მუშო ოკო რაგად, ქო. იეჰოვაშ მოწმეეფს ჯერა, ნამდა ბიბლია „ღორონთშე რე შთაგონებულ დო მარგებელ რე“ (2 ტიმოთე 3:16). თე წიგნშა მიშურს „ჯვეშ აღთქმა“ დო „ახალ აღთქმა“, მუჭოთ ამდღა მიშინუანა. იეჰოვაშ მოწმეეფ ჯვეშ დო ახალ აღთქმას, ებრაულ დო ქრისტიანულ ბერძნულ წერილეფს უძახნა. თეშნერო, ხალხის თიცალ შთაბეჭდილებას ვა ვუტენთ, ნამდა ბიბლიაშ ნამთინე ნაწილ მოჯვეშებულ რე ვარდა ამდღარ დროს პრაქტიკულ ვა რე.

 მოციქულ პავლექ ღორონთიშ შთაგონებათ ჭარჷ: „ირფელქ, მუთ ადრე იჭარუნ, ჩქინ ოგურაფალო იჭარ“ (რომაელები 15:4). თაშ ნამდა, ებრაულ წერილეფს ბრელ მნიშვნელოვან ინფორმაცია რე მოჩამილ. თეს გეძინელ, თაქ მოჩამილ რე მნიშვნელოვან ცნობეფ დო პრაქტიკულ რჩევეფ.

•   მნიშვნელოვან ცნობეფ. ებრაულ წერილეფს მოჩამილ რე დეტალეფ, მუჭო გაჭყჷ ღორონთიქ მთელ ქიანა დო მუჭო გინირთჷ კაცობრიობაქ ცოდვაშ მონათ. თე ინფორმაციაშ უმშო ვეშმალებედეს პასუხიშ მეღება თიცალ მნიშვნელოვან კითხვეფშე, მუნერით რე: მუჭო გოფრჩქინდით? მუშენ ღურნა ადამიანეფ? (დაბადება 2:7, 17). თეწკუმა ართო, ებრაულ წერილეფშე ბგებულენთ, მუჭო ოქცუდ ღორონთ მუშ მსახურეფს, მიდგას ჩქინცალ გრძნობეფ დო პრობლემეფ უღდეს (იაკობი 5:17).

•   პრაქტიკულ რჩევეფ. ბიბლიაშ წიგნეფს — იგავეფს დო ეკლესიასტეს, ნამუთ ებრაულ წერილეფიშ ნაწილ რე, მოჩამილ რე ბრძნულ რჩევეფ, ნამდგაშ გიმორნაფა ამდღა ხოლო პრაქტიკულ რე. თე წიგნეფშე ბღებულენთ ბრძნულ რჩევეფს, მუჭო შემლებნა მიღდან ბედნერ ოჯახ (იგავები 15:17), მუჭო მიღდან გაწონასწორებულ შეხედულება სამუშაშე (იგავები 10:4; ეკლესიასტე 4:6), დო მუჭო შეულებნა ახალგაზრდეფს გონივრულო გეგმირინუან ახალგაზრდულ წანეფ (ეკლესიასტე 11:9—12:1).

 თე ირფელწკუმა ართო, ჩქი ბრელ მუდგარენიშ გურაფა შემლებნა მოსეშ კანონშე, ნამუთ მოჩამილ რე, თორას — მოსეშ ხეთ ნაჭარა ხუთწიგნეულს. მართალ რე, ამდღა ქრისტიანეფს ვემეთხიებნა მოსეშ კანონიშ დაცვება, მარა თექ მოჩამილ მნიშვნელოვან პრინციპეფ მიმეხვარებნა, მიღდან ბედნერ ცხოვრება (ლევიანები 19:18; კანონი 6:5—7).