Mlongo jwine jwa yaka ya m’ma 30 lina lyakwe RENEÉ, ŵakulile m’liŵasa lya Mboni lyakulipeleka mnope mu undumetume ku Australia. Mlongoju ŵatite, “Ndaŵi syejinji twasamilaga m’mikuli jakusosecela ŵakulalicila ŵajinji. Baba ni Mama ŵatendaga yindu yakuti tusangalaleje. Panakwete ŵanace ŵaŵili, nasakaga kuti nombe nawo aŵe ni umi wakusangalala.”

 Shane ŵamkwakwe Reneé, ŵa yaka ya m’ma 30 ŵakwetesoni yakulinga yakulandana ni ya Reneé. Jwalakwe ŵatite, “Mwanace jwetu jwaŵili ali apagwile, twaŵalasile mu Sanja ja Mlonda ya liŵasa line lyakwe lya Mboni lyalyajawile paliboti lyawo ku yilumba yine yakolanjikwa kuti Tonga. * Ngani jelejo jatutendekasisye kuti tulembele yikalata ku ofesi ja nyambi ja Mboni sya Yehofa ja ku Australia ni ja ku New Zealand yakuwusya ya m’mikuli mwamukusosecela ŵakulalicila ŵajinji. * Ŵatujanjile kuti tujawule ku yilumba ya Tonga yatwaŵalasile mu Sanja ja Mlonda jila.”

Shane ni Reneé, soni ŵanace ŵawo ŵaŵili, Jacob ni Skye, ali atemi pacilumba ca Tonga kwa caka cimo, pacilumbapo patandite kutendekwa yanjojo yayatendekasisye kuti liŵasali liwujile kumangakwe ku Australia. Nambope nganilicenga cakulinga cakwe. Mu 2011 jemanjaji ŵasamile ku kacilumba ka Norfolk kakali palutando lya makilomita ciŵandika 1,500 cakungopoko lyuŵa kwa cilambo ca Australia. Ana kusamaku kwakamucisye catuli? Jacob jwakwete yaka 14 ŵatite, “Yehofa nganagambaga kutulolelape, nambo ŵatendekasyaga kuti undumetume wetu uŵeje wakusangalasya mnope.”

Mpela muŵatendele Shane, Reneé ni ŵanace ŵawo, maŵasa ganesoni gamboni galipelece kuti gakatumicile ku “mikuli jajikusosekwa ŵakulalicila ŵajinji.” Ana cici cicatendekasisye jemanjaji kusama?

Burnett ni Simone, liŵasa lya yaka ya m’ma 30, soni ŵanace ŵawo ŵacalume, mena gawo Eston ni Caleb, ŵa yaka 12 ni 9 ŵasamile ku tawuni ja Burketown mu msinda wa Queensland, ku Australia. Burnett ŵatite, “Mboni siŵele sili mkulalicila kweleko kwa yaka yitatu kapena mcecepe. Ŵandu ŵajinji ŵatendaga lung’wanu mnope ni ngani syambone. Tusacileje kwapa lipesa jemanjajo kuti alijiganyeje Baibulo mwakutamilicika.”

Mark ni Karen, liŵasa lya yaka ya m’ma 50 pampepe ni ŵanace ŵawo ŵatatu Jessica, Jim, ni Jack ŵatumicile m’mipingo jejinji ciŵandika msinda wa Sydney ku Australia mkanilisamile mu mkuli wa Nhulunbuy kumpoto kwa Australia. Mark ŵatite, “Ngusanonyela ŵandu ni sacileje kuja kutama ku mpingo soni ku mkuli wakusoŵa.” Nambo Karen ŵanyinyitikaga ni kusama. Jwalakwe ŵatite, “Ŵamkwangu ni ŵandu ŵane ali alimbikasisye nasakaga kuti ngambe kulinga. Apano ndili jwakusangalala ligongo lyakuti nakombwele kusama.”

Mu 2011, Benjamin ni Carolyn, pampepe ni ŵanace ŵawo ŵacakongwe, Jade ni Bria ŵatyosile mu msinda wa Queensland ku Australia ni ŵawujile ku Timor-Leste, cilambo camwana cacili pa cilumba ca Timor ku Indonesia. Ben ŵatite, “Carolyn ni une kundanda twatumicilaga m’cilambo ca Timor-Leste mpela Apayiniya ŵapajika. Twasangalalaga mnope kulalicila kumaloku, soni abale ŵatukamucisyaga mnope. Twadandawile mnope patwatyokaga. Twasacililaga tuli tuwujile. Patwakwete ŵanace twajimicile kaje yakulinga yatwakwete nambo nganituyicenga.” Carolyn ŵajonjecesye kuti, “Tusacileje kuti ŵanace ŵetu akunguluceje ni amishonale, ŵakutumicila pa Beteli ni apayiniya ŵapajika kuti alijiganyeje yindu yejinji yakusasimana nayo.”

Yesu ŵasalile ŵakumkuya ŵakwe kuti, “Nduni mwa jemanja jwakusaka kutaŵa sanja jwangatama kaje pasi ni kuŵalanjila mbiya sacajonanje?” (Luka 14:28) M’yoyo, liŵasa palikuganicisya yakusamila ku mkuli wine, likusosekwa kosecela cenene. Ana likusosekwa ganicisya yindu yapi?

