An̈isany mampiavaka lahin’ny radaka, fomba fan̈inavany. Tsy ampoizin̈y foeky lera an̈inavany aviô feonany mimpodimpody. Samihafa feon’ny radaka lahy tsiaraikiaraiky nata izio mifangaro amy feon’ny radaka hafa. Nisy mpikaroko ta Japon nandiniky momba radakan’ny kakazo japoney. Hitandrô fa mahavy feon’ny radaka lahy aby io samy amy ninany karaha zen̈y, fôtony nata maromaro irô amy faritry araiky, irô radaka lahy aby io efa manan̈a fomba voalamin̈y tsara ikahian̈a vaviny.

 Diniha hely baka: Radaka lahy aby io man̈aboaka feo ikahian̈a vaviny. Baka amy tadim-peonany an̈y avian’ny feonany io aviô izio mandeha amy sakam-peonany ke mahaimare fo. Amy tendanany iô tany misy sakam-peo io, izio karaha pôso mahavita mibontaka. Radaka man̈aboaka feo isan-karazany. Arakaraka karazan̈andrô, ohatra, misy man̈ena, mifiko, man̈aboaka feo mora, miafatrafatra, man̈ena karaha drakidraky na mierotro.

 Akôry atao man̈avaka feon’ny radaka lahy araiky amy radaka lahy hafa na mitovy karazan̈a aminany na tsy mitovy? Hitan’ny mpikaroko aby io fa izikoa fa mifankarikitry tany misy radaka aby io, irô tsy samy man̈enan̈ena be karaha in̈y fo fa mifandimby. Ten̈a mahômby tekniky araiky zen̈y. Irô baka manjary tsy miaraka man̈ena ke miavaka tsara feondrô tsiaraikiaraiky. Mahavita mitsitsy angôvo koa irô fôtony misy fotoan̈a sasany mangin̈y sasany man̈ena.

 Ten̈a milamin̈y tsara fomba fan̈inavandrô radaka aby io. Nandiniky marikitry momba izio irô manam-pahaizan̈a momba fitaovan̈a fifandraisan̈a baka lavitry aby io. Irô nan̈ano kôntikônty tsialohaloha baka hahavitan̈a mifehy fotoan̈a handihanan’ny données, amy zen̈y données samifaha tsy miaraka mandeha amy données sasany. Vokatran’izen̈y, lôso mahay azo antoko tsara fomba fifindran’ny données sady tsy mitaky angôvo be.

 Akôry hevitrinao? Fahaizan’ny radaka mifandimby man̈ena io ma baka amin’ny evôlision, sa izio nisy namôron̈o?