Napagwile mumsinda wa Roma, kudela jaŵatamaga ŵandu ŵakulaga. Umi waliji wakusawusya mnope. Mayi ŵangu wakumbeleka nganinamanyililaga soni nganingamulanaga ni baba ŵangu. Panakulaga naliji mkulijiganya yampaka ndende kuti nalikamuchisyeje.

Panakwete yaka 10 natandite kwiŵa mwamti ndili ni yaka 12 natyosile panyumba. Ndaŵi syejinji nataŵidwaga, mwamti baba ŵangu ŵayikaga kukunjigala kupolisi kunjawusya kunyumba. Naliji mundu jwakusokonasya soni natamilaga kukangana ni ŵandu. Ndili ngwete yaka 14 natyosilesoni panyumba mwamti nganimbujilasoni. Natandite kumwa mitela jakusokonasya mtwe. Pandaŵiji nganingola malo gakutama mwamti nagambaga kwendajenda m’misewu. Ligongo lyakuti nasoŵaga pagona, natendaga yakuti njinjile m’magalimoto ga ŵandu kuti mbate malo gagona. Mwamti najimukaga kundaŵindaŵipe kupita mchisosa mesi gakuti sukusule.

Natandite kwiŵa yindu yakulekanganalekangana, mpela yikwama. Soni chilo najawulaga m’majumba ga ŵandu kuti ngajiŵe. Ŵandu wosope ŵamanyililaga kuti une ndili jwawiyi. Kaneko natandite kwenda ni gulu ja yigaŵenga. Yeleyi yandendekasisye kutanda kwiŵa m’ma banki. Ligongo lyakuti naliji mundu jwakusawusya mnope, ŵandu ŵa m’gulu ja yigaŵenga jila ŵatandite kunjimbichisya. Kulikose kunajendaga najigalaga uti mwamti pagona najiŵikaga kupilo. Natendaga ndamo syakusakala mpela chiwawa, kumwa mitela ja kusokonasya mtwe, wiyi, kutukana soni kutenda yachikululu. Ŵapolisi ŵaliji mkusosasosa. Ndaŵi syejinji naŵele mkutaŵidwa mwamti kwa yaka yejinji naŵele ndili mkutama kundende.

Lisiku line ndili ngopweche kundende, naganisisye yakwawula kukwalola mama ŵangu ŵanandi. Nganimanyililaga kuti mama ŵanguŵa soni ŵanache ŵawo ŵaŵili ŵaŵele ŵa Mboni sya Yehofa. Panayiche, ŵambendile kuti ngapikanile nawo misongano ja Mboni sya Yehofa. Atamose kuti nganiyisangalasya, napitepe. Panayiche ku Nyumba ja Uchimwene, natemi mwakuŵandikana ni mlango ni chakulinga chakuti nawoneje ŵandu ŵakwinjila soni ŵakukopoka. Mwamti pandaŵiji naliji ndili njigele uti.

Yanapikene pa msonganowu, yachenjile umi wangu. Nayiwonaga mpela ndili chilambo chinechakwe. Ŵandu ŵaliji mkungomasya mwachinonyelo soni ngope syawo syaliji syakusangalala. Ngusakumbuchilape chenene yachinonyelo soni mwaŵawonechelaga Ŵamboni palisikuli. Yeleyi yaliji yakulekangana mnope ni yanayiwonaga kulikose.

Kaneko natandite kulijiganya Baibulo ni Ŵamboni. Panalijiganyisye yejinji nayiweni kuti ngusosekwa kuchenga umi wangu. Nagajinjisye pamtima maloŵe gagakusimanikwa pa Misyungu 13:20 gagakusati, “Mundu jwakwenda ni ŵandu ŵalunda nombe najo akusaŵa jwalunda, nambo jwakwenda ni yisilu nombe najo tachijonasika.” Nakumbuchile kuti ngusosekwa kulekangana ni gulu ja yigaŵenga jila. Nganiyiŵa yamasenje kuti ndeche, nambo ni chikamuchisyo cha Yehofa yakomboleche.

Nachenjile umi wangu, mwamti nalesilesoni kwemba sona, kumwa mitela jakusokonasya mtwe, kutukana soni natyosisye ndolo syanaŵisile m’mawiwi mwangu. Kaneko nasenjile umbo syangu syasyaliji syelewu. Jeleji jaliji ndaŵi jandanda kuti njenje ndamo syangu.

Yaliji yakusawusya kuti nayikamulichisyeje masengo yanalijiganyaga m’Baibulo ligongo kutandila kala nganinonyelaga yakuŵalangaŵalanga. Ligongo lyakulimbichila, mwapanandipanandi natandite kumnonyela Yehofa. Kaneko chikumbumtima chatandite kulagasya. Ndaŵi syejinji nalagaga ni nganisyo soni nakayichilaga yakuti Yehofa mpaka angululuchile yindu yakusakala yanaŵele mkutenda. Panaŵalasile yaŵatesile Yehofa pakumkululuchila Mwenye Daudi ali atesile yakulemwa yekulungwa, yalimbikasisye.​—2 Samuele11:​1–12:​13.

Chakusawusya chine chaliji chakuti, yaliji yakusawusya kuti ndande kulalichila nyumba ni nyumba. (Mateyu 28:19, 20) Najogopaga kuti mwine chingasimane najo mundu junamtendele yakusakala kalakala. Nambo mwapanandipanandi woga watandite kumala. Kaneko natandite kusangalala ligongo lyakwakamuchisya ŵandu kwamanyilila Atati ŵetu ŵakwinani ŵele ŵakusatukululuchila yakulemwa yetu.

Umi wangu wakulupwiche ligongo lyakulijiganya yakwamba Yehofa. Achimjangu ŵane ŵawile, ŵanesoni ŵataŵidwe, nambo une ngwete sogolo jambone ndili jwakusangalala. Nalijiganyisye kuŵa jwakulinandiya, jwakupikanila soni jwakuwusimana mtima. Yeleyi yingamuchisye kuŵa jwakamulana ni ŵandu ŵane. Apano ndili jwakusangalala ligongo nalombele ŵamkwangu ŵakusalala. Tuli ŵakusangalala mnope ligongo tukukamula masengo gakwakamuchisya ŵandu ŵane kuti alijiganye Baibulo.

Kusala yisyene apano ndili mundu jwachilungamo. Ndaŵi sine ngusakamula masengo ku banki, mwamti mmalo mwa kwiŵa ngusaŵaga ndili mkusamalila mbiyasyo.