ნამთინეს ბრელ დრო ოსაჭირ, ნამდა მუშ გამოცდილებაშე ქიდიგურუას. მა ხოლო თაშ ვორდჷ. მა დებაბდჷ დო მიბრდჷ ბარსელონას, ნამუთ ესპანეთის სიდიდათ მაჟია ქალაქ რე. ჩქინ ოჯახ ქალაქის არძაშ უდიდაშ სანაპირო ზოლს, სომოროსტროს ცხოვრენდჷ, ნამუთ კრიმინალით დო ნარკოვაჭრობათ რდუ ცნობილ.

 ჩხორო და დო ჯიმაშე, არძაშე უნჩაშ მა ვორდჷ. ჩქი ფინანსურო მიჭირდეს, ათეშენ მუაჩქიმქ ადგილობრივ ჩოგბურთიშ გუნდის, ბურთეფიშ ემაჭოფალო ქუდმოჭყაფუ მუშება. 10 წანერ ვორდჷ დო ირდღას 10 საათის მუფშენდჷ, ათეშენ, სკოლაშა ვეგლმართინედ. 14 წანერ ვორდინ, ლითონიშ ქარხანას მექანიკოსო ქიდიბჭყჷ მუშება.

 1975 წანას ჯარშა ქუდომძახეს; ჩქინ ქიანას თენა სავალდებულო რდუ. მოკოდ, თავგადასავლეფ ნობღვედკო ცხოვრებას. ათეშენ გინობჭყვიდ, მიდამრთუმუდკო ესპანეთიშ ავტონომიურ ქალაქ მელილიაშა, ნამუთ ჩრდილოეთ აფრიკას რე დო თექ უცხოურ ლეგიონს მოხალისეთ ვიმსახურკო. თე დროს უკვე ნარკომანო დო შუმილიათ ვორდჷ გინორთელ.

 ლეგიონშე მალაფრთინ, უკულ ბარსელონაშა დიფრთჷ დო თექ ბანდა ჩამოვაყალიბ. იფხირდით ირფელს, მუდგაშ ხირუა შემლებდეს. უკულ თე ნივთეფს გიმოფჩანდით დო ნარკოტიკეფს პჸიდულენდით. უმოს გვიანო, ელესდეი-შ დო ამფეტამინიშ მეღება ქიდიბჭყჷ; თეწკუმა ართო, ქიმვაჸუნ უზნეო ცხოვრებას, შუმას დო აზარტულ ლაჸაფეფს. თეცალ ცხოვრებაშ წესიქ უმოს მოძალადეთ გინმორთინუ. ირდიხაშა გილამღუდ ხამუ, არგუნ ვარდა მაჩეტე დო სიტუაცია ქიმითხინდჷ-და, მზათ ვორდჷ, გეგმიბრინეკო თინეფ.

 ართშა მა დო ჩქიმ ბანდაქ მანქანა მიფხირით დო თეშ გურშენ პოლიციაქ ქეკმათხოზეს. თეცალ მუდგარენ კინოეფს მიძირ. ნახირა მანქანათ სოდგარენ 30 კილომეტრიშ ულა ქუვოჭიშეთ, სოიშახ პოლიციაქ ჸოთამა ვედიჭყჷ. საბოლათ, ჩქინ შოფერქ მანქანა დოტახ; ჩქი ხოლო არძაქ დიპტყობით. მუჟამსით მუაჩქიმქ თე ამბე ქიგეგ, გეჸალ დო ჸუდეშე გეგმოჸოთ.

 უკულიან ხუთ წანაშ განმავლობას ქუჩაქ ჩქიმ ჸუდეთ გინირთჷ. იბრულუანდჷ შხვადოშხვა კარწკუმა, დიდ მანქანეფს, სკამუეფს, ნამუთ პარკეფს რდუ დო სასაფლეფს. ჭიჭე ხანს ფოთქვის ხოლო ფცხოვრენდჷ. ჩქიმ ცხოვრებას მუთუნნერ აზრი ვა უღუდ, ათეშენ არძა ართ მაფუდ, ცოცხალ იპიდ დოვარ დობღურუდ. ჯგირო ფშუ, ართშა ნარკოტიკიშ კეთებაშ უკულ ხელეფ დო მაჯეფ დიბჭკირ. ამდღარშახ გიმოხე შრამეფ.

