Ia, Vavolombelon̈o Jehovah man̈eky fa volan̈a jiaby amy Baiboly ao ‘baka amy Zan̈ahary aby’, ke mahatsara atsika. (2 Timoty 3:​16) Zen̈y mivolan̈a fa Testamenta Taloha ndreky Testamenta Vaovao, eraka fahaizanolo maro iro io, volan̈a Zan̈ahary. Fa karaha ataonay Vavolombelon̈o Jehovah, Soratra Hebreo ndreky Soratra Griky Kristianin̈y fivolan̈anay iro io, fotony aminay Volan̈a Zan̈ahary tsisy vaovao ndreky kay zen̈y.

 Zan̈ahary nan̈iraka apostoly Paoly nanoratra karaha ty: “Raha jiaby voasoratra taloha natao hianarantsika.” (Romanina 15:4) Zen̈y mivolan̈a fa raha jiaby voasoratra amy Soratra Hebreo ao mbala mahatsara atsika fo, firaka izioty. Fan̈ampinizen̈y koa, iro io man̈ampy atsika hahay tantara taloha tan̈y ndreky hazahoantsika anatra.

•   Tantara taloha mbala mahatsara atsika. Amy Soratra Hebreo ao mitantara fomba niasany Zan̈ahary raha jiaby ndreky antony nahavy olombelon̈o nanjary panota. Izikoa tsy voasoratra tao raha zen̈y, mety ho naro raha nanahiran̈a sain̈intsika, karaha ataony: Azovy niasa atsika? Nan̈ino olo maty? (Genesisy 2:7, 17) Baka amy Soratra Hebreo koa nahaizantsika fomba nitondrasany Jehovah olonany taloha tan̈y. Nanjary haintsika fa nisy fotoan̈a iro sahiran̈a, fa nisy fotoan̈a koa iro ravoravo, karaha atsika fo.​—Jakoba 5:​17.

•   Anatra. Karaha ataony bokiny Ohabolana ndreky Mpitoriteny amy Soratra Hebreo amy Baiboly ao ahitantsika torohevitry tsara mampasambatra tokantran̈o. (Ohabolana 15:17) Koran̈iny ao koa raha tokony hatao izikoa fa miasa aminolo. (Ohabolana 10:4; Mpitoriteny 4:6) Misy torohevitry mahatsara tanora koa amy boky aroe io (Mpitoriteny 11:9–​12:1).

 Mahatsara atsika koa mianatra momba Lalàn̈any Mosesy na Torah (boky dimy voanalohany amy Baiboly). Tsy baka amy fan̈arahan̈a Lalàn̈any Mosesy io eky hitsaran̈a Kristianin̈y. Ndray zen̈y ndraiky, mahatsara atsika fo mahay, ndreky man̈araka toro lalan̈a amy Lalàn̈a io.​—Levitikosy 19:18; Deoteronomia 6:​5-7.