Olo araiky koa fa manjary mpitory, ikeny fa fikambanan̈a ara-pivavahan̈a eran-tanin’ny Vavolombelon̈on’i Jehovah mahazo mampiasa fan̈azavan̈a mikasiky izy, fôtony raha zen̈y ilain’ny fikambanan̈a io. Tafiditry amy fikambanan̈a io fiangonan̈an’ny Vavolombelon̈on’i Jehovah an-toeran̈a, aviô birôn’ny sampan̈a ndreky fikambanan̈a hafa nin’ny Vavolombelon̈on’i Jehovah. Mifan̈araka amy raha koran̈in’ny boky Voalamina mba Hanao ny Sitrapon’i Jehovah, amezan’ny mpitory fiangonan̈a raha mombamomba izy, baka izy mahazo man̈ano asa ara-pivavahan̈a mifandray amy fanompoany Zan̈ahary ndreky mahazo fan̈ampian̈a ara-pan̈ahy.​—1 Petera 5:2.

An̈isan’ny raha mombamomba olo araiky an̈aranany, daty nitirahany, lelahy izy sa man̈angy, datin’ny batisanany, adiresy ndreky telefoninany, fahasalaman̈anany ara-pan̈ahy, asa fanompoan̈a ataony, andraikitrinany amy Vavolombelon̈on’i Jehovah, na fan̈azavan̈a hafa amezany, izikoa izy man̈ano asa ara-pivavahan̈a hafa. Hita amy fan̈azavan̈a zen̈y raha inoan’ny mpitory io, aviô mety hisy fan̈azavan̈a saro-pady mety hifidiny hamezan̈a koa ao. Dikan’ny fampiasan̈a raha mombamomba olo araiky zen̈y, alain̈a izio, alamin̈y, akajin̈y ndreky raha hafa mety atao miramira amy zen̈y.

Ty Lalàn̈a Momba Fiarovan̈a Fan̈azavan̈a amy firenena io:

Lalàn̈a Momba Fiarovan̈a Fan̈azavan̈a, Gazety Ofisialin’ny Repoblikin’i Macédoine Avaratra Laharan̈a Faha-42 tamy 16.02.2022.

Ke mifan̈araka amy Lalàn̈a Momba Fiarovan̈a Fan̈azavan̈a io, fan̈azavan̈a amezan’ny mpitory io ampiasain’ny Vavolombelon̈on’i Jehovah amy raha aby misy ifandraisany amy fivavahan̈a aby ty:

• fikarakaran̈a ndreky fitantan̈ana fivavahan̈an’ny Vavolombelon̈on’i Jehovah

• fandraisan̈a anjara amy fivorian̈an’ny fiangonan̈an’ny Vavolombelon̈on’i Jehovah an-toeran̈a ndreky amin’ny asa an-tsitrapô

• fahafahan̈a mandray anjara amy fivorian̈a na fivoriambe alain̈a feo ndreky sary, baka hampianaran̈a Vavolombelon̈on’i Jehovah eran-tany

• fan̈atantirahan̈a anjara na andraikitry hafa amy fiangonan̈a

• fikajian̈a karty Firaketana ny Fanompoan’ny Mpitorin’ny Fiangonana

• fikarakaran̈a ara-pan̈ahy ataon’ny anti-pan̈ahin’ny Vavolombelon̈on’i Jehovah (Asan’ny Apostoly 20:28; Jakoba 5:14, 15)

• fan̈azavan̈a mombamomba olo mety kahian̈a izikoa misy raha tsy ampoizin̈y avoa mpitory io

Hakajinay fo fan̈azavan̈a momba olo araiky, an̈atin’ny fotoan̈a han̈atantirahan̈a raha jiaby avoakoran̈a an̈abo io, na misy antony ara-dalàn̈a hafa koa tôkony hikajianan̈a izy. Izikoa mpitory io mbala tsy ampy taon̈o, babany na mamany na olo mitarimy izy hirahin̈y man̈ano sin̈e taratasy hifinoan̈a Fampahafantarana sy Fanekena ny Hampiasana ny Mombamomba Ahy. Izikoa babany na mamany na olo mitarimy izy mifidy tsy han̈ano sin̈e izio, mety ho hitan’ny Vavolombelon̈on’i Jehovah fa tsaiky io tsy mahazo man̈ano andraikitry sasany amy fiangonan̈a, na tsy mahazo man̈ano asa ara-pivavahan̈a sasany.