 28 წანერ ვორდინ, დიაჩქიმქ დობგორ დო ფთხუ, ჸუდეშა დიფრთიკო. მა ქუდვაჸუნ დო სიტყვა მეფჩჷ, ნამდა ცხოვრებაშ წესის დოფთირანდჷ, მარა თეშ მიოჭირნაფალო ბრელ დროქ დემესაჭირ.

 ართ დღას ჟირ იეჰოვაშ მოწმექ ჩქინ კარს ქიმკუხაკუ. თინეფიშ მორჩქილაფა ქიდიბჭყჷ, მუ დროსით მუაჩქიმქ დინახლეშე ქომღვარუ დო მიწუ, ვა მურჩქილეკო თინეფს დო კარ ქიმუკილეკო. დღას ვა მიჸორდჷ ბრძანებაშ შესრულება, ათეშენ მუაჩქიმიშ ნარაგად ჸუჯშა ველეფშკვჷ. მოწმეეფქ სუმ ჭიჭე წიგნ ქომუჩეს, ნამუთ ხიოლით გიწუღ. უკულ ქობკითხ, სო ატარენდეს შეხვალამეფს დო მუსხირენ დღაშ უკულ მიდაფრთჷ სამეფო დარბაზშა.

 პირველ, მუდგაქ თოლშა მომიოლ თინა რდუ, ნამდა არძას სუფთას დო მოწესრიგებულო მიკაქუნდჷ. თინეფიშ გინაწონს, მა გინძე თუმა მიღუდ, პიჯის თუმა გოფჩანდჷ დო შირილ ბარგ მიკმოქუნდჷ. დუდ უხერხულო იბგინ, ათეშენ გინობჭყვიდ, დარბაზშა დინახალე ვემნოფრთიკო. მანგარო გამკვირდჷ, მუჟამსით იეჰოვაშ მოწმეეფ შქას შარვალ-კოსტუმს გიმონწყილ ჩქიმ ჯვეშ ნაჩინებ, ხუან ქობძირ, ნამუთ ართ დროს ბანდაშ წევრ რდუ. უმოს გვიანო ქიგებგ, ნამდა ართ წანაშ წოხოლე იეჰოვაშ მოწმეთ გინორთე. თიშ ძირაფაქ ძალეფ ქომუჩ, დინახალე გემნომრთუმუდკო დო ქიმიფრჩქილეკო პროგრამა. თე დღაშე ქიდიჭყ ჩქიმ ცხოვრებაშ თირუაქ.

 ბიბლიაშ გურაფა ქიდიბჭყჷ დო ხეთეშე ქიმეფხვად, ნამდა ღორონთიშ გურიშ გახარება ქუმოკოდ-და, ოკო ჩეფთხინეკო ჩქიმ აგრესიულ ხასიათ დო მივოტეკო უზნეო ცხოვრება. თე ირფელიშ კეთება ადვილ ვარდჷ. ქიმეფხვად, იეჰოვაშ მოსაწონო ცხოვრება ქუმოკოდ–და, საჭირო რდუ გონებაშ გაახალება დო სრულაშე თირუა (რომაელები 12:2). ჩქიმწკუმა მანგარო იმოქმედ ღორონთიშ ჭყოლოფაქ. ჩქიმ შეცდომეფიშ უმკუჯინუო, ბგინაფლენდჷ, ნამდა იეჰოვაქ შანს ქომუჩჷ, ცხოვრება დუდშე დიბჭყიკო. მუდგას იეჰოვაშ გურშენ ბგურაფლენდჷ, ჩქიმ გურს მანგარო ოხუდ. არგამათ ქობძირ, ნამდა არსებენდჷ გუმაჭყაფალ, ნამუთ პირადო ჩქიმო ზრუნენდჷ (1 პეტრე 5:6, 7).

