•  Fampidiran̈a 2

•  Valera Baka amy Volan̈a Zan̈ahary 3-5

  •  Kabaro 3

  •  Valera Ara-pan̈ahy 4

  •  Vaky Baiboly 5

•  Fampiofan̈ana amy Fanompoan̈a 6-14

  •  Fanombohan̈a Koran̈a 7

  •  Mitsidiky 8

  •  Mampianatra 9

  •  Hazavà Raha Inoanao 10

  •  Kabaro 11

  •  Raha koran̈iny 12

  •  Faritry 13

  •  Fampiasan̈a video na boky 14

•  Fomba Fiain̈ana Kristianin̈y 15-16

  •  Fianaran̈a Baiboly Ataon’ny Fiangonan̈a 16

•  Famaran̈ana 17

•  Fankasitrahan̈a Ndreky Torohevitry 18

•  Lera 19

•  Fitsidihan’ny mpiandraikitry faritry 20

•  Herin̈iandran’ny fivoriambe 21

•  Herin̈iandran’ny Fahatsiarovan̈a 22

•  Mpiandraikitry Fivorian̈a Momba Fiain̈anantsika Ndreky Fanompoan̈a 23

•  Mpitari-draharaha amy Fivorian̈a Momba Fiain̈anantsika ndreky Fanompoan̈a 24

•  Mpan̈amia torohevitry mpan̈ampy 25

•  Kilasy fan̈ampiny 26

•  Video 27

1. Toromariky aby ty natao han̈ampy olo jiaby man̈ano anjara amy Fivorian̈a Momba Fiain̈anantsika Ndreky Fanompoan̈a. Ke alohan’ny irô han̈oman̈a anjarandrô, irô tôkony himpody hizaha ndraiky koa irô toromariky momba anjarandrô voakoran̈a amy Boky Fianaran̈a amy Fivorian̈a Momba Fiain̈anantsika Ndreky Fanompoan̈a. Mpitory jiaby tôkony hampirisihin̈y baka ho vôn̈ono han̈ano anjaran’ny mpianatra. Mety mahazo anjara amizio koa olo efa mifanerasera tsy tapaka amy fiangonan̈a, izikoa izy man̈eky raha ampianarin’ny Baiboly, baka iô miain̈y mifan̈araka amy fitsipiky kristianin̈y. Mpiandraikitry amy Fivorian̈a Momba Fiain̈anantsika Ndreky Fanompoan̈a tôkony hiaraka midiniky irô fepetra takin̈a amin’olo tihan̈ano anjara amy fivorian̈a kanefa mbala tsy mpitory vita batisa. Baka amy zen̈y ahaizan̈a asa izy mahafeno fepetra. Tôkony hiaraka iô koa olo mampianatra Baiboly izy (na babany na reniny Vavolombelon̈on’i Jehovah). Mira fepetra takin̈a amy mpitory tsy vita batisa fo fepetra takin̈a amin’olo man̈ano anjara amy fivorian̈a.​—od toko 8 feh. 8.

2. Minity araiky. Isaka herin̈iandra, mpitari-draharahan’ny Fivorian̈a Momba Fiain̈anantsika Ndreky Fanompoan̈a han̈ano izy ty, izikoa fa vita hira ndreky vavaka. Hataony raha hahavy mpan̈atriky han̈iry mare hitandren̈y raha hidinihin̈y amy fivorian̈a io. Izy tôkony hifantoko amindrô hevitry ten̈a hampatsara fiangonan̈a io.