Asa ataon’ny Vavolombelon̈on’i Jehovah io atao eran-tany. Ke mety halefa na hakajin̈y amy firenena hafa an̈y koa raha mombamomba mpitory io. Tsy voatery ho mira amy lalàn̈a amy firenena nialan’ny fan̈azavan̈a io lalàn̈a momba fiarovan̈a fan̈azavan̈a amy firenena aby zen̈y, fa mety ho hafa foeky. Izikoa karaha zen̈y firenena handifasan̈a fan̈azavan̈a momba anao io, efa misy fepetra raisin’ny Vavolombelon̈on’i Jehovah, baka ho azo antoko tsarabe fa voaro fo fan̈azavan̈a alefa io. Lan̈iany Fikambanan̈a Ara-pivavahan̈an’ny Vavolombelon̈on’i Jehovah eran-tany mangala fan̈azavan̈a io, hampiasa izio mifan̈araka amy Fan̈ikian’ny Vavolombelon̈on’i Jehovah Tsy Han̈aboely Fan̈azavan̈a Amezanao.

Mpitory araiky manan̈a zo hizaha fan̈azavan̈a momba izy amy Vavolombelon̈on’i Jehovah an̈y ndreky mangataka han̈afoan̈a, hametry ndreky han̈ajanon̈o fikarakaran̈a izio ndreky man̈itsy ny diso ao. Izikoa mpitory io man̈eky fa hampiasain̈a amin’ny asa hafa fan̈azavan̈a momba izy, izy mety tsy man̈eky raha sasany mety mbala hampiasan̈a fan̈azavan̈a momba izy io, na ombian̈a na ombian̈a. Izikoa tsy iken’ny mpitory io foeky hampiasan̈a raha mombamomba izy na izikoa izy mangataka fa hifafan̈a raha mombamomba izy na hiferin̈y fikarakaran̈a izio, mety mbala ho afaka hampiasa fan̈azavan̈a sasany momba izy fo Vavolombelon̈on’i Jehovah, fôtony manan̈a antony ara-pivavahan̈a han̈anaovan̈a zen̈y, na fôtony Lalàn̈a Momba Fiarovan̈a Fan̈azavan̈a man̈ambela irô han̈ano zen̈y. Hain’ny mpitory fa izy manan̈a zo hitarain̈y amy manam-pahifan̈a momba fiarovan̈a fan̈azavan̈a amy tany misy izy.

Vavolombelon̈on’i Jehovah mangala fepetra isan-karazany hiarovan̈a fan̈azavan̈a azondrô momba olo. Fepetra aby zen̈y mifan̈araka amy Lalàn̈a Momba Fiarovan̈a Fan̈azavan̈a fo. Hain’ny mpitory fa olo vitsy nahazo lalan̈a fo mahita fan̈azavan̈a amezany, han̈anaovan̈a raha aby nikoran̈iny taloha tiô in̈y, ankoatran’irô mahazo fanendrena amy fivorian̈a an̈ivon’ny fiangonan̈a fo.

Fan̈ontanian̈a ndreky fangatahan̈a jiaby atao amy tompin’andraikitry amy fiarovan̈a fan̈azavan̈a io, mety alefa e-mail amy:

DataProtectionOfficer.MK@jw.org

Hain’ny mpitory fa hita amin’ny adiresy ty Adiresy Momba Fiarovan̈a Fan̈azavan̈a amy jw.org, raha mombamomba mpikarakara fan̈azavan̈a amy tany misy izy. Mety ho hita ao koa nin’ny solonten̈an’ny mpikarakara fan̈azavan̈a ndreky tompin’andraikitrin’ny fiarovan̈a fan̈azavan̈a, nin’ny tany sasany.

Ndraikindraiky mety hiova fomba ikarakaranay fan̈azavan̈a izikoa miova asa ara-pivavahan̈a ataonay, lalàn̈a misy, na fampiasan̈a teknolozy. Izikoa ilain̈a man̈avao Fampiasan̈a Raha Mombamomba Anao ty, halefanay amy pazy ty fo raha zen̈y, baka ho hain’ny mpitory fo fan̈azavan̈a alainay momba izy ndreky fomba ampiasanay izio. Ke zahava matetitetiky fo pazy ty tsao fo efa nisy raha niova.