Romanu 12:1-21
12 Ĩsisãnawã norĩ, ꞌRe ihâimana uꞌâsi mono hã e waꞌãma ꞌre pẽꞌẽzé mono õ di, waꞌãma ꞌre isiwãrĩ mono zéb da hã. Waꞌãma ꞌre ipẽꞌẽzé mono zé hã, tãma saꞌẽtẽ uptabi di. Tahawa, wa za oto aima roti pese zaꞌra waꞌwa, ãne na hã. ꞌRe ihâimana uꞌâsi mono ma si, te za ꞌre asisõmri uꞌâsi zaꞌra waꞌaba mo, tiwi ꞌre asisawi zaꞌra waꞌaba mono ãna. Taha ma si, te za aiwẽ uptabi na tãma ꞌre aihâimana zaꞌra waꞌaba mo, te te ꞌre aiꞌmadâꞌâ wẽ uꞌâsi zaꞌra waꞌaba mono da. Ãhã zarina, ãma ꞌre anomro wẽ uꞌâsi aba mono wamhã, taha si tô sena, ãma ꞌre iꞌaiwata zaꞌra waꞌaba mono zé hã.
2 Tiꞌai ãma dahâimana wasété na ꞌre idanomro mono norĩ ãma hã, ꞌre sasõmri zaꞌra waꞌaba mono õ di za. ꞌRe ihâimana uꞌâsi mono wi si, te za ꞌre irowaptẽrẽ uꞌâsi zaꞌra waꞌaba mo, asimirosaꞌrata wẽ na si, aipẽꞌẽ ꞌre, ꞌre aihâimana zaꞌra waꞌaba mono zé hã te te aima ꞌre pisutu zaꞌra waꞌaba mono da, ꞌre aihâimana zaꞌra waꞌaba mono zép tém na si, oto ꞌre anomro aba mono da. Tawapsi te za ꞌRe ihâimana uꞌâsi mono, te te aima ꞌre ipisutu zaꞌra waꞌaba mono hã asina ꞌre iwaihuꞌu pese zaꞌra waꞌaba mo, marĩ iwẽ si tãma ꞌre iꞌmanharĩ zaꞌra waꞌaba mono zém na hã.
3 ꞌRe ihâimana uꞌâsi mono hã tinhimizawi pese zéb zarina, ma tô ĩpisutu, isadawa wasuꞌuꞌwa na oto ꞌre ĩhâimana mono da. Tahawa, wa za oto ãne na aima roti pese zaꞌra waꞌwa. Dama aipire na, duré dama aiwẽ na ꞌre aihâimana zaꞌra waꞌaba mono õ nherẽ, ꞌrâwi aipire na ꞌre asiꞌmadâꞌâ zaꞌra waꞌaba mono õ di za. ꞌRe ihâimana uꞌâsi mono, ma tô te te sima ꞌre aipisutu zaꞌra waꞌwa, õhõ ãma si oto ꞌre anomro aba mono da. Tane nherẽ, aihĩni isazeiꞌwa, asiré ꞌre anomro aba mono nherẽ, niꞌwam norĩ si te isazei pese ꞌwa hã ꞌre hâimana zaꞌra. Duré niꞌwam norĩ hã isazei prãi ꞌwa, te ꞌre hâimana zaꞌra. Isazei prãi ꞌwa norĩ hã ꞌre sazei pese zaꞌra waꞌaba mono newa, ꞌrâwi asiꞌãma ꞌre rosaꞌrata zaꞌra waꞌaba mono õ di za, ꞌre sazei pese zaꞌra waꞌaba mono õ nherẽ.
4 Dahâiba misi nherẽ, dahâiba na marĩ hã dama ꞌre ihâimana zaꞌra mono hã ahâ di, tite mono bâ te te ꞌre iromhuri zaꞌra mono zéb da hã, dapara norĩ hã duré danhibꞌrada, duré dato, uburé iré ꞌre idahâimana zaꞌra mono hã.
