Misy pikaroko mivolan̈a fa amboa afaka mampiasa fahaizany man̈avaka fofoko io mba hahaizany taon̈ony amboa hafa, fihetsehampo, ndreky lahy izio sa vavy. Amboa koa mety ampiofan̈iny hahay fofoko bomby ndreky jamala. Maso raha ten̈a ampiasainolombelon̈o hahaizany raha man̈odidin̈y izy. Fa niny amboa ndraiky, oron̈o ten̈a miasa.

 Diniha hely baka: Fahaizany amboa man̈avaka fofokondraha io mbala mandilatra lavitriny nintsika olombelon̈o. Institut Amerikain Momba Fitsipiky Ndreky Teknolozy mivolan̈a fa vitany amboa “man̈avaka raha araiky, an̈atiny raha araiky tapitrisa tapitrisa. Zen̈y mitovy amy maharen̈y sirony siramamy kadiriny ampahefatrany sotro madiniky, an̈aty lapisiny feno rano fan̈anaovan̈a Jeux Olympiques.”

 Nan̈ino ma fahaizany amboa man̈avaka fofokondraha io miavaka be karaha zen̈y?

•   Oron̈ony amboa aby io mando ke mora maharen̈y fofokondraha.

•   Aminy oron̈ony amboa misy lavaka aroe: Araiky fangalany tsiko, fa araiky ndraiky fitandrin̈esany fofokondraha. Izikoa izy fa mitandren̈y fofokondraha, tsiko io mandeha amy faritry amy lavakoron̈onany ao, araiky misy selily mahay man̈avaka fofoko in̈y.

•   Faritry mahay man̈avaka fofoko aminy oron̈ony amboa ao 130 santimetara kare, fa ninolombelon̈o ndraiky dimy santimetara kare fo.

•   Hamarozany selily mahay man̈avaka fofoko aminy oron̈ony amboa ao mety hahatakatra mandilatrany in-50 ninintsika.

 Baka amy raha jiaby zen̈y ahavitany amboa man̈avaka raha samihafa amy fofon̈o. Misy manampahaizan̈a ohatra mivolan̈a fa izikoa atsika maharen̈y fofokony lasopy, amboa ndraiky maharen̈y fofokondraha tsiaraikiaraiky naharo aminany ao.

 Pikaroko amy fikambanan̈a araiky pan̈ano fikarohan̈a momba kansera mivolan̈a fa oron̈ony amboa ndreky betronany izikoa fa miaraka miasa,“an̈isany fitaovan̈a mahay man̈avaka fofoko ten̈a matanjaka ambony tany.” Siantifiky aby io ziôty efa man̈amboatra “oron̈o” elektroniky, hahaizan̈a bomby ndreky entan̈a aondran̈a antsokosoko baka io aretin̈y, an̈isanizen̈y kansera.

 Akory hevitrinao? Fahaizany amboa man̈avaka fofokondraha io ma vokatrany evolision, sa izio nisy namoron̈o?