ᲐᲠᲥᲔᲝᲚᲝᲒᲔᲤᲥ ჯვეშ ბაბილონიშ ტერიტორიას მიოგორუეს ფეჩქის გიშაჭვილ ქიანაშ ანგურას, ნამდგათ თე ქალაქ რდჷ შენებულ. მუჭოთ არქეოლოგ რობერტ კოლდევეი იჩიებ, თე ანგურეფს გიშაჭუნდესინ თი ფეჩქეფ ქალაქიშ გალე, თიცალ დიხას რდჷ, სოდეთ ჯგირ ხარისხიშ თიხა დო ოჭვალ მასალა იშიდ.

უჯვეშაშ ჩანაწერეფშე იძირე, ნამდა თე ფეჩქეფს ბაბილონელ სახელმწიფო მოხელეეფ ხვალე ანგურეფიშ გიშაჭვალო ვარინ, გლახა მიზანით ხოლო ირინუანდეს. ასირიოლოგ პოლ-ალან ბოლიუ, ნამუთ ტორონტოშ უნივერსიტეტის პროფესორ რე, თეცალ სიტყვეფს იჩიებ: „ბაბილონურ ჩანაწერეფშე იძირე, ნამდა მეფეშ ნაზოჯინათ ფეჩქის მითაჸათანდეს დო ჭუნდეს თინეფს, მით თის ვედემორჩილებუდ ვარდა უპატიცემლობას გიმირჩქინანდჷ წმინდა მუდგარენეფიშ მიმართ“. მაგალთო, მეფე ნაბუქოდონოსორიშ დროს ჭარილ ართ წყაროს ბკითხულენთ: „განადგურით თინეფ, დაჩხირს ქიმთაჸათით, დოჭვით . . . თინეფიშ ფურკიქ ცაშახ ქანჭას, თეშ გაფურეთ ფეჩქ, ნამდა ტუტათ გინირთან“.

თე სიტყვეფ ბიბლიაშ მაკითხეს გაშინანს დანიელიშ მა-3 დუდის ინოჭარილს, სოვრეშეთ ბგებულენთ, ნამდა მეფე ნაბუქოდონოსორქ ქალაქ ბაბილონიშ გალე, დურაშ ველს, გაკეთ ქიანაშმადიდა ოქროშ ქანდაკება. მუჟამსით ღორონთიშმოშიშ სუმ ახალგაზრდაქ — შადრაქ, მეშაქ დო აბედნეგოქ თე ქანდაკებაშ წოხოლე ბირგულ ვა დაშქვეს დო თაყვან ვა ცეს თის, მეფექ ზოჯჷ, ჩვეულებრივშე „შქვითშა უმოსო გაფურესკო ფეჩქ“ დო თე სუმ ახალგაზრდა „გოთართალაფირ ფეჩქის ქიმთაჸათესკო“. მარა ღორონთიშ ძალიერ ანგელოზიქ ღურაშე დერსხჷ თინეფ (დან. 3:1—6, 19—28).

ბაბილონს ძირაფილ ანგურეფ ხოლო ამტკიცენს, ნამდა ბიბლიას მოჩამილ ინფორმაცია ზუსტ რე. თე ანგურეფიშ უმენტაშის გეჭარ სიტყვეფ, ნამუთ განადიდენს ბაბილონიშ მეფეს. მაგალთო, ართ-ართ ანგურას თეცალ მუდგარენს ბკითხულენთ: „მა, ბაბილონიშ მეფე ნაბუქოდონოსორქ . . . თე სასახლე ჩქიმ სიდიადეშ ოძირაფალო ავაშენ . . . ჩქიმ გამნარყის უმეფებდას მარადიულო თე სასახლეშე“. თე ნაჭარა მანგარო გჷ დანიელიშ 4:30-ის ინოჭარილ მეფე ნაბუქოდონოსორიშ სიტყვეფს, სოდეთ თინა ამაყას იჩიებ: „თენა თი დიდ ბაბილონ ვა რენო, ნამუთ მა, ჩქიმ ძალიერებათ ავაშენ სამეფო სასახლეთ დო ჩქიმ სიდიადეშ ოძირაფალო?!“.