Mahay mifehy ten̈a olo araiky izikoa:

• Mahavita miambin̈y

• Mahavita mifehy fan̈irian̈anany ndreky fihetsehamponany

• Mamita raha tokony hatao, nata izio tsy tiany

• Mieritreritry ny hafa antsendriky

Tsaiky araiky izikoa mahay mifehy ten̈a, ho vitany tsy han̈ano raha ratsy, ndray karaha tsara fahitan̈a izio. Fa tsaiky tsy mahay mifehy ten̈a ndraiky mety

• ho kafiry

• ho mora kivy

• hifima na higiaka toaka be na hihina jamala

• tsy hifidifidy raha hoanin̈y

Hita tamy fikarohan̈a araiky fa olo araiky izikoa rango mbala hely efa mahay mifehy ten̈a, lera izy be, izy tsy dia hanan̈a problemo arapahasalaman̈a ndreky arabola, salakady iro ho tia man̈aradalàn̈a. Zen̈y nahavy Profesaira Angela Duckworth, baka aminy Iniversiteny Pennsylvania, hivolan̈a karaha ty: “Tsisy raha maharatsy mifehy ten̈a zen̈y.”

Mianara man̈ano ‘ehe’ baka io aza miova hevitry.

TORO LALAN̈A BAIBOLY: “Volan̈anaro izikoa fa ‘Ia’, ia, izikoa fa ‘Ehe’, ehe.”​—Matio 5:37.

Izikoa fa misy raha tadiaviny zanakanao, izy mety hiafatrafatra amy tomoan̈y, ndray amy tany misy olo maro. Man̈ano zen̈y izy baka ataonao raha tadiaviny. Ke izikoa anao man̈eky, an̈aty jeriny zanakanao isaka izy misy raha tadiaviny izy mila mitomoan̈y mare baka izio amianao izy.

Fa izikoa ndraiky anao mahay man̈ano ‘ehe’ sady tsy miova hevitry, ho hainy zanakanao fa tsy kila raha tadiaviny zay ho azony aby. Karaha ty nisoratiny Dokotera David Walsh: “Olo man̈eky zen̈y ny ten̈a sambatra. Tsy tia zanakantsika atsika izikoa izy ambelantsika mieritreritry fa ho azony fo raha jiaby tadiaviny, ke hindesiny firaka izy be raha zen̈y.” a

Ho mora amy zanakanao hifehy ten̈a afara an̈y, izikoa rango zioty tsy kila raha tadiaviny zay amianao izy fo. Hahafehy ten̈a ohatra izy, izikoa fa misy olo mitaon̈o izy hihina jamala, han̈ano firaisan̈a alohany mariazy, na han̈ano raha ratsy hafa.

Ampianara zanakanao ino vokany izikoa izy man̈ano raha ratsy na izikoa izy man̈ano raha tsara.

TORO LALAN̈A BAIBOLY: “Zay raha afafinolo fo hijinjainy.”​—Galatianina 6:7.

Mila hainy zanakanao fa tsy maintsy misy vokany fo raha jiaby ataony, salakady izikoa izy tsy mifehy ten̈a ho ratsy mare vokany. Izikoa, ohatra, zanakanao io olo mora meloko, izy manjary hilifilifasanolo fo. Fa izikoa ndraiky izy mahay mifehy ten̈a lera misy raha mampameloko izy, ke mitandren̈y tsara antsendriky fa tsy direkty manapaka volan̈anolo, manjary ho tianolo miaraka aminany. Ampia izy baka ho takany fa ho tsara mare fiain̈ananany izikoa izy mahay mifehy ten̈a.

Ampia zanakanao hahay ino raha ten̈a maventy

TORO LALAN̈A BAIBOLY: ‘Diniha ino raha ten̈a maventy.’​—Filipianina 1:10.

Fifihezanten̈a io man̈ampy atsika tsy han̈ano raha ratsy. Izio koa man̈ampy atsika han̈ano raha tsy dia tiantsika loatra, kanefa mila ataontsika. Mila hainy zanakanao manapakevitry momba raha ten̈a maventy ndreky raha mila atao voanalohany. Ohatra, mila vitainy antsendriky devoaranany zay izy vo mandeha misaoma.

Man̈ameza modely tsara.

TORO LALAN̈A BAIBOLY: “Modely izy namiako anaro in̈y, baka han̈anaovanaro karaha nataoko taminaro in̈y koa.”​—Jaona 13:15.

Ho hitany zanakanao karakory fihetsikinao izikoa fa misy raha mampameloko anao. Ke amy zen̈y, aboaha izy fa ho tsara vokany izikoa fa mifehy ten̈a. Izikoa misy raha tsy mety, ohatra, hataony zanakanao, direkty anao meloko sa anao kalma fo?