1. მუშენ აკორინ ეთიოპიაშ სამეფო კარიშ ართ მსახურს ნათუაქ?

„ამარ რე წყარი. მუ მიშალუნს ხეს დიმნათენ?“ თეცალ კითხვაქ გურჩქინდ პირველ საუკუნეს ეთიოპიაშ სამეფო კარიშ ართ მსახურს. ქრისტიან მოწაფე ფილიპექ თის წმინდა წერილეფშე  ქაძირუ, ნამდა იესო დუნაპირებ მესია რდუ. წმინდა წერილეფ უჯგუშო ქიგეგუნ თიშ უკულ, ეთიოპელს ნათუაქ აკორინ (საქმეები 8:26—36).

2. მუშენ ოკო იფიქრე სერიოზულო ნათუაშენ?

² თე წიგნიშ წოხლენ დუდეფი, ნამდგაინ იეჰოვაშ მოწმეწკუმა ჯგირო ქუგაფ ნაგურეფ-და, შილებე სი ხოლო იფიქრე: „მუ მიშალუნს ხეს დიმნათენ?“ სი უკვე ბიბლიაშე ქიგეგი, ნამდა ღორონთი მარადიულ სიცოცხლეს მოპირნა (ლუკა 23:43; გამოცხადება 21:3, 4). სი თინა ხოლო გაფუ გაგებულ, მუს იჩიებ ბიბლია ღურელეფიშ მდგომარეობაშ დო თინეფიშ გათელებაშ გურშენ (ეკლესიასტე 9:5; იოანე 5:28, 29). შილებე გილეშე კრებაშ შეხვალამეფშა, გიღდას ურთიერთობა იეჰოვაშ მოწმეეფწკუმა დო ორწყედე, ნამდა თინეფ ჭეშმარიტ რელიგიაშ მიმაჸუნალეფ რენა (იოანე 13:35). არძაშ უმოს მთავარ თინა რე, ნამდა სი უკვე ოცადუქ ქიდეახლოვე იეჰოვას.

3. ა) მუ დავალ იესოქ მუშ მიმაჸუნალეფს? ბ) მუჭო მუთმოხვადუ წყარს ნათუა?

³ მუჭო შეილებ ოძირუე, ღორონთიშ მსახურება გოკონ? იესოქ მუშ მიმაჸუნალეფს უწუ: „მეუთ დო მოწაფეებო მამზადით არძანერ რჯულიშ ხალხი, დონათით თინეფი“ (მათე 28:19). იესოქ ხოლო წყარს ინათ დო თეთ მაგალით დომტუეს. თინა წყარიშ გოჩხაპაფათ ვარდა დუდშა წყარიშ გინობუნათ ვანათე (მათე 3:16). „ნათუა“ ბერძნულ სიტყვა რე დო ნიშნენს „ნწყუალას“. თეგვარო, ქრისტიანულ ნათუაშ დროს პიროვნებაქ მთლიანო წყარს ოკო ინწყვას.

4. მუს ოძირანს კოჩ წყარს ნათუათ?

⁴ ნათუა აუცილებერ რე არძაშო, მიდგას იეჰოვაწკუმა ხოლოშიან ურთიერთობა ოკო. ნათუათ ირ კოჩის ოძირანქ, ნამდა გოკო ემსახურე იეჰოვას დო ასრულე თიშ ნება (ფსალმუნი 40:7, 8). ონათალო მიმზადენ, საჭირო რე მუსხირენ ნაბიჯიშ გინოდგუმა.

5. ა) პირველ რიგის მუ ოკო აკეთე, ონათალო მზათ რდენ? ბ) მუშენ რე აუცილებერ ქრისტიანულ შეხვალამეფშა გილულა?

⁵ სი უკვე გინმოდგუნქ პირველ ნაბიჯის. მუჭო? ბიბლიაშ რეგულარულო გურაფათ იჩინებაფუანქ იეჰოვა ღორონთის დო იესო ქრისტეს (წეკითხი იოანეშ 17:3). მარა შეილებ ხოლო მეტ ქიგეგე. ბიბლია იჩიებ, ნამდა ქრისტიანეფქ ოკო „ეიფშან [ღორონთიშ] ნებაშ ზუსტ რჩქინათ“ (კოლოსელები 1:9). თე მხარეთ მანგარო მიგეხვარებუ იეჰოვაშ მოწმეეფიშ ქრისტიანულ შეხვალამეფი. მნიშვნელოვან რე, თე შეხვალამეფიშ დასწრება (ებრაელები 10:24, 25). კრებაშ შეხვალამეფშა რეგულარულო გილულათ უმოსის გეგენქ ღორონთიშ გურშენ.