  3. Kabaro: Folo minity. Efa amy Boky Fianaran̈a amy Fivorian̈a Momba Fiain̈anantsika Ndreky Fanompoan̈a ao foto-kevitry ndreky hevitry maventy aroe na telo. Anti-pan̈ahy na mpikarakara fiangonan̈a mahay, han̈ano izio. Izikoa fa manomboko amy boky vaovao vaky Baiboly, hisy video halefa hampidiran̈a boky io. Mpan̈ano kabaro io mety mampifandray hevitry amy video io amy foto-kevitry. Tôkony hangala toky tsarabe izy fa efa nikoran̈iny aby hevitry maventy amy boky fianaran̈a ao. Izikoa mbala misy fotoan̈a, tôkony hampiasainy koa sary ndreky hevitry baka amy Baiboly amy boky fianaran̈a ao, fôtony irô io natao han̈ampy fan̈azavan̈a. Mety mampiasa loharanon-kevitry hafa koa izy izikoa izio mifan̈araka tsara amy foto-kevitry hazavainy.

 4. Valera Ara-pan̈ahy: Folo minity. Izio fan̈ontanian̈a ndreky valiny, fa tsisy fampidiran̈a na famaran̈ana. Anti-pan̈ahy na mpikarakara fiangonan̈a mahay, han̈ano izio. Olo man̈ano anjara io tôkony han̈apetraka fan̈ontanian̈a aroe io amy mpan̈atriky. Anjaranany manapa-kevitry, na hivakin̈y andininy aby amy fan̈ontanian̈a io na tsy hivakin̈y. Tsy tôkony handilatra 30 segondy valin-teny ataon’olo tsiaraikiaraiky.

 5. Vaky Baiboly: Efatra minity. Lelahy fo tôkony han̈ano anjarany mpianatra io. Vakiteny fo ataon’ny mpianatra io, fa tsisy fampidiran̈a ndreky famaran̈ana. Raha ten̈a tôkony hifantohan’ny mpitari-draharahan’ny fivorian̈a io han̈ampy mpianatra han̈ano vakiteny tsisy diso, mazava tsara, vakiteny tsy tavitavela, hahay hankamafy hevitry, han̈ovaova feo, mety tsarabe fijanonany, aviô hamaky amy fomba tsotra ndreky tsy amboamboarin̈y. Mety ho lavalava na fohifohiky anjara vaky Baiboly, ke mpiandraikitry Fivorian̈a Momba Fiain̈anantsika Ndreky Fanompoan̈a izikoa fa hanendry olo han̈ano anjara io, tôkony hidinihiny koa fahaizan̈an’ny mpianatra amian̈a izio.

6. Folo dimy amby minity. Fizaran̈a io natao han̈ampian̈a olo jiaby han̈ano fan̈azaran-ten̈a amy fanompoan̈a ndreky hankatsara fahaizandrô mikoran̈a ndreky mitory, aviô mampianatra. Koa ilain̈y, anti-pan̈ahy koa mety hahazo anjaran’ny mpianatra. Mpianatra tsiaraikiaraiky tôkony hianatra tsarabe ndreky han̈araka raha tandremany voasoratra an̈atin’ny parantezy amy Boky Fianaran̈a amy Fivorian̈a Momba Fiain̈anantsika Ndreky Fanompoan̈a ao. Mety ho baka an̈atin’ny bokikely Mifen̈a na amy bokikely Tiava Olo ahitan̈a fan̈azavan̈a momba raha tandreman̈a io. Misy fotoan̈a koa, misy anjara fiarahan̈a midiniky koa amy programon’ny fivorian̈a ao. Anti-pan̈ahy na mpikarakara fiangonan̈a mahay, han̈ano anjara io.​—Zahava  fehintsoratra 15 man̈azava fomba fan̈anaovan̈a anjara fiarahan̈a midiniky.

 7. Fanombohan̈a Koran̈a: Lelahy na man̈angy han̈ano anjaran’ny mpianatra io. Izikoa irô tsy mpihavan̈a, tôkony lelahy fo man̈ampy lelahy, baka iô ranabavy man̈ampy ranabavy. Irô mety mipetraka na mitsangana, koa fa man̈ano anjarandrô.​—Izikoa tihahazo fan̈ampin’ny fan̈azavan̈a momba anjara ty, zahava fehintsoratra  fehintsoratra 12 ndreky  13.

