მოწმეეფ ხვალე ხალხიშ მიმართ ვარინ, ჩქიმ ჯოღორეფიშ მიმართ ხოლო გიმირჩქინანდეს ყურადღებას. ართ დღას ელინქ, ნამუთ სტენდეფწკუმა გერდჷ, პეჩენიეფ ქიმეჩ ჩქიმ ტერიერეფს. თიშ უკულ, მუჟამსით ჯოღორეფს ოსეირნებშა მიდეპჸონანდჷ, თინეფ სტენდეფჸურე მიშეს, მუშენდა პეჩენიეფს ჯგირ გემო გიშუღეს.

თაშ გემკორთჷ თუთეფქ. სოიშახ ჯოღორეფ პეჩენიეფს ჭკუმუნდეს, მა იეჰოვაშ მოწმეეფწკუმა ჭიჭე ხანით იფჩიებუდ, მარა დუდის ურიდანდჷ თინეფწკუმა დაახლოებას. უკვე 70 წანას გინოჩილათირ ვორდჷ, თეს გეძინელ, ვა მიჩქუდ მუშ წანდეს იეჰოვაშ მოწმეეფს. პროტესტანტულ ეკლესიეფიშ ბრელ მუთუნ ვა მობწონდჷ, ათეშენ ფიფქრენდჷ, ნამდა არძაშ უჯგუშ იჸუაფუდ ბიბლია ჩქიმით გეგმომრკვიებუდკო.

თი პერიოდის ქალაქიშ შხვა ნაწილს ხოლო ქეშეფხვად სტენდეფწკუმა იეჰოვაშ მოწმეეფს. თინეფ ხოლო მანგარ მეგობრულეფ რდეს დო ჩქიმ არძა კითხვას ბიბლიაშე პასუხენდეს. თექ თინეფიშ მიმართ ნდობა გომრჩქინ.

ართ დღას ელინქ ბკითხჷ: „ქორჯერანო, ნამდა ცხოველეფ ღორონთიშ საჩუქარ რე?“. მა უპასუხ: „მუშო ოკო რაგად, ქო!“. თეშ უკულ ელინქ გეშამკითხჷ ესაიაშ 11:6—9. თექ ბიბლიაშ გურშენ უმოს მეტიშ გაგებაშ სურვილ გომრჩქინ, მარა თინეფშა ლიტერატურა იშენით ვეგწომღალ.

უკულიან დღალეფს მოკლე, მარა მანგარ საინტერესო ჩიება მიღუდ ელინ დო თიშ ქომონჯ ბრენტწკუმა. თინეფქ ელამჩეს ბიბლია მათეშე საქმეეფშახ წებკითხიკო, ნამდა ქობძირკო, მუს ნიშნენს ქრისტეშ მაგალითიშ მეჸუნა. მა ხოლო ქუდუჯერ. თეშ უკულ ბრელ ხანს ვემკურთუმ დო ბიბლიაშ გურაფა ქიდიბჭყჷ ბრენტ დო ელინწკუმა. თენა რდჷ 2016 წანაშ ზაფხულს.

მანგარო მობწონდჷ ირმარას ბიბლიაშ გურაფა დო იეჰოვაშ მოწმეეფიშ დარბაზის შეხვალამეფიშ დასწრება. დუდის ბედნერო ბგინაფლენდჷ თიშენ, ნამდა ბგებულენდჷ, მუს იჩიებ ბიბლია სინამდვილეს. ართ წანაშე ჭიჭე მეტ ხანიშ უკულ იეჰოვაშ ნათილ მოწმეთ გინიფრთჷ. ასე 79 წანერ ვორექ დო მიჩქჷ, ნამდა სწორ შარას გეპჸუნქ. იეჰოვაქ მაკურთხჷ თით, ნამდა მუჩჷ საშვალება მუშ მეძღვინელ მსახურეფიშ ოჯახის პჸოფედიკო».