6. მუ ოკო გიჩქუდას ბიბლიაშე, ნამდა ონათალო მზათ რდენ?

⁶ ონათალო ქიჸუე მზათ თიშენ, აუცილებერ ვა რე, ბიბლია დუდშე ბოლოშა გიჩქუდას. ეთიოპიაშ სამეფო კარიშ მსახურს გვარიან მუთუნ უჩქუდ, მარა წმინდა წერილეფიშ ნამთინე ადგილიშ გაგებელო მოხვარა ოსაჭირუდ (საქმეები 8:30, 31). სი ხოლო ბრელ მუთუნს დიგურუანქ. ღორონთიშ გაჩინებაფა დღას ვეთებუნ ფერ პროცეს რე (ეკლესიასტე 3:11). ნათუაშახ საჭირო რე გიჩქუდას დო რწანდას ბიბლიაშ მთავარ გურაფეფი (ებრაელები 5:12). მაგალთო, თეცალ გურაფეფშა მიშმურს ჭეშმარიტება ღურელეფიშ მდგომარეობაშენ, ღორონთიშ სახელიშ მნიშვნელობაშენ დო თიშ სამეფოშენ.

7. მუჭო ოკო იმოქმედას ბიბლიაშ გურაფაქ სქანწკუმა?

⁷ ხვალე რჩქინა ვა ბაღ საქმეს, მუშენდა „რწმენაშ უმშო ვესიამოვნებე ღორონთშა“ (ებრაელები 11:6). ბიბლიაშე ბგებულენთ, ნამდა მუჟამს მოციქულეფქ კორინთელეფს ქუქადაგესინ, ბრელქ „ქირწმუნ“ ქრისტე დო თეშ უკულ თინეფქ „დინათეს“ (საქმეები 18:8). ბიბლიაშ გურაფაქ დუგარწმუნას ოკო, ნამდა თე წიგნი ღორონთიშ სიტყვა რე. ბიბლიაშ გურაფა  მიგეხვარებუ, ქირწმუნე ღორონთიშ არძა დუნაპირებუ დო თინა, ნამდა იესოშ მსხვერპლის შეულებ სქან გინოსკილადა (იესო ნავეს ძე 23:14; საქმეები 4:12; 2 ტიმოთე 3:16, 17).

8. მუჟამ გაკორინე ბიბლიაშე ნაგურეფუშ გურშენ შხვეფს ქეჩუე?

⁸ ჭიე-ჭიეთ, მუჭო რწმენა მუგაძინუნ თეშ, უმოსო გაკორინე ბიბლიაშე ნაგურეფ შხვეფს ხოლო ქეჩუენ (იერემია 20:9). სი უმოსო იჸუაფუქ მონდომებულ შხვეფს ხოლო ქეჩუე ღორონთშენ დო თიშ განზრახვეფიშ გურშენ (წეკითხი 2 კორინთელეფიშ 4:13).

9, 10. ა) დუდშე მიწკუმა შეილებ დიჭყე ბიბლიურ ჭეშმარიტებაშენ რაგადი? ბ) მუ ოკო აკეთე, ქუგოკო იეჰოვაშ მოწმეეფწკუმა ართო ორგანიზებულ ქადაგებაშ საქმეს მონაწილება-და?

⁹ დუდშე ბიბლიურ ჭეშმარიტებაშენ შეილებ ტაქტიანო იჩუე ნათესეფწკუმა, მეგობრეფწკუმა, მეზობელეფწკუმა დო თანამშრომელეფწკუმა. დრო ხანიშ უკულ სი ხოლო გაკორინე მონაწილება მიღე ორგანიზებულ ქადაგებაშ საქმეს იეჰოვაშ მოწმეეფწკუმა ართო. თეშ გურშენ შეილებ ქუდურაგადუე თის, მიდგა ბიბლიას გოგურუანს. ქაკმაყოფილენქ მსახურებაშო მოთხოვნეფს-და, სქან მასწავლებელწკუმა ართო კრებაშ ჟირ უხუცეს ქუდოირაგადუანს.