5 Tane hã wa oto wa norĩ hã wasiré isazeiꞌwa norĩ hã Cristuhu ãma, waꞌahâ nherẽ, ꞌre wahâimana zaꞌra, simisutu. Dahâiba misi nherẽ, dahâiba na marĩ hã ahâ na dama ꞌre ihâimana zaꞌra mono hã, tite mono bâ te te ꞌre iromhuri zaꞌra mono ne, wa oto wa norĩ hã wasiré isazeiꞌwa norĩ hã wanhimiromhuri mono bâ sipuꞌu pese na, wa te ꞌre romhuri zaꞌra, ꞌRe ihâimana uꞌâsi mono ma, dahâiba misi na ꞌre idahâimana zaꞌra mono ne, simisutu wasiré ꞌre wahâimana zaꞌra mono wa oto.
6 Tahawa, ꞌRe ihâimana uꞌâsi mono hã simizawi pese uptabi wa, romhuri te te wama ꞌre iꞌapisutu mono zéb zarina, wasipuꞌu pese na, wa za wa te tãma ꞌre romhuri zaꞌra, wate mono bâ, ãma ꞌre iwasipawaptob zaꞌra mono zéb da hã. ꞌRe ihâimana uꞌâsi mono zadawa wasuꞌu na, sena na isazeiꞌwa norĩ ma si te te ãma ꞌre irowasuꞌu zaꞌra mono zéb da, te te sima ꞌre waꞌapisutu mono wamhã, taha zarina si, wa za tô ãma ꞌre wasipawaptob uꞌâsi zaꞌra. Isimiroti zarina si, wa za wa te ꞌre sadawa wasuꞌu zaꞌra, wasiré isazeiꞌwa norĩ ma.
7 Duré niꞌwam norĩ hã isazeiꞌwa norĩ pawaptoꞌwa da, te te sima ꞌre apisutu mono wamhã, ta norĩ zama te za tô taha zarina si te te tãma ꞌre dapawaptob uꞌâsi zaꞌra. Duré ꞌRe ihâimana uꞌâsi mono nhimiroti na dama rowahutuꞌwa da, te te sima ꞌre iꞌapisutu mono norĩ hã te za tô ta norĩ zama isarina si te te ãma ꞌre dapawaptob zaꞌra.
8 Duré niꞌwam norĩ hã ꞌRe ihâimana uꞌâsi mono hã te te sima ꞌre apisutu mono wamhã, te za isazeiꞌwa norĩ ma, isimiroti zarina si te te ꞌre rowahutu zaꞌra, te te ꞌre wapari zaꞌra mono wa, pẽꞌẽ toi uꞌâsi, ãma ꞌre hâimana zaꞌra mono da, siptete sina. Duré niꞌwam norĩ hã tinhibrom na dama ꞌre sõprub zaꞌra mono da, te te sima ꞌre apisutu mono wamhã, te za tô ta norĩ hã dawi ꞌre sõti zaꞌra mono ãna, dama ãma ꞌre sõprub zaꞌra, saꞌẽtẽ na. Duré niꞌwam norĩ hã isazeiꞌwa norĩ ꞌmadâꞌâꞌwa da, te te ꞌre apisutu mono wamhã, te za tô simiꞌẽ na te te ꞌre ꞌmadâꞌâ uꞌâsi zaꞌra, ta norĩ zama. Duré niꞌwam norĩ hã te te sima ꞌre apisutu mono wamhã, ta norĩ zama te za daꞌãma ꞌre pẽꞌẽzé zaꞌra, dahâzé ré norĩ ãma, duré dawi ꞌre irobzeiꞌõ zaꞌra mono norĩ ãma. To sina, te za ãne zarina te te ꞌre dapawaptob zaꞌra, ta norĩ hã. Ãne wa za wa te wasima ꞌre robꞌmaꞌwamarĩ, romhuri mono bâ, dahâiba hã misi nherẽ, dahâiba na marĩ hã ahâ na dama ꞌre ihâimana zaꞌra mono hã tite mono bâ te te sima ꞌre iromhuri zaꞌra mono ne.
9 Taré asimizawizé hã aima ꞌre hâimana zaꞌra waꞌaba mono tõ da, te za tô sena na asimizawi pese zé hã aima ꞌre hâimana uꞌâsi zaꞌra waꞌwa. Uburé marĩ wasété nhiti, te za ꞌre aihâimana zaꞌra waꞌaba mo, asiwi ꞌre wẽꞌõ pese zaꞌra waꞌaba mono sina. Uburé aihâimanazé iwẽ na si te za oto ꞌre aihâimana zaꞌra waꞌaba mo.