USIMU: Ben ŵatite, “Tusacileje kwatumicila ŵane ngaŵa kwapa masengo gakuti atusamalileje. Mkanitusame twalolecesyaga kuti tuli ŵakulimba mwausimu. Nambosoni, twalalicilaga mnope soni kamula masengo gane ga mu mpingo.”

Jacob jwatumsasile kundanda jula ŵatite, “Mkanitusamile ku kacilumba ka Norfolk twaŵalasile mu Sanja ja Mlonda ni Galamukani yakwamba mbili sya maŵasa gagatumicile ku mkuli kwakusosekwa ŵakulalicila ŵajinji. Tuli tuŵalasile nganisi twatagulilene ya yakusawusya yaŵasimanaga nawo soni mwaŵasamalilaga Yehofa.” Mlumbugwe Jacob lina lyakwe Skye jwa yaka 11 ŵajonjecesye kuti, “Napopelaga mnope kwa Yehofa pajika, atamosesoni pandili ni Mama soni Baba.”

KOSECELESYA NGANISYO: Reneé ŵatite, “Ligongo lyakuti twatamaga ciŵandika ni ŵacinasi ŵetu, acimjetu soni mu mkuli wunawunonyelaga mnope, kwaliji kwangasawusya  kwambaga kutama kukoko. Myoyo, mmalo mwakuganicisya ya yindu yacinjiyileka, naganicisye mnope mwampaka kusama kwetu kukamucisye liŵasa lyetu.”

NDAMO: Maŵasa gejinji gakusawungunya pakusaka kumanyilila ndamo sya kumalo kwakusaka kusamilako. Mark ŵatite, “Twaŵalangaga mnope ya ndamo sya ŵandu ŵa ku Nhulunbuy. Abale ŵakweleko ŵatutumicisaga nyusipepala jajatupaga ciwulili ca ŵandu ŵakumaloko soni yakwamba ndamo syawo.”

Shane juŵasamile ku kacilumba ka Norfolk ŵajonjecesye kuti, “Kupunda yosope nalingagalingaga kuti losyeje ndamo syambone syaciklistu. Namanyililaga kuti naga nguŵa jwakulitimalika, jwakulupicika, soni jwakulimbicila masengo mpaka ngombolece kutumicila kulikose.”

Kuti yikombolece kuja kutumicila ku mkuli kwakukusosekwa “ŵakulalicila ŵajinji,” yikusasosekwa kuŵa mundu jwakundilila soni kuŵa jwaganisya cenene pawukusimana ni yakusawusya yangayijembeceya. Kwende tulole yisyasyo yine.

Reneé ŵatite, “Nalijiganyisye matala gakulekanganalekangana gakutendela yindu. Mwambone, naga panyasa pana cimbungo, sitima jangakomboleka kupita. Pandaŵi jeleji kwakusumicisya yindu kukusasoŵa, yayikusatendekasya kuti yindu yikatale mnope. M’yoyo, pakulinganya yakulya nalijiganyisye kamulicisya masengo yindu mwalunda. Ŵamkwakwe Shane ŵajonjecesye kuti, “Twacenjilesoni kakamulicisye masengo ka mbiya syetu.”

Jacob jwali mwanace jwa Shane ni Reneé, ŵasasilesoni cakusawusya cine. Jwalakwe ŵatite, “Mu mpingo wetu wasambano mwapali ŵandu 7, nambo acakulungwape. M’yoyo nganingola mjangu jwa msingu wangu, nambo panalalicilaga ni acakulungwawo ŵatandite kuŵa acimjangu.”

Jim jwa yaka 21 ŵasimenesoni ni cakusawusya mpela celeci. Jwalakwe ŵatite, “Mpingo watwaŵandicile waliji palutando lwa makilomita 725. Pakuŵa twatamaga kwakutalicila twawuwonaga kuŵa upile kwawula ku misongano jaupande soni jamkuli ni cakulinga cakuti tukakunguluce ni abale ni alongo. M’yoyo twajawulaga ndaŵi jambone. Twayiwonaga kuti ndaŵi jeleji jaliji jakusangalasya mnope kwa m’weji.”

Baibulo jikusasala kuti, “Majali ga Yehofa gakusasicilisya.” (Miy. 10:22) Pa cilambo cosope, ŵandu ŵajinji ŵakutumicila kumikuli jajikusosekwa ŵakulalicila ŵajinji sambano akusangalala ni majali ga Yehofaga.

Mark ŵatite, “Kusama kwetu kwakwete yakuyicisya yambone mnope kwa ŵanace ŵetu. Ŵanace ŵetu ŵacikulile akwete cikulupi cakuti Yehofa akusiŵasamalila ŵandu ŵakusaŵika Ucimwene pa malo gandanda. Cikulupi celeci nganiciŵa ucisumile.”

Shane ŵatite, “Ngusanonyela mnope ŵamkwangu soni ŵanace ŵangu. Jemanjaji pakusala yindu yaŵatendele Yehofa, ngusalipikana kuŵa jwakwikutila mnope.” Jacob jwali mwanace jwawo, ŵajiticisye kuti, “Nguyamicila kuti twakwete ndaŵi mpela jeleji. Twatesile cenene kwika akuno.”