¹⁰ თინეფწკუმა შეხვალამა საშვალებას მერჩანს უჯგუშო გეჩინებაფუე ქრისტიან უხუცესეფი — თინეფ მიდგას ოვალ ღორონთიშ კრებაშ ჭყიშუა (საქმეები 20:28; 1 პეტრე 5:2, 3). მუჟამს უხუცესეფ ქოძირუნა, ნამდა გიჩქ დო რჯერს ბიბლიაშ მთავარ გურაფეფ, ცხოვრენქ ღორონთიშ ნორმეფით დო მართალო გოკო რდე იეჰოვაშ მოწმენ, გიწინა, ნამდა შეილებ მუჭოთ უნათუ მაუწყებელქინ თეშ იქადაგე სახიოლე ამბე.

11. მუშ კეთებაქ შილებე დესაჭირას ნამთინეს სოიშახ უნათუ მაუწყებელ იჸიდას?

¹¹ სოიშახ უნათუ მაუწყებელო გინირთუდე, შილებე მუდგარენიშ  თირუაქ გაჸუას საჭიროქ. მაგალთო, გეგნარჩქვანე თიცალ მუდგარენიშ კეთებას, ნამუსით შხვეფიშ ტყობაშე ორთუდი. ათეშ გურშენ სოიშახ უნათუ მაუწყებელო გინირთუდე, ვა გაწუხენდას ოკო თიცალ სერიოზულ ცოდეფი, მუნერით რე სექსუალურ უზნეობა, შუმილიობა დო ნარკოტიკეფიშ უბადოთ გიმორინაფა (წეკითხი 1 კორინთელეფიშ 6:9, 10; გალატელეფიშ 5:19—21).

12. მუშენ რე აუცილებერ მონანიება?

¹² ნათუაშახ შხვა მოთხოვნეფს ხოლო აკმაყოფილენდე ოკო. მოციქულ პეტრექ თქუ: „მინანით დო მიკირთით, თქვან ცოდეფქ დილასასინ თიშენ“ (საქმეები 3:19). მონანიება ნიშნენს, მუჟამს მთელ გურით ნანენქ სქან გლახა საქციელს. მონანიება ხვალე თინეფს ვასაჭირ, მით უწესოთ ცხოვრენდ. თინეფქ ხოლო ოკო მინანუან, მით შედარებით წესიერო ცხოვრენდ. მუშენ? არძა კოჩ ცოდამ რე დო ოსაჭირ ღორონთშე პატიება (რომაელები 3:23; 5:12). ბიბლიაშ გურაფაშ დოჭყაფაშახ ვაიჩქუდ, მუ რდუ ღორონთიშ ნება, ათეშგურშენ მუშო ოკო რაგად, ვა გაცხოვრებედ ირნერო ღორონთიშ მოსაწონო. თაშ ნამდა, მონანიება აუცილებერ რე.

13. მუს ნიშნენს ღორონთჸურე მიკორთა?

¹³ მონანიებაშ უკულ ღორონთჸურე მიკორთა რე საჭირო. მარა ხვალე ნანენქინ თინა ვახვარ საქმეს. საჭირო რე მიოტუე ჯვეშ გლახა საქმეეფ დო გეგნოჭყვიდე, ქიმიაჸუნე თიშ კეთებას, მუთ სწორ რე. მონანიება დო ღორონთჸურე მიკორთა აუცილებერ რე ნათუაშახ.

14. მუ მნიშვნელოვან ნაბიჯიშ გინოდგუმა რე საჭირო ნათუაშახ?

¹⁴ ნათუაშახ საჭირო რე ხოლო ართ მნიშვნელოვან ნაბიჯიშ გინოდგუმა. აუცილებერ რე იეჰოვა ღორონთშა დუდიშ მეძღვინუა.

15, 16. მუს ნიშნენს ღორონთშა დუდიშ მეძღვინუა დო მუშენ გინოდგუნს კოჩ თე ნაბიჯის?

