Mahay man̈aboaka feo hely ndreky man̈ano fiko isankarazany dauphin io. Tandrin̈esany tsarabe baka io feo nalefany in̈y, misy ahaizany mandehandeha ndreky ahaizany raha man̈odidin̈y izy. Nahita hevitry iro manampahizan̈a aby io koa fa nandiniky fahaizany dauphin lava vava (Tursiops truncatus). Aminy andra izioty, misy limitiny raha vitany fitaovan̈a mizaha raha an̈aty rano, ke iro pikaroko aby io tihan̈atsara fitaovan̈a io.

 Diniha hely baka: Feo alefany dauphin io man̈ampy izy hahita laoko an̈aty jia baka io man̈ampy izy han̈avaka vato sa laoko. Koran̈iny Keith Brown, manampahizan̈a aminy Iniversiteny Watt, a Édimbboug, Ekosy an̈y, fa “kadiriny folo metara miala izy, efa hainy dauphin io rano tsotra sa ranontsira sa rano mamy be sa mena” an̈atiny raha araiky. Tihan̈amboatra fitaovan̈a mitovitovy amy zen̈y iro manampahizan̈a aby io.

 Nidinihindro manampahizan̈a aby io akory ataony dauphin io man̈aboaka feo ndreky mitandren̈y raha. In̈y amy zay alaindro tahaka. Nahavita nan̈amboatra fitaovan̈a elektroniky maro garamidany oe iro manampahizan̈a aby io. Nataondro tamy vy leralerany izio, tsy ampy metara araiky. Fihezindro amy raha lavalava izio, iro amy zay man̈aramaso raha amy ranomasin̈y ambany an̈y, karaha ataony kabla na tiô. Fitaovan̈a io tsy mikasiky raha aby io fa mizaha baka lavitry fo. Hitandro nan̈amboatra fitaovan̈a io fa afaka mampiasa izio iro loziny pitady petroly na gazy. Mahaimaro fo fan̈azavan̈a ho azondro, raha io koa ampiasain̈y amy zen̈y. Han̈ampy iro teknisien aby io koa zen̈y hahita toeran̈a mety tsarabe an̈apitrahan̈a fitaovan̈a an̈aty rano. Ho mora koa mahita izikoa misy robaka iro fitaovan̈a aby io, ohatra izikoa misy vaky fitaovan̈a fangalan̈a petroly. Ho hita tsarabe koa ino raha mampatsentsin̈y tiô io ambany an̈y.

 Akory hevitrinao? Baka aminy evolision fahaizan̈any dauphin lava vava io sa nisy namoron̈o?