Takany Hulda Tanjon̈onany
MISY nosy hely kahian̈a Sangir Besar an Indonésie an̈y. Misy ranabavintsika telo mipetraka an̈y. Taon̈o vitsivitsy loso zay, iro niaraka niasa tamorondranomasin̈y. Asa fanompoan̈a ataondro ahaizanolo an̈y iro. Hainolo fa iro man̈ampy olo hahay raha ampianariny Baiboly. Fa tamy diany araiky io, nisy karazan̈a asa hafa nataondro.
Nosiny Sangir Besar avaratrany Indonésie
Voanalohany, iro nandeha tan̈aty rano nitady vato maro mavesatra, baka io izio nindesindro tantety. Sasany amindro vato aby io maventy karaha laboly. Baka io, man̈angy aby io nipetraka tamy tabore madiniky, avio vato aby in̈y nivakivakindro tamy martô ke nanjary madiniky, heliheliny antodiny akoho. Koa fa vita zen̈y, iro vato aby io nataondro tan̈atiny siô, avio iro nanonga leskalie nitatitry izio tamy tran̈ondro tan̈y. Tafaranizen̈y, vato aby io nataondro tan̈atiny gony mety batain̈a an̈aty kamion. Iro io ampiasain̈a han̈amboaran̈a lalan̈a.
Hulda mamory vato amorondranomasin̈y
Hulda an̈arany araiky amindro ranabavy aby io. Izy nisy fotoan̈a tsarabe han̈anaovan̈a asa io tozay olo hafa nan̈ano asa io. Vola nazony tamizio nampiasainy hividianan̈a raha nilainy fianakavian̈anany isanandra. Fa tamy diany araiky ty fo, sasany tamy vola nazony tiany hampiasain̈y amy raha hafa. Izy tihahazo tablety, amy zen̈y izy afaka mampiasa JW Library®. Hainy Hulda fa video ndreky raha hafa tan̈atiny application io afaka han̈ampy izy amy fanompoan̈a ndreky hahazo tsara raha koran̈iny Baiboly.
Hulda niasa tan̈atiny lera aroe isaka maraindrain̈y, tan̈atiny fanjava araiky sy tapany. Vato nivakiny aby io nahafeno kamion madiniky araiky. Nahazo vola ampy hividianan̈a tablety izy tamy farany.
Hulda miaraka amy tabletinany
Karaha ty nivolan̈iny Hulda: “Nata zaho nahevoko ndreky kajo koa fa namaky vato in̈y, betibetiky fo efa nadin̈ako tehotehoko ndreky hotsokotsokonaka jiaby tamizin̈y izikoa zaho fa nampiasa tabletinaka vaovao io. Izio baka man̈ampy zaho hahomby tsarabe amy fanompoan̈a avio mahaimora aminaka fo man̈oman̈a fivorian̈a.” Izy koa mbala nivolan̈a fa tabletinany io nan̈ampy izy hahavita hiaraka hivory ndreky hiaraka hitory aminolo, tamy valan̈aretin̈y in̈y. Ravoravo atsika fotony takany Hulda tanjon̈onany.