 8. Mitsidiky: Lelahy na man̈angy han̈ano anjaran’ny mpianatra io. Tôkony lelahy fo man̈ampy lelahy, baka iô man̈angy man̈ampy man̈angy. (km 5/97 p. 2). Irô mety mipetraka na mitsangana, koa fa man̈ano anjarandrô. Tôkony haboakan’ny mpianatra io ino raha koran̈iny izikoa fa mitsidiky olo lian̈a hita tamy fitorian̈a.​—Izikoa tihahazo fan̈ampin’ny fan̈azavan̈a momba raha koran̈iny ndreky karazan̈a fitorian̈a na fiveren̈ana mitsidiky azo atao amin’ny anjary ty, zahava  fehintsoratra 12 ndreky  13.

 9. Mampianatra: Lelahy na man̈angy han̈ano anjaran’ny pianatra io. Tôkony lelahy fo man̈ampy lelahy, baka iô man̈angy man̈ampy man̈angy. (km 5/97 p. 2) Irô mety mipetraka na mitsangana, koa fa man̈ano anjarandrô. Tsy fampianaran̈a Baiboly vo manomboko haboaka amy fizaran̈a io fa fomba fitaritan̈a fampianaran̈a Baiboly efa anten̈anten̈any. Tsy voatery hasian̈a fampidiran̈a na famaran̈ana anjara io, izikoa tsy zen̈y raha takin̈y amy mpianatra io. Tsy voatery vakin̈y fehintsoratra jiaby amy loharanon-kevitry, ndray mety man̈ano zen̈y.

 10. Hazavà Raha Inoanao: Izikoa izio kabaro, lelahy fo han̈ano izy, fa izikoa ndraiky izio fampisehoan̈a, mety ho lelahy na man̈angy man̈ano izy. Izikoa irô tsy mpihavan̈a, tôkony lelahy fo man̈ampy lelahy, baka iô man̈angy man̈ampy man̈angy. Mpianatra io tôkony han̈amia fan̈azavan̈a mazava tsara ndreky mahay mandanjalanja izikoa fa mamaly fan̈ontanian̈a. Efa misy loharanon-kevitry hampiasain’ny mpianatra io ao hamalian̈a fan̈ontanian̈a amy foto-kevitry io. Tôkony hazava valiny amezany, aviô tôkony hahay handanjalanja izy izikoa fa man̈azava.Fa anjaran’ny mpianatra io ndraiky manapa-kevitry izikoa izy hanon̈ono loharanon-kevitry ioren̈an’ny anjaranany io, lera izy man̈ano anjaranany.

 11. Kabaro: Tôkony lelahy man̈ano anjaran’ny mpianatra io. Kabaro atao amy fiangonan̈a izio. Anjara io koa miôrin̈y amy fan̈ampin’ny fan̈azavan̈a A amy bokikely Tiava Olo, tôkony hazavain’ny mpianatra io akôry mety ampiasain̈a irô andininy aby io amy fanompoan̈a. Ohatra, izy mety han̈azava lera karakôry andininy io mety hampiasain̈y, dikan’ny andininy io, aviô akôry ampiasan̈a izio hampisaintsain̈ana olo. Izikoa ndraiky kabaro io miôrin̈y amin’ny hevitry araiky baka amy leson araiky amy bokikely Tiava Olo io, mpianatra io tôkony hifen̈y amy fampiharan̈a hevitry io amy fanompoan̈a. Izy mety hampiasa ohatra amin’ny hevitry 1 amy leson io ao, na han̈azava andininy fan̈ampiny koran̈in’ny leson io izikoa hitany fa mety han̈ampy.

   12. Raha koran̈iny: Fan̈azavan̈a amy fehintsoratra ty ndreky araiky fan̈araka ty mihatra amin’ny anjara “Fanombohan̈a Koran̈a” ndreky “Mitsidiky.” Izikoa tsisy fan̈amarihan̈a, tanjon̈on’ny mpianatra man̈ano anjara ty han̈azava fahamarin̈ana tsotra baka amy Baiboly mifan̈araka tsarabe amy raha ilain’olo ikoran̈any io ndreky han̈ambara raha hikoran̈indrô amy man̈araka. Mpianatra io tôkony hifidy foto-kevitry mifan̈araka amy raha misy amy faritany an̈y ndreky raha ten̈a tian’olo. Anjaran’ny mpianatra io manapa-kevitry na izy han̈amia olo io raha hivakin̈a na izy han̈aboaka video araiky baka amy Fitaovan̈a Fampianaran̈a. Mpianatra io tsy tôkony han̈ano tsianjery anjaranany fa tôkony hataony karaha mikoran̈a andavanandra in̈y fo izio, aviô hataony mifan̈araka amy raha ilain’olo ikoran̈any.

   13. Faritry: Tôkony hampifan̈arahan’ny mpianatra io amy raha misy an-toeran̈a, faritry amin’ny an-kapobeny amezan̈a amin’ny anjaranany io. Ohatra:

1.  1) Isaka Tran̈o: Tafiditry amy faritry io fitorian̈a isaka tran̈o, na izio mivantan̈a, na amy telefony, na amy taratasy. Mbala an̈isan’izio koa fitsidihan̈a olo efa navy nitorian̈a isaka tran̈o.

2.  2) Tsy Ara-potoan̈a: Tanjon̈o amizio, han̈aboaka akôry atao man̈araraotro man̈ova koran̈a tsotra ke manjary fitorian̈a. Tafiditry amizio mikoran̈a hevitry araiky baka amy Baiboly amin’olo am-piasan̈a an̈y, a lekoly an̈y, na olo jiraninao, na an̈atin’ny tomabily fimboan’olo, na an-tany hafa fandihananao isan’andra.

3.  3) Amy Tany Maro Olo: Izio mety ho fan̈anaovan̈a fampirantian̈a, fitorian̈a amy tany maro toeran̈a fiasan̈a, fitorian̈a amy lalan̈a, na fitorian̈a amy zaridaim-panjakan̈a, amy parking, na amy zay tany ahitan̈a olo maro.

 14. Fampiasan̈a video na boky: Anjaran’ny mpianatra io manapa-kevitry han̈amia olo io boky sa han̈aboaka video. Izikoa ndraiky misoratra amin’ny anjaran’ny mpianatra io izy mila mandefa video, na izikoa izy mifidy hampiasa video, tôkony hampiasa video izy hiarahany midiniky amin’olo io, fa izio fo tsy tôkony halefany.

15. Izikoa fa vita hira, mety ho hisy anjara araiky na aroe amy fizaran̈a 15 minity ty. Izio natao han̈ampian̈a mpan̈atriky han̈araka raha koran̈in’ny Baiboly. Izikoa tsisy fan̈amarihan̈a manokan̈a, anti-pan̈ahy na mpikarakara fiangonan̈a mahay tôkony han̈ano izio. Fa izikoa ndraiky raha ilain’ny fiangonan̈a, anti-pan̈ahy fo tôkony han̈ano izy. Izikoa ndraiky izio anjara fiarahan̈a midiniky, rahalahy voateandry han̈ano izio mety mampiasa fan̈ontanian̈a fan̈ampiny, ankoatran’ny efa amian̈a ao. Tôkony ho fohiky fo fampidiran̈a ataony, amy zen̈y ampy tsara fotoan̈a han̈aboahany hevitry maventy, aviô mba maro koa olo mamaly teny. Izikoa misy fan̈adikadin̈ana amin’ny anjara io, olo hadikadin̈iny io tôkony hanonga amy sehatra, izikoa mbala mety, fa tsy hidôko amy sezinany iô fo.

  16. Fianaran̈a Baiboly Ataon’ny Fiangonan̈a: Telopolo minity. Anti-pan̈ahy mahay tôkony han̈ano izio. (Izikoa vitsy anti-pan̈ahy amy fiangonan̈a, mety hampiasain̈y mpikarakara fiangonan̈a mahay.) Anti-pan̈ahy jiaby amy fiangonan̈a io mandiniky azôvy aby mety hitariky Fianaran̈a Baiboly Ataon’ny Fiangonan̈a. Tôkony hahavita hitariky tsarabe fianaran̈a io olo niken̈y hitariky, ke han̈aja lera tsarabe, han̈aboaka tsara irô andininy misy hevitry maventy, baka iô han̈ampy olo jiaby hahita fomba han̈arehan̈a hevitry dinihin̈y io. Hahita torolalan̈a tsara irô izikoa mandiniky ndraiky toromariky momba anjara fan̈ontanian̈a ndreky valiny. (w23.04 p. 24, efajoro) Izikoa efa navoadiniky tsarabe fianaran̈a amin’ny herin̈iandra io, tsy ilain̈y eky mankalava izio. Izikoa mety, tsara atao misolosolo mpitariky ndreky mpamaky fehintsoratra ampiasain̈y isaka herin̈iandra. Izikoa hitan’ny mpitari-draharahan’ny Fivorian̈a Momba Fiain̈anantsika Ndreky Fanompoan̈a fa tôkony hahen̈y lera han̈anaovan̈a Fianaran̈a Baiboly, anjaran’ny mpitariky mandiniky fomba han̈anaovan̈a zen̈y. Izy mety mifidy tsy hamaky fehintsoratra sasany.

17. Telo minity. Mpitari-draharahan’ny Fivorian̈a Momba Fiain̈anantsika Ndreky Fanompoan̈a hamintin̈y hevitry mahatsara baka tamy fivorian̈a io. Hikoran̈a raha ho hita amin’ny herin̈iandra man̈araka koa izy. Izikoa mahampy fotoan̈a, mety ampatsiaroviny koa an̈arandrô mpianatra manan̈a anjara amy fivorian̈a man̈araka. Izikoa tsisy toromariky manokan̈a, amy famaran̈ana io mpitari-draharaha vo man̈ano filazan̈a, na mamaky taratasy tôkony hivakin̈y amy fiangonan̈a. Tsy tôkony hitonon̈iny amy lampihazo filazan̈a mahazatra fa hapetaka amy tablô, karaha ataon’ny tany han̈anaovan̈a fivorian̈a alohan’ny fanompoan̈a ndreky programon’ny fan̈adiovan̈a. Izikoa tsy ampy lera han̈anaovan̈a filazan̈a na hamakian̈a taratasy amy famaran̈ana io, mpitari-draharaha tôkony han̈iraka irô manan̈a anjara amy Fomba Fiain̈ana Kristianin̈y hampihen̈y lera han̈anaovandrô anjarandrô. (Zahava  fehintsoratra 16 ndreky  19.) Hisy hira ndreky vavaka amy faran’ny fivorian̈a.

18. Mpitari-draharahan’ny Fivorian̈a Momba Fiain̈anantsika Ndreky Fanompoan̈a hankasitraka mpianatra nan̈ano anjaranany, baka iô han̈amia torohevitry baka amy raha takin̈a amy mpianatra. Kadiriny minity araiky isaka mpianatra an̈anaovany raha jiaby zen̈y. Tsy hikoran̈a raha takin̈y amy mpianatra izy, koa fa mampiditry anjaran’ny mpianatra. Isaka vita anjara ataon’ny mpianatra, izy hankasitraka raha tsara vitany, baka iô ton̈oniny raha nitakin̈y taminany. Volan̈iny ino nahatsara anjaran’ny mpianatra io, na hazavainy amin-katsaram-pan̈ahy ino raha mbala tôkony hankatsarainy. Mpitari-draharaha io koa afaka mikoran̈a hevitry hafa hitany fa mahatsara mpianatra io na mahatsara mpan̈atriky jiaby. Koa misy torohevitry fan̈ampiny, izy afaka man̈amia zen̈y mitokana mpianatra io, na afaran’ny fivorian̈a zen̈y na amy fotoan̈a hafa, miôrin̈y amy bokikely Tiava Olo, bokikely Mifen̈a na boky Sekolin’ny Fanompoana. Izio mety torohevitry momba raha nitandreman’ny mpianatra io na momba raha tandreman̈a hafa koa.​—Zahava  fehintsoratra 19,  24, ndreky  25, ahitan̈a fan̈ampin’ny fan̈azavan̈a momba andraikitrin’ny mpitari-draharahan’ny Fivorian̈a Momba Fiain̈anantsika Ndreky Fanompoan̈a, baka iô andraikitrin’ny mpan̈amia torohevitry mpan̈ampy.

