Lisiku lililyose ŵandu ŵajinji akusalajilila kuti apate yindu yakusosekwa paumi. Chakutesya chanasa chili chakuti, yindu yakusakala yayikutendekwa pachilambopa yikutendekasya kuti yiŵeje yakusawusya mnope kwa ŵandu kupata yindu yakusosekwayi. Ligongo chichi?

• Naga ŵandu akusimana ni yakusawusya mudela jinejakwe, yikusatendekasya kuti yindu mpela malo gakutama soni yakulya yiduleje.

• Yakusawusyayi mpaka yitendekasye kuti ŵandu masengo gamalile kapenasoni kwatendekasya kukamulaga masengo gejinji nambo ga mbiya syamnono.

• Ngosi mpaka sijonanje malo gakusatendela ŵandu mabisinesi, nyumba syawo kapena yindu yawo yine. Yeleyi mpaka yitendekasye kuti ŵandu ŵajinji aŵe pausawuchi.

• Naga akusakamulichisya masengo mbiya mwalunda, yichakamuchisya mnope pachachisimana ni yakusawusya.

• Akumbuchileje kuti mbiya syakwete, syaŵasunjile soni yindu yawo mpaka yimale machili.

• Pana yindu yine yele nganituŵa tusumile ni mbiya. Yindu yakwe yili mpela kuŵa ŵakusangalala soni kuŵa ŵakamulana mwiŵasa.

Baibulo jikusati: “Naga tukwete yakulya ni yakuwala yeleyi yitukwanile.”—1 Timoteo 6:8.

Kuŵa ŵakwikutila kukusapwatikapo kuliŵichila malile payindu yatukusasakaga soni kuŵa ŵakusangalala ni yindu yatukusapata lisiku lililyose. Yeleyi yili yakamuchisya mnope naga tukwete mbiya syamnono.

Kuti ajikutileje ni yindu yakwete akusosekwa kunandiya yindu yakusasuma. Naga akusasuma yindu yangakamulana ni mbiya syakwete nikuti mpaka asimene ni yakusawusya.