“Tamy zaho mbala hely, anadahiko nampijaly zaho fo isan’anadra sady nan̈amia volan-draty zaho. Zaho koa fa nanambady, rafozambaviko tsy vôly nampijaly zaho koa. Izy ndreky rafozandahiko nan̈ano zaho karaha andevo in̈y. Ke tihamono ten̈a foeky zaho tamy zen̈y.”​—Madhu, a Inde.

 Mivolan̈a Fikambanan̈a Iraisam-pirenena Momba Fahasalaman̈a fa “fohita eran-tany hakafirianan̈a atao amy man̈angy.” Eraka tombantomban̈a nataon’izio, efa ho man̈angy araiky an̈atin’ny telo nisy nampijaly na nisy nan̈olan̈a tamy fiain̈ananany.

 Izikoa efa nandalo taminao raha zen̈y, mety havozo anao na aia na aia tany andihananao, tsao fo hisy olo han̈ano volan̈a mahery aminao na han̈olan̈a anao ndraiky. Vokatra zen̈y, anao mety hahatsapa koa fa ankamarozan’olo mihevitry ‘man̈angy ho tsisy raha ilan̈a izy.’ Kanefa Zan̈ahary ma mieritreritry karaha zen̈y koa?

 Andinin-teny: “Lelahy ndreky man̈angy [namoron̈an’ny Zan̈ahary] irô.”​—Genesisy 1:27.

 Ino ma dikan’izen̈y? Zan̈ahary namôron̈o lelahy ndreky man̈angy. Samy man̈eva hajain̈y aby irô io aminany. Lelahy koa tiany ho “tia vadiny karaha ain̈inany” fa tsy man̈ampatra fahifan̈a amy vadiny, ke man̈ano volan̈a mankarary na mamopoko izy. (Efesianina 5:33; Kolosianina 3:19) Hita baka amy zen̈y fa Zan̈ahary tihiaro man̈angy aby io.

 “Nisy havanay sasany nametaveta zaho tamy zaho mbala hely. Ke tamy zaho 17 taon̈o, zaho nirahôn̈in’ny sefonay fa hiroasiny, izikoa tsy man̈eky han̈ano firaisan̈a aminany. Tamy zaho efa be ndraiky, zaho nambanimbanin’ny vadiko ndreky raimandreniko aviô irô jiraninay aby io. Kanefa tafara tatỳ, zaho nianatra momba Jehovah, b Zan̈ahary mpamôron̈o, ke lôso haiko fa izy man̈aja man̈angy. Nan̈amia toky zaho raha zen̈y fa zaho ten̈a tiany sady valera aminany.”​—Maria, Argentine.

 Andinin-teny: “Misy ... naman̈a tsy man̈ary mandilatra rahalahy.”​—Ohabolana 18:24.

 Ino ma dikan’izen̈y? Ten̈a naman̈a zen̈y hanohan̈a anao fo. Ke ny raha mety atao, koràn̈a amin’olo atokisanao fihetseham-pônao.

 “Tsy nivolan̈iko tamin’olo foeky, tan̈atin’ny 20 taon̈o, fa nisy olo nan̈olan̈a zaho. Ke vokany: Tsy ravoravo zaho, navozo ndreky nijaly jery fo. Kanefa nisy olo zay vôn̈ono hitandren̈y zaho. Ke izikoa fa nitantaraiko taminany raha nahazo zaho io, lôso nahivankivan̈a oe zaho.”​—Elif, Turquie.

 Andinin-teny: “Apitraha [amy Zan̈ahary] koa raha jiaby mampiasaloha anarô, fôtony izy mikarakara anarô.”​—1 Petera 5:7.

 Ino ma dikan’izen̈y? Izikoa anao mivavaka, Zan̈ahary ten̈a mitandren̈y anao. (Salamo 55:22; 65:2) Mikarakara anao izy, ke vitany man̈ampy anao hahay fa ten̈a valera anao io.

 “Nahaijanga fônaka izikoa efa nianatra raha momba Jehovah zaho. Lôso mikoran̈a raha an̈aty fônaka amy Zan̈ahary amy vavaka zahao ziôty. Izy mira naman̈a araiky mahazo tsara fihetseham-pônaka in̈y.”​—Ana, Belize.

 Andinin-teny: “Han̈amia rariny olo kamboty baba ndreky olo ampijalian̈a [i Jehovah], baka tsy hampazovo irô eky olombelon̈o mety maty, olo ambony tany eto.” ​—Salamo 10:18.

 Ino ma dikan’izen̈y? Teteky iô, Zan̈ahary han̈afoan̈a raha tsy rariny jiaby, an̈isan’ izen̈y fampijalian̈a man̈angy ndreky hakafirianan̈a atao amindrô io.

 “Karaha olo baka nihina aody mampakirikiry tehotehoko in̈y zaho, izikoa fa nahay fa teteky iô Zan̈ahary han̈afoan̈a fampijalian̈a man̈angy ndreky tsaiky viavy. Nanjary nilamin-tsain̈y zaho.”​—Roberta, Meksiky.

 Tianao ma hahay ino raha ampan̈antinain’ny Baiboly, nan̈ino anao afaka matoky raha ampan̈antinain’izio, aviô akôry mety an̈ampian’ny Vavolombelon̈on’i Jehovah anao baka amy Baiboly? Volàn̈a amin’olo nan̈amia anao trakty ty fa anao ten̈a man̈iry hivangian̈a.

 Hangala lahatsoratra ty amy forma mety atao pirinty.