 თეშ რჩქინაქ გეგნმოჭყვიდირაფუ, ქიდიბჭყიკო ცხოვრებაშ თირუა. მაგალთო, ბიბლიაშ გურაფაშ დროს, მუჟამსით პაპიროსიშ შუმაშ გურშენ გენიფხილენდით, ჩქიმ დუც ვუწი, იეჰოვას ოკო, ირფელნერო სუფთა ვორდე, ათეშენ პაპიროსიშ შუმა ოკო მივოტუე! (2 კორინთელები 7:1). თაშ ნამდა, პაპიროს გეგნვოჸოთ!

 თეწკუმა ართო, საჭირო რდუ, მივოტეკო ნარკოტიკიშ გიმორნაფა დო გიმოჩამა. თეშ მიოჭირნაფალო უმოს მეტ დროქ დო მონდომაქ დემესაჭირ. მა მუთუნნერ ურთიერთობა ოკო ვამღუდკო ჯვეშ მეგობრეფწკუმა. თინეფწკუმა ურთიერთობა სულიერო წიმი ულას მოცილუდ. დროშ მიკულაწკუმა ართო ქიდიბგურე ღორონთშა მენდება. კრებას ახალ მეგობრეფქ ხოლო მანგარო ელამდირთეს. ჸოროფა დო ყურადღება, მუდგას თინეფ ჩქიმწკუმა გიმირჩქინანდეს, თეიშახ დღას მითინშე ვამგინაფ. მუსხირენ თუთაშ უკულ საბოლათ დუვანებ დუდ ნარკოტიკეფს დო „ახალ პიროვნებათ“ თირუა ქიდიბჭყჷ, მუდგაქ მიმეხვარ, ღორონთშო მოსაწონ პჸოფედკო (ეფესოელები 4:24). 1985 წანაშ არგუსოს დიბნათ დო იეჰოვაშ მოწმეთ გინიფრთჷ.

 ბიბლიაქ ჩქიმ ცხოვრება უჯგუშობაშა დოთირუ. თიშ მოხვარათ გეფთავისუფალ თიცალ ცხოვრებაშე, ნამუთ ხვალე ფიზიკურ ზიანს ვამმორინუანდუნ, ღირსებას ხოლო მინადგურენდჷ. სანარღოთ, 30-შე უმოს ჩქიმ მეგობარქ შიდსით დო შხვადოშხვა ლახალათ, ნამუთ ნარკოტიკეფიშ გიმორნაფას მოჸუნს, ახალგაზრდობას დოღურ. დიდ მარდულ ვორექ, ნამდა ბიბლიურ პრინციპეფიშ გიმორნაფაშ ჭყოლოფათ ამდღა ცოცხალ ვორექ.

 ახალობას ხამუეფ დო არგუნეფ გილამღუდ, ნამდა შხვეფს ზიან მივორინეკო. დღას ვეფიფქრენდჷ, ნამდა თინეფიშ მანგიორო ბიბლიას დებკინენდჷ ხეს დო შხვეფს მივეხვარებუდ. ამდღა მა დო ჩქიმ ოსურ სრულ დროთ ვომსახურუთ იეჰოვას.

 ჩქიმ მშობლეფ იეჰოვაშ მოწმეეფო ვეგნორთენა, მარა აფასენდეს თი ჯგირობუას, მუთ ბიბლიაშ გურაფაშ დოჭყაფაქ მომიღ. რდუ თიცალ შემთხვევა ხოლო, მუჟამსით მუაჩქიმქ იეჰოვაშ მოწმეეფ მუშ თანამშრომელეფიშ წოხოლე დეცვჷ. თინა არგამათ ორწყედ, ნამდა ჩქიმ ახალ რწმენაქ უჯგუშობაშა დოთირუ ჩქიმ ცხოვრება. დიაჩქიმ ხშირას იჩიებუდ, ნამდა ბიბლიაშ გურაფა უმოს ადრე ოკო დომჭყაფუდკო. მა ხოლო ვოთანხმუქ თის!

 ჩქიმ გამოცდილებაშე დიბგურე, ნამდა ნარკოტიკეფიშ გიმორნაფას დო უზნეო ცხოვრებას კმაყოფილება ვა მოუღჷ. ასე ნამდვილ კმაყოფილებას ბგინაფლენქ, მუჟამსით შხვეფს ღორონთიშ სიტყვას ვოგურუანქ. ზუსტას თე წიგნიშ ჭყოლოფა რე, ამდღა ცოცხალ ვორექინ!