19. Tsy tôkony hihoatra lera zay olo manan̈a anjara, an̈atin’izen̈y fan̈amarihan̈a ataon’ny mpitari-draharahan’ny Fivorian̈a Momba Fiain̈anantsika Ndreky Fanompoan̈a. Nata efa niferin̈y faharetan’ny anjara tsiaraikiaraiky amy Boky Fianaran̈a amy Fivorian̈a Momba Fiain̈anantsika Ndreky Fanompoan̈a, tsy tôkony han̈ampy fan̈azavan̈a hafa mpianatra ndray tsendriky tapitry leranany. Izikoa mihoatra leran’ny rahalahy sasany man̈ano anjara hafa amy fivorian̈a io, mpitari-draharahan’ny Fivorian̈a Momba Fiain̈anantsika Ndreky Fanompoan̈a na mpan̈amia torohevitry mpan̈ampy han̈amia irô torohevitry mitokana. (Zahava  fehintsoratra 24 ndreky  25.) Tsy mila mihoatra lera 1 sy 45 minity fivorian̈a jiaby, an̈atin’izen̈y hira ndreky vavaka.

20. Izikoa fa mitsidiky mpiandraikitry faritry, tôkony hatao mifan̈araka amy raha koran̈in’ny Boky Fianaran̈a amy Fivorian̈a Momba Fiain̈anantsika Ndreky Fanompoan̈a fo programon’ny fivorian̈a. Tsisy Fianaran̈a Baiboly Ataon’ny Fiangonan̈a amy Fomba Fiain̈ana Kristianin̈y amin’io, fa soloan̈a kabaro momba fanompoan̈a 30 minity, ataon’ny mpiandraikitry faritry. Alohan’ny kabaro io, mpitari-draharahan’ny Fivorian̈a Momba Fiain̈anantsika Ndreky Fanompoan̈a hamintin̈y raha natao tamy fivorian̈a ndreky hikoran̈a raha ho hita amy fivorian̈a man̈araka, han̈ano filazan̈a ndreky hamaky taratasy tôkony hivakin̈y, baka iô hampiditry mpiandraikitry faritry. Koa fa vita kabaro momba fanompoan̈a io, mpiandraikitry faritry io hamaran̈a fivorian̈a amin’ny hira efa nifidiny. Izy mety man̈iraka rahalahy hafa han̈ano vavaka farany. Izikoa fa mitsidiky mpiandraikitry faritry, tsy tôkony hisy kilasy fan̈ampiny eky amy volan̈a ampiasain’ny fiangonan̈a io. Mbala afaka man̈ano fivorian̈andrô fo antokom-pitory araiky, ndray mpiandraikitry faritry mitsidiky fiangonan̈a mpikarakara irô io. Kanefa, izikoa fa manomboko kabaro ataon’ny mpiandraikitry faritry, antokom-pitory io tôkony hiaraka amy fiangonan̈a mpikarakara izy io.

21. Tsisy fivorian̈a amin’ny herin̈iandran’ny fivoriamben’ny faritry na vondrom-paritry. Tôkony hatao fianaran̈a manokan̈a na hidinihin’ny fianakavian̈a raha tôkony hianaran̈a amin’ny herin̈iandra io.

22. Andran’ny Fahatsiarovan̈a izikoa amin’ny andavanandra, tsisy Fivorian̈a Momba Fiain̈anantsika Ndreky Fanompoan̈a.

23. Anti-pan̈ahy araiky nifidin’ny anti-pan̈ahy jiaby han̈ano mpiandraikitry Fivorian̈a Momba Fiain̈anantsika Ndreky Fanompoan̈a. Ataony azo antoko tsarabe fa voalamin̈y tsara fivorian̈a io sady mifan̈araka amy toromariky aby ato. Tôkony hifampikoran̈a tsarabe izy ndreky mpan̈amia torohevitry mpan̈ampy. Miaraka mpiandraikitry Fivorian̈a Momba Fiain̈anantsika Ndreky Fanompoan̈a mahazo Boky Fianaran̈a amy Fivorian̈a Momba Fiain̈anantsika Ndreky Fanompoan̈a, tôkony ho efa halaminy edy anjara jiaby amy fivorian̈a andavanandra an̈atin’ny fanjava aroe. An̈isan’izen̈y anjaran’ny mpianatra ndreky anjara hafa jiaby aviô manendry mpitari-draharahan’ny fivorian̈a isaka herin̈iandra, ke olo efa niken’ny anti-pan̈ahy jiaby han̈ano zen̈y fo ampiasainy. (Zahava  fehintsoratra 3-16 ndreky  24.) Izikoa fa hanoratra anjara hamian̈a mpianatra, tôkony hizahavany taon̈on’ny mpianatra io, traikefanany, ndreky fahaizany raha handeha hataony io. Tôkony han̈ano karaha zen̈y koa izy izikoa fa man̈amia olo anjara hafa amy fivorian̈a. Tôkony efa rasain̈y anjara tsiaraikiaraiky, faran’ny tara telo herin̈iandra alohan’ny daty han̈anaovan̈a izy. Ke Anjara amy Fivorian̈a Momba Fiain̈anantsika Ndreky Fanompoan̈a (S-89) ampiasain̈y han̈amezan̈a anjara mpianatra. Mpiandraikitry Fivorian̈a Momba Fiain̈anantsika Ndreky Fanompoan̈a tôkony hangala antoko fa efa mipetaka amy tablô misy filazan̈a listin’olo jiaby manan̈a anjara amy fivorian̈a jiaby. Mety manendry anti-pan̈ahy hafa na mpikarakara fiangonan̈a han̈ampy izy anti-pan̈ahy jiaby. Kanefa, ankoatran’ny anjaran’ny mpianatra, anti-pan̈ahy zaraiky fo afaka manendry olo man̈ano anjara hafa.

