Mikaela io an̈aran̈any Jesosy taminizy mbala tandan̈itry tan̈y, ndreky tafaranizy nimpody andan̈itry an̈y. Fa misy koa fivavahan̈a mikaiky izy “Saint-Michel.” a Tamy Mosesy naty, Satana nimalo tamy Mikaela. Izy koa fa navy nan̈ampy anjely araiky, taminizy nan̈ambara hafatrany Zan̈ahary handeha tamy paminan̈y Daniela. (Daniela 10:13, 21; Joda 9) Dikany Mikaela zen̈y, “Azovy ma mira Zan̈ahary?” Mety aminany tsarabe an̈aran̈a zen̈y, fotony izy miaro fitondrasan̈any Zan̈ahary sady miady amy fahavalony Zan̈ahary koa.​—Daniela 12:1; Apokalypsy 12:7.

 Diniha baka nan̈ino atsika mivolan̈a fa Jesosy ankitin̈y Mikaela io.

•   Mikaela fo “arkanjely” io. (Joda 9) Dikany “arkanjely” zen̈y, “sefony anjely.” Aroe fo tany mikoran̈a izio amy Baiboly ao, avio olo araiky fo ivolan̈ana izio ao. Dikanizen̈y, anjely araiky fo manan̈a an̈aran̈a fan̈ajan̈a zen̈y. Araiky amindro andininy aby amy Baiboly io mivolan̈a fa Jesosy Tompo nivilomin̈y, ke “hijotso baka andan̈itry an̈y, sady mikomandy ndreky man̈ano feony arkanjely.” (1 Tesalonianina 4:16) Mikaela arkanjely io Jesosy, dikanizen̈y “feony arkanjely” io feony Jesosy.

•   Mikaela io pitariky tafikiny anjely aby io. “Mikaela ndreky anjelinany aby io niady tamy dragona”, Satana. (Apokalypsy 12:7) Baiboly mivolan̈a fa Mikaela io “araiky amindro andriana farany maventy” ndreky “andriana araiky farany maventy” io. (Daniela 10:13, 21; 12:1) Nisy manampahizan̈a momba Testamenta Vaovao, David Aune an̈arany, nivolan̈a fa matoa Mikaela manan̈a an̈aran̈a fan̈ajan̈a aby io, dikanizen̈y izy ‘pitariky tafiky farany maventiny tafikiny anjely aby io.’

   Koran̈iny Baiboly koa fa Jesosy zaraiky fo manan̈a fahifan̈a amy tafikiny anjely. Karaha ty koran̈iny ao: “Abaribary Jesosy Tompo baka andan̈itry an̈y, miaraka amindro anjelinany mahery aby io, amy motro mizelazela, amy fotoan̈a hamaliany. (2 Tesalonianina 1:7, 8; Matio 16:27) Jesosy koa fa ‘nandeha andan̈itry, nirahin̈y nan̈eky izy anjely ndreky fahifan̈a ndreky fanjakan̈a.’ (1 Petera 3:21, 22) Jesosy pitariky tafikiny anjely, avio Mikaela koa karaha zen̈y. Ke aia Zan̈ahary ke hifidy pitariky tafikiny anjely aroe tsy fankahazo zen̈y! Dikanizen̈y, Jesosy fo Mikaela io.

•   Mikaela ‘hitsangana an̈atiny fotoan̈any “fijalian̈a tsisy ambaka izy.” (Daniela 12:1) Amy bokiny Daniela ao, matetiky dikany panjaka araiky ‘mitsangana’ zen̈y, izy han̈ano raha miavaka. (Daniela 11:2-4, 21) “Volan̈a Zan̈ahary” fikahian̈a Jesosy Kristy. Fa izy koa “Panjakany panjaka”, ke hisy raha miavaka hataony. Izy handripaka fahavalony Zan̈ahary sady hiaro vahoakany Zan̈ahary. (Apokalypsy 19:11-16) Han̈ano zen̈y amy “fahorian̈a be tsisy ambaka izy, rango nisiany donia ty.”​—Matio 24:21, 42.