayaŵechetele yakulochesya ya Yesaya soni yakulochesya yine. (Mase. 3:21) Kuwuchisya kwekulungwa kweleku kwatandite pandaŵi jele Klistu jwaŵele Mwenye soni kuchimala chakumbesi kwa Ulamusi wakwe wa Yaka 1000.
a Mu Baibulo ja Chilambo Chasambano, pa Yesaya 60:1 ŵakamulichisye masengo maloŵe gakuti “jwamkongwe” mmalo mwa maloŵe gakuti “Siyoni,” kapena “Yelusalemu.” Ŵatesile yeleyi ligongo lyakuti maloŵe ga Chihebeli gakuti ‘kwimuka’ soni gakuti “kuŵala” gakusapikanika mpela kuti gakuŵecheta ya mundu.
b Kuwuchisyasoni kwa kulambila kusyesyene kukwatendekwe mu 1919 ŵakulondesisyesoni pa Esekiele 37:1-14 soni pa Chiwunukuko 11:7-12. Esekiele jwasasile ya kuwuchisya kwausimu kwa Aklistu wosope ŵasagulwe panyuma pakuŵa mu ukapolo kwa yaka yejinji. Yakulochesya yayikusasimanikwa m’buku ja Chiwunukuko yikusasala ya kupagwasoni mwausimu kwa kagulu kamwana ka abale ŵasagulwe ŵaŵalongolelaga mu gulu panyuma pakutendeledwa yindu yangali chilungamo mwakwawugalila mundende. Mu 1919, jemanjaji ŵasagulidwe ni kuŵa “kapolo jwakulupichika ni jwalunda.”—Mat. 24:45; alole buku ja Chisungu ja Pure Worship of Jehovah—Restored At Last!, p. 118.