10 Dasisãnawãi uptabi ꞌre idasisawi pese zaꞌra mono ne, te za a norĩ waꞌwa hã ꞌre asisawi pese zaꞌra waꞌaba mo, Cristuhu ãma asisãnawã oto asiré ꞌre aihâimana zaꞌra waꞌaba mono wa. Te za duré ꞌre asiwazé pese zaꞌra waꞌaba mo.
11 Aiwaꞌa ãna, te za duré ꞌre iromhuri pese zaꞌra waꞌaba mo. Wanhibꞌapito ma si, te za asimiꞌẽi uptabi na ꞌre iromhuri uꞌâsi zaꞌra waꞌaba mo, aihâiba tiwi ꞌre sawi zaꞌra waꞌaba mono ãna.
12 Uburé marĩ iwẽ hã ꞌRe ihâimana uꞌâsi mono, za te te wama ꞌre iꞌapisutu mono zéb zô, wa za wanhimipari nhimiꞌẽ na sô ꞌre wahâimana zaꞌra, wato sina. Zezusihi zazeiꞌwa oto ꞌre anomro aba mono wa, da te ꞌre aiꞌruiwapari zaꞌra waꞌaba mono nherẽ, te za asiptete sina ãma ꞌre anomro uꞌâsi aba mo. ꞌRe ihâimana uꞌâsi mono ma, te za ꞌre aimreme zusi uꞌâsi aba mo.
13 Asiré isazeiꞌwa norĩ wi, marĩ zô tiwi ꞌre irowaptâꞌâ zaꞌra mono zéb zarina, te za asimarĩ na ꞌre ipawaptob zaꞌra waꞌaba mo. Duré darob amoi hawi atẽme waꞌaba ꞌre dasihutu mono wamhã, te za sô ꞌre atobꞌuzu zaꞌra waꞌaba mo, asiré isazeiꞌwa norĩ zô hã, asõrõwa u ꞌre ꞌmazasi zaꞌra waꞌaba mono da.
14 ꞌRe rowaptẽrẽ zaꞌra waꞌaba mono, ꞌRe ihâimana uꞌâsi mono wi, te te aima ꞌre irobꞌmanharĩ wasété zaꞌra waꞌaba mono norĩ hã te te ꞌre apawapto wẽ mono da. Rowẽ hã te te tãma ꞌre iꞌapisutu mono da si, te za tãma ãma ꞌre aimreme zusi aba mo, ropipa hã te te tãma ꞌre apisutu mono tõ da.
15 Niꞌwam norĩ hã toi uptabi na ꞌre hâimana zaꞌra mono wamhã, isine te za ꞌre atoi uptabi zaꞌra waꞌaba mo, isiré. Duré niꞌwam norĩ hã pẽꞌẽzé uptabi na ꞌre hâimana zaꞌra mono wamhã, isine te za duré aipẽꞌẽzé uptabi na isarina ꞌre aihâimana zaꞌra waꞌaba mo.
16 Duré simisutu te za asimirosaꞌrata na ꞌre asisazei pese zaꞌra waꞌaba mo, asiré isazeiꞌwa nherẽ, asisada ꞌre rosaꞌrata wasété zaꞌra waꞌaba mono tõ da. Duré aiwẽ na ꞌrâwi asina ꞌre aiwata zaꞌra waꞌaba mono õ di za. Duré dama ipire norĩ zapari, marĩ na romhuri wapu na da te dasima ꞌre iromhuri zaꞌra mono zé hã asiwi ꞌre wẽꞌõ zaꞌra waꞌaba mono õ di za, ꞌre ꞌmanharĩ zaꞌra waꞌaba mono tõ da. Duré asiré norĩ nhipai u aiwaihuꞌu pese na ꞌrâwi asiꞌãma ꞌre rosaꞌrata zaꞌra waꞌaba mono õ di za.
17 Duré da te aima ꞌre robꞌmanharĩ wasété zaꞌra waꞌaba mono wamhã, asa dama ãma ꞌre waꞌrãmi wasété zaꞌra waꞌaba mono õ di za, aiwab da. Marĩ iwẽ si ꞌre iꞌmanharĩ zaꞌra waꞌaba mono na si, te za asima ꞌre asõpré uꞌâsi aