დებაბდჷ ქალაქ კალგარს, ალბერტაშ პროვინციას, ნამუთ კანადას რე. მუჟამსით ჭიჭე ვორდჷ, ჩქიმ მშობლეფქ ართიანს ჩეთხის. დიაჩქიმქ მუშ მშობლეფშა გეგნორთჷ ოცხოვრებშა დო მა ხოლო მიდამიჸონ. ბებ დო ბაბუს მა დო დიაჩქიმ მანგარო ვუჸორდით, ათეშენ ბედნერ ბაღანა ვორდჷ. ამდღარშა ფშუ, მუ ჯგირ დო ბედნერ ბაღანობა მიღუდ.

 შქვით წანერ ვორდინ, ჩქიმ მშობლეფქ გერიგეს დო ოცხოვრებშა სენტ-ლუისშა, მისურიშ შტატშა გეგნოფრთით (შეერთებულ შტატეფ). თეშ უკულ ჩქიმ ცხოვრებაქ უფრაშობაშა დითირ. მალას ქიმეფხვად, ნამდა ჩქიმ მუმა სასტიკ კოჩ რდუ. მაგალთო, მუჟამსით ახალ სკოლაშა მიდაფრთჷ, პირველ დღას ბაღანეფქ გობლახეს, მარა მა ხე ვეკნომრთინუაფ. ათეშ გურშენ მუაჩქიმქ თეშ გეჸალ, ნამდა ლახირ ვორდინ, თიშ უფრაშო გობლახ. თიმ დღარშე ჭკუა ქიდიბგურე დო მითინს სიტყვას ხოლო ვა ვაპატიენდჷ.

 მუაჩქიმიშ გლახა ხასიათიქ დიაჩქიმს ხოლო გეგნადვჷ. ჩქინ ჸუდეშე ირო ჩხუპიშ დო გორაფაშ ხონარ გიმიშ. თინეფ ხეს ხოლო მიოგანდეს ართიანს. 11 წანერ ვორდინ, ოშუმალ დო ნარკოტიკეფ გუვამორსჷ. მა ხოლო ჭიჭე-ჭიჭეთ აგრესიულო გინიფრთჷ დო ქუჩაშ გარჩიებეფს ბღებულენდჷ მონაწილებას. სკოლა გუვათენ, ხოლო უმოს მოძალადეთ გინიფრთჷ.

 18 წანერო გინიფრთინ, ამერიკაშ შეერთებულ შტატეფიშ საზღვაო ქვეით ჯარს ჩებრიცხჷ. წვრთნეფიშ დროს მოგურუანდეს ბრძოლას დო კოჩიშ ჸვილუაშ მეთოდეფს. ხუთ წანაშ უკულ საზღვაო ჯარშე მალაფრთჷ დო გინობჭყვიდ ფსიქოლოგიაშ გურაფა თი მიზანით, ნამდა ფედერალურ საგამოძიებო ბიუროს ქიმუფშეკო. შეერთებულ შტატეფს უნივერსიტეტის ქიდიბჭყჷ გურაფა, უკულ კანადაშა დიფრთჷ დო თექ გუვაგრძელ.

 მუჟამსით უნივერსიტეტის გურაფაშ დროს ხალხის ვოკვირუდ, ცხოვრებაშა გურქ გემიოლ. ვორწყედ, მუნერ ეგოისტ რდუ ხალხ დო მუნერ უგურე რდუ მსოფლიო. თეშ იძირედ, ნამდა კაცობრიობაშ პრობლემეფ დღას ვეგნოჭყორდუდ. მემდინ თიშ იმენდიქ, ნამდა ხალხის შეიალებედ მსოფლიოშ უჯგუშობაშა თირუა.

 ვორწყედ, ნამდა ცხოვრებას მუთუნ აზრ ვა უღუდ, ათეშენ ქიდიბჭყჷ შუმა დო ნარკოტიკეფიშ მეღება; ქიმვაჸუნ ფარაშ შიბას დო უზნეო ცხოვრებას. ირიათო დროშ ტარებაშე დო თიშე ფიფქრენდჷ, ნამ ოსურწკუმა პჸოფედკო სერით. სამხედრო მომზადებაშ უკულ ჩქიმ დუდშა ვორდჷ დაიმენდებულ დო ხშირას ევაჸუნუდ ჩხუპეფს. სამართლიანობას ჩქიმობრათ ვუჯინედ დო უსამართლობას მითინს ვა ვაპატიენდჷ. სინამდვილეს, ძალადობაშ მონა ვორდჷ.