24. Isaka herin̈iandra, misy anti-pan̈ahy araiky mitari-draharaha amy Fivorian̈a Momba Fiain̈anantsika Ndreky Fanompoan̈a. (Izikoa vitsy anti-pan̈ahy amy fiangonan̈a, mety tindren̈a han̈ano izio mpikarakara fiangonan̈a mahay, izikoa ilain̈y zen̈y.) Anjaranany man̈oman̈a fampidiran̈a ndreky famaran̈ana. Mpitari-draharaha io hampiditry anjara jiaby, fa izikoa vitsy anti-pan̈ahy, izy mety han̈ano anjara hafa koa, sirto anjara fan̈aboahan̈a video tsisy fiarahan̈a midiniky. Tôkony ho fôhiky fan̈amarihan̈a ataony an̈elan̈elan̈a anjara tsiaraikiaraiky. Anti-pan̈ahy jiaby hanapa-kevitry azôvy aby irô anti-pan̈ahy mahafeno fepetra han̈ano izio. Mety hatao mifandimby hitari-draharaha irô anti-pan̈ahy voafidy aby io. Mety ho ten̈a matetiky hatao mpitari-draharaha mpiandraikitry Fivorian̈a Momba Fiain̈anantsika Ndreky Fanompoan̈a, arakaraka raha misy. Izikoa anti-pan̈ahy araiky mahafeno raha takin̈y amin’olo hitariky Fianaran̈a Baiboly Ataon’ny Fiangonan̈a, tôkony ho mety hatao mpitari-draharahan’ny fivorian̈a koa izy. Kanefa, aleva onon̈o fa anti-pan̈ahy mpitari-draharaha io tôkony han̈ano volan̈a fideran̈a ndreky han̈amia torohevitry am-pitiavan̈a irô mpianatra manan̈a anjara. Andraikitrinany koa man̈ano raha hazahoan̈a antoko fa fivorian̈a io tapitry amy lera tôkony hiravan̈ana. (Zahava  fehintsoratra 17 ndreky  19.) Mpitari-draharaha io mety mampiasa mikrô misy vitiny amy sisin’ny sehatra, izikoa izio tandry iô, amy zen̈y rahalahy han̈ano anjara man̈araka efa afaka manonga amy lampihazo, lera mpitari-draharaha io mampiditry izy. Mpitari-draharaha io koa mety mipetraka amy sezy iô fo, amin’ny anjara Vaky Baiboly ndreky Fampiofan̈ana amy Fanompoan̈a. Mety hitsitsy fotoan̈a izy, koa man̈ano zen̈y.

25. Ten̈a tsara izikoa anti-pan̈ahy efa za-draharaha amy fan̈anaovan̈a kabaro man̈ano andraikitry io. Andraikitrinany man̈amia torohevitry mitokana anti-pan̈ahy na mpikarakara fiangonan̈a momba anjarandrô, koa ilain̈y, an̈atin’izen̈y anjara amy Fivorian̈a Momba Fiain̈anantsika Ndreky Fanompoan̈a, kabaro natao nin’olo jiaby, fitaritan̈a na vakiteny amy Fianaran̈a Tilikambo Fiambesan̈a na Fianaran̈a Baiboly Ataon’ny Fiangonan̈a. (Zahava  fehintsoratra 19.) Izikoa maro anti-pan̈ahy mahay man̈ano kabaro ndreky mampianatra, mpan̈amia torohevitry mpan̈ampy io mety soloan̈a isaka taon̈o. Tsy voatery han̈amia torohevitry fo izy, isaka rahalahy araiky mahavita anjaranany.

26. Izikoa maro olo mety man̈ano anjaran’ny mpianatra, mety hasian̈a kilasy fan̈ampiny. Tôkony hisy mpan̈amia torohevitry mahay hitariky izio, ke ten̈a tsara izikoa anti-pan̈ahy man̈ano izio. Mety hirahin̈y mitariky izio koa mpikarakara fiangonan̈a ten̈a mahay, izikoa ilain̈y zen̈y. Anti-pan̈ahy jiaby hanapa-kevitry azôvy hitariky izio, baka iô dinihindrô koa, asa tôkony hifandimby olo hitariky izio sa olo araiky fo. Fomba fiasa amy  fehintsoratra 18 tôkony harahin’ny mpan̈amia torohevitry io. Izikoa misy kilasy fan̈ampiny, tôkony hirahin̈y handeha amy kilasy fan̈ampiny irô mpianatra manan̈a anjara an̈y koa fa vita Valera Ara-pan̈ahy amy Valera Baka amy Volan̈a Zan̈ahary. Himpody amy Tran̈obe irô koa fa vita anjaran’ny mpianatra farany.

27. Ho hisy video hampiasain̈y mifandray amy fivorian̈a ty. Ho hita amy JW Library® ao video ampiasain̈y amy fivorian̈a andavanandra. Mety alain̈y amy fitaovan̈a elektroniky isan-karazany irô io.

© 2023 Watch Tower Bible and Tract Society of Pennsylvania

S-38-TNK 11/23