Atsika mila vola ivangan̈a raha ilain̈y amy tokantran̈o. (Ohabolana 30:8) Zen̈y mahavy Baiboly mivolan̈a fa vola io fialofan̈a. (Mpitoriteny 7:12) Mety ho sarotro aminaro fivadiany mikoran̈a raha momba vola, fa aza atao mampiady anaro raha zen̈y. (Efesianina 4:32) Anaro tokony hifampatoky ndreky hifampikoran̈a tsarabe amy raha hampiasanaro volanaro.

KORAN̈INY BAIBOLY: “Azovy aminaro ma izikoa fa hiasa tran̈o maventy, tsy mipetraka antsendriky mandiniky tsarabe vola mety ho lany, misy ahitan̈a na mahampy volanany na tsy mahampy?” (Lioka 14:28) Anaro mila miaraka mandiniky raha ampiasanaro volanaro. (Amosa 3:3) Zahava tsarabe ino raha ten̈a ilainaro vangain̈y, baka io otrino mety laninaro amy zen̈y. (Ohabolana 31:16) Ndray anaro mety misy vola, mandiniha tsarabe fo, alohany hivanga raha. Ataova mahampy zay vola misy aminaro, fa aza malaky mitrosa.—Ohabolana 21:5; 22:7.

AKORY AN̈ANOVAN̈A ZEN̈Y?

• Izikoa mbala misy ambiny volanaro, tsara anaro miaraka manapakevitry amy raha hatao izy

• Izikoa fa hitanaro fa tsy mahampy vola miditry aminaro, ahen̈a raha sasany mety tsy ten̈a ilain̈y. Ohatra, alohany hividy raha na koa fa mandeha bazary, tsara antsendriky anao mampitovy vidindraha

KORAN̈INY BAIBOLY: ‘Man̈anova ny marin̈y amy raha jiaby, tsy man̈oloan̈a Jehovah fo fa man̈oloan̈a olo koa.’ (2 Korintianina 8:21) Aza asitriky vadinao foeky vola miditry aminao ndreky raha nilanao vola.

Koràn̈a antsendriky vadinao, alohany anao hanapakevitry amy raha maventy hampiasan̈a vola. (Ohabolana 13:10) Anaro koa mikoran̈a momba raha hampiasanaro volanaro, hilamin̈y fo tokantran̈onaro. Isaka anao mahazo vola, aleva onon̈o fa izio tsy ninao zaraiky, fa ninaro tran̈o araiky.—1 Timoty 5:8.

AKORY AN̈ANOVAN̈A ZEN̈Y?

• Mifan̈araha amy vola tokony hilaninaro tsiaraikiaraiky ke tsy mila angatahan̈a lalan̈a

• Aza miambin̈y efa misy raha manahiran̈a vo mikoran̈a momba vola