 ¹⁵ მუჟამსით იეჰოვა ღორონთის გურგონწყუმილო ლოცვას დუდის უძღვინენქინ, თეთ სიტყვას არზენქ, ნამდა ირიათო თიშ ართგურ იჸუაფუქ (კანონი 6:15). მარა მუშენ ოკო აკორინას კოჩის თეცალ პირობაშ დოდვალაქ? ქიმიპჸონათ მაგალითი: წერმიდგინ, ნამდა ძღაბ დო ბოშ ართიანს შეხვადუნა. მუთ უმოსო იჩინებაფუანს ბოშ ძღაბისინ, თით უმოსო ორწყე თიშ ჯგირ თვისებეფს დო უმოსო ენახანტუ თინა გურშა. მუთუნ გასაკვირ ვეჸი, დრო-ხანიშ უკულ ბოშიქ თე ძღაბიშ ოსურო მოჸონაფა ქიმიკორინუ-და. მართალ რე, ოსურიშ მოჸონაფა კოჩის მეტ ოღალს გიონჯირუანს პუხუს, მარა თე მნიშვნელოვან ნაბიჯის ჸოროფა გინადგუმაფუანს.

¹⁶ მუჟამს იეჰოვას იჩინებაფუანქინ, უმოსო გეჸოროფებ თინა დო გურ გაძახ მთელ შურ დო გურით დო დუდგინოდვალირო ემსახურე თის. მიდგას ოკო ღორონთიშ სქუაშ იესო ქრისტეშ მიმაჸუნალ რდასინ, „მუშ დუდშენ ვარია“ ოკო თქუას (მარკოზი 8:34). ჩქინ დუდშენ ვარიაშ რაგად თინა იჸუაფ, მუჟამს მუთუნფერო ვა ფქიმინუნთ თის, ნამდა ჩქინ კორნებებქ დო გეგმეფქ მეცილან ღორონთიშ დაჯერას. თაშ ნამდა, ნათუაშახ ხოლო ოკო რდას ღორონთიშ ნებაშ შესრულება, არძაშ უმოს მთავარ სქან ცხოვრებას (წეკითხი 1 პეტრეშ 4:2).

17. მუშენ ისხუნუანს ნამთინე დუდ ვემუძღვინას ღორონთის?

¹⁷ ღოროთნშა დუდიშ მეძღვინუა სერიოზულ საკითხ რე, ათეშგურშენ ბრელ დუდს იკავენს თეშე. თინეფს შილებე ოშქურდან პასუხიშმგებლობეფშა, ვარდა ფიქრენდან, ნამდა ვეშიასრულებენა ღორონთიშ ნება. ათეშგურშენ ისხუნუანა დუდ ვემუძღვინან ღორონთის.

18. მუშენ გაკორინე დუდ მეუძღვინე იეჰოვას?

 ¹⁸ იეჰოვაშ ჸოროფა გინგოჭყვიდირაფუანს, დუდ ქიმუძღვინე ღორონთის დო ირნერო ეცადე მეძღვინუას ოსადაგუნ თეშ იცხოვრენ (ეკლესიასტე 5:4). მეძღვინუაშ უკულ გაკორინე, „იეჰოვაშ ღირსო გილართე თი მიზანით, ნამდა ირნერო ასიამოვნე თის“ (კოლოსელები 1:10). ღორონთი ქოიჸორს-და, დღას ვეფიქრენქ, ნამდა თიშ ნებაშ შესრულება ძნელ რე. სი ალბათ ოთანხმუქ თი სიტყვეფს, ნამუთ მოციქულ იოანექ ჭარ: „ღორონთიშ ჸოროფა თინა რე, ნამდა იფცვენდათ თიშ მცნებეფს, თიშ მცნებეფ დუმამონკებელი ვა რე“ (1 იოანე 5:3).

19. მუშენ ოკო ვა გოშქურდას, ღორონთის დუდ ქიმუძღვინენ თიშა?

¹⁹ იეჰოვას დუდ ქიმუძღვინენ თიშენ, აუცილებერ ვა რე  სრულყოფილ რდე. იეჰოვას უჩქ, მუსხი შეილებ დო ვეშეილებუნ თის დღას ვა მორთხინს (ფსალმუნი 103:14). იეჰოვას ოკო, მეძღვინუას ოსადაგუნ თეშ იცხოვრე, ათეშგურშენ თინა ხუჯის დაიკინენს დო ირნერო მიგეხვარებუ (წეკითხი ესაიაშ 41:10). დარწმუნებულ რდა, იეჰოვას მთელ გურით ქიმიენდებუქ-და, „თინა გაისწორენს შარას“ (იგავები 3:5, 6).

20. მუ ოკო აკეთე ლოცვას დუდიშ მეძღვინუაშ უკულ დო მუშენ?