 ართ დღას, მუჟამსით მა დო ჩქიმ მეგობარ ჩქიმ ჸუდეშ პადვალს ტყობაშე ვამზადენდით მარიხუანას გიმაჩამალო, თიქ ბკითხჷ, ქობწანდჷ დო ვარ ღორონთიშ. მა თეშ პასუხო ვუწი: „მუთ უბედრობეფ ხვადუ, ირფელ ღორონთიშ ბრალ ქორენ-და, ნამდვილო ვა მოკო, მუთუნნერ კავშირ მიღდას თეცალ ღორონთწკუმა“. მაჟია დღას ახალ სამუშაშა მიდაფრთჷ. ართ-ართ თანამშრომელქ, ნამუთ იეჰოვაშ მოწმე ჸოფე, ბკითხჷ: „მუჭო ფიქრენქ, ღორონთიშ ბრალ რენო, მსოფლიოს თესხი უბედრობა ხვადუნ?“. თენა მანგარ დამთხვევა რდუ; წოხლენ დღას ზუსტას თეშე მიღუდ ჩიება დო მოკოდ, უმოს მეტ გამგებუდკო. ამშვ თუთაშ დინახალე ჩქი ხშირას ბრაგადანდით რელიგიურ საკითხეფშენ დო ჩქიმ თანამშრომელ ბიბლიაშე მოძირანდჷ თი კითხვეფშე პასუხეფს, ნამუთ არძაშ უმოსო მაწუხენდჷ.

 ჩქიმ საოსუროს, მიდგაწკუმა ართო თი პერიოდის ფცხოვრენდჷ, ვაკოდ, ქივეჩიკო თი საკითხეფშე, მუდგას ბიბლიაშე ბგურაფლენდჷ. ართ ჟეშხამო დღას თის ვუწი, ნამდა იეჰოვაშ მოწმეეფ მიშეს ჩქინდა დო ბიბლიაშ გურაფას ქიმმეხვარებდეს. მაჟია დღას, სამუშაშე ჸუჩა დორთელს ჩქიმ საოსუროქ ჸუდეს ვა დოფხვად; ბარგ გეუჭოფ დო ჸუდეშე მიდურთუმ. გალე გეგმოფრთჷ დო ქიმგარ. უკულ ლოცვა ქიდიბჭყჷ დო ღორონთის ვოხვეწუდ, ქიმმეხვარკო. თე დროს ლოცვას პირველო მიფშინე ღორონთიშ სახელ იეჰოვა (ფსალმუნი 83:18).

 მუჭოთ დაპირებულ აფდეს, ჟირ დღაშ უკულ, იეჰოვაშ მოწმე ჩილ დო ქომონჯიქ ქუმმაკითხეს დო თინეფქ ბიბლიაშ გურაფა ქუდომჭყეს. თინეფქ მიდართესინ, გუვაგრძელ ბიბლიაშა გერსხილ ართ-ართ წიგნიშ („შენ შეგიძლია მარადიული ცხოვრება სამოთხეში დედამიწაზე“) კითხირ, ნამდგას ბიბლიაშ გურაფაშ დროს გიმირინუანდეს დო თიმ სერს დუდშე ბოლოშა წებკითხჷ. a ჩქიმ გურს მანგარო შეხუ თიქ, მუთ ღორონთშე დო თიშ სქუა, იესო ქრისტეშ, გურშენ გებგჷ. ქობძირ, ნამდა ღორონთის გურშა მეუღჷ ხალხიშ გაჭირება (ესაია 63:9). განსაკუთრებულო თიშ გაგებაქ იმოქმედ, ნამდა იეჰოვაქ მა ხოლო ქომიჸოროფუ დო მუშ ართკაკალ სქუა ჩქიმ გურშენ ხოლო შეწირ (1 იოანე 4:10). თეწკუმა ართო, თინა ხოლო ქიგებგ, ნამდა იეჰოვა მოთვინებას გიმირჩქინანდჷ ჩქიმწკუმა, „მუშენდა ვაკო მითინქ დოღურას, თის ოკო, არძაქ მინანუას“ (2 პეტრე 3:9). ქიბგინ, იეჰოვას ოკოდ, თიშ მეგობარ პჸოფედკო (იოანე 6:44).

 კრებაშ შეხვალამეფშა გილულა თი მარაშე ქიდიბჭყჷ. გინძე თუმა მიღუდ, საყურეეფ მიკეთუდ დო კოჩის ჩქიმ ინოჯინაშა აშქურნედ. მარა იეჰოვაშ მოწმეეფ ბრელ ხანიშ უძირაფ ნათესეცალო მოქცუდეს. თინეფ თეშ მოქცუდეს, მუჭოთ ნამდვილ ქრისტიანს ოსქვანს. დუც თეშ ბგინაფლენდჷ, ითამ ბებ დო ბაბწკუმა ვორდიკო; მართალ ქოიწუათინ, თაქ ბრელით უჯგუშ გარემო რდუ.

 თინა, მუდგას ბიბლიაშე ბგურაფლენდჷ, ირფელამო თირანდჷ ჩქიმ ცხოვრებას. თუმა დიბჭკირ, შუმას დო ნარკოტიკეფს დუდ დუვანებ დო მივოტე უზნეო ცხოვრება (1 კორინთელები 6:9, 10; 11:14). მთელ გურით მოკოდ, გურ გავუხარკო იეჰოვას. მუჟამსით ქიგებგენდჷ, იეჰოვას ვა მოწონსინ ფერ მუდგარენს ვორთუდ, დღას ვებჭყანდჷ დუდიშ მართლებას; პირიქით, თეს ბნარღენდჷ. ჩქიმ დუც ვურაგადუდ: „ანწ თაშ ოკო ვა მიქცუე“. თეშ უკულ, დრო ვემემღუდუნ თეშ ვოცადუდ უჯგუშობაშა თირუას დო ხეთეშე ვორწყედ, მუ ჯგირ შედეგეფ მოუღუდ ღორონთიშ მცნებეფიშ დაცვებას. საბოლათ, ბიბლიაშ გურაფაშ დოჭყაფაშე 6 თუთაშ უკულ, 1989 წანაშ 29 კვირკვეს, დიბნათ დო იეჰოვაშ მოწმეთ გინიფრთჷ.

 ბიბლიაქ ირფელამო დოფთირუ. თეიშახ, მითინ ქემეწინააღმდეგებუდ-და, ბლახუნდჷ. მარა ამდღა ირნერო ვოცადუქ, არძაწკუმა მშვიდობიან ვორდე (1 კორინთელები 6:9, 10; 11:14). თენა ნამდვილო ვა რე ჩქიმ დამსახურება. იეჰოვაშ სიტყვაქ დო თიშ წმინდა შურქ დოფთირუ, მუდგაშ გურშენ მთელ გურით მარდულ ვორექ ღორონთიშ (გალატელები 5:22, 23; ებრაელები 4:12).

 თიშ მანგიორო, ნამდა ნარკოტიკეფიშ, ძალადობაშ დო უზნეო სურვილეფიშ მონათ გინიფრთიკო, ასე მთელ გურით ვომსახურუქ იეჰოვას დო ვოცადუქ, მუთ შემლებ ირფელ გუვაკეთე თიშ მოსაწონო. თეშა მიშურს, შხვეფს იეჰოვაშ გაჩინებაფას მივეხვარე. ნათუაშე მუსხირენ წანაშ უკულ, თი ტერიტორიაშა გეგნოფრთჷ, სოდეთ მაუწყებელეფიშ საჭიროება რდუ. წანეფიშ დინახალე ბრელ კოც ვოგურუანდჷ ბიბლიას დო დიდ ხიოლს ბგინაფლენდჷ, მუჟამსით ვორწყედ, მუჭო თირანდჷ ბიბლია თინეფიშ ცხოვრებას უჯგუშობაშა. ბედნერ ვორექ, ნამდა დიაჩქიმქ ხოლო იეჰოვაშ მოწმეთ გინირთჷ. თიშ გურს მანგარო შეხუ თიშ ძირაფაქ, მუჭო ითირუდ უჯგუშობაშა ჩქიმ აზროვნება დო საქციელ.

 1999 წანას ელ-სალვადორს გამკოფრთჷ ბიბლიურ სკოლა („სამეფოს მახარობელთა სკოლა“), ნამდგაქ სამქადაგებლო საქმიანობაშ ზედამხედველობაშო, მასწავლებრობაშო დო კრებაშ ოჭყიშალო მუმამზად. თიმ წანას მა დო ევგენიაქ დებქორწინით. ამდღარშახ ჩქიმ ძვირფას მეუღლეწკუმა ართო გვატემალას სრულ დროთ ვმსახურენქ.

 ასე ჩქიმ ცხოვრებას აზრ უღჷ დო მანგარ ბედნერ ვორექ. ბიბლიურ პრინციპეფიშ გიმორნაფაქ უზნეობაშე დო ძალადობაშ მონობაშე გუმათავისუფალ დო ნამდვილ ჸოროფა დო მშვიდობა ქუმოგინაფუ.