²⁰ ჟიშე მოჩამილ საკითხეფშენ ფიქრიქ შილებე ქიმგეხვარას,  გეგნოჭყვიდე ლოცვას დუდ ქიმუძღვინე იეჰოვას. მარა არძაქ, მიდგას მართალო უჸორს ღორონთინ, ლოცვას დუდიშ მეძღვინუაშ უკულ თენა ირ კოჩიშ წოხლე ოკო აღიარას „გინასქილადარო“ (რომაელები 10:10). მუ ოკო აკეთე ათეშენ?

21, 22. მუჭო შეილებ ირ კოჩიშ წოხლე აღიარე სქან რწმენა?

²¹ საჭირო რე, სქან კრებაშ უხუცესეფიშ საბჭოშ კოორდინატორს ქოუწუე, ნამდა გოკო ნათუა. თინა უხუცესეფს ქუდავალენს, გენიხილან სქანწკუმა ბიბლიაშ მთავარ გურაფეფს ოხუნ ფერ კითხვეფი. ქაკმაყოფილენქ ნათუაშო აუცილებერ მოთხოვნეფს-და, უხუცესეფ ქოიწინა, ნამდა მზათ რექ ონათალო *. ნათუაშ წოხლე კითხულენა მოხსენებას, ნამუთ ნათუაშ მნიშვნელობას ოხუ. თეშ უკულ მომხსენებელ ნათუა ოკონან თინეფს თხინს, ქოუპასუხან ჟირ მარტივ კითხვას დო თეთ ირ კოჩის მუნეფიშ რწმენა ქაძირან.

²² ნათუათ შხვეფს ოძირანქ, ნამდა იეჰოვას მეუძღვინ დუდ დო იეჰოვაშ მოწმეთ გინირთინ. ნათუაშ დროს კოჩ მთლიანო ინწყუ წყარს დო თეთ ირ კოჩის ოძირანს, ნამდა თიქ დუდ მეუძღვინ იეჰოვას.

23. მუს ნიშნენს ნათუა „მუმაშ, სქუაშ დო წმინდა შურიშ სახელით“?

²³ იესოქ თქუ, ნამდა თიშ მოწაფეეფქ ოკო ინათესკო „მუმაშ, სქუაშ დო წმინდა შურიშ სახელით“ (მათე 28:19). თენა თის ნიშნენს, ნამდა ნათუა ოკონ თინა, აღიარენს იეჰოვა ღორონთიშ დო იესო ქრისტეშ ძალაუფლებას (ფსალმუნი 83:18; მათე 28:18). თის არჩქილე, მუ როლ უღუ ღორონთიშ წმინდა შურს ანუ მოქმედ ძალას (გალატელები 5:22, 23; 2 პეტრე 1:21).

24, 25. ა) მუშ სიმბოლო რე ნათუა? ბ) ნამ კითხვაშ პასუხ ოკო გებგათ?

²⁴ ნათუა უბრალოთ რიტუალ ვა რე. თის დიდ სიმბოლურ  მნიშვნელობა უღუ. წყარს ნწყუალა თიშ სიმბოლო რე, ნამდა დოღურ ჯვეშ ცხოვრებაშო. წყარშე ეშულა თის ნიშნენს, ნამდა ასე ცოცხალ რექ ღორონთიშ ნებაშ შეიოსრულებერო. ვაგგოჭყორდას, ნამდა სი იეჰოვა ღორონთის მეუძღვინ დუდ დო ვართ ხოლო მუთუნნერ საქმეს, მიზანს, კოჩის, ვარდა ორგანიზაციას. დუდიშ მეძღვინუა დო ნათუა ნიშნენს, ნამდა სი იჭყანქ იეჰოვა ღორონთწკუმა მეგობრობას დო თიწკუმა უმოსო დაახლოებას (ფსალმუნი 25:14).

²⁵ ნათუა გინოსკილადაშ გარანტიას ვა გარზენს. მოციქულ პავლექ ჭარ: „კინ ისარჯელით თქვან გინასკილადარო შიშით დო კანკალით“ (ფილიპელები 2:12). ნათუა ხვალე დაჭყაფ რე. წიმიჭკირუ კითხვა: მუჭო შეილებ ქუდოსკიდე ღორონთიშ ჸოროფას? თე წიგნიშ ბოლო დუდ ქომჩანა თე კითხვაშ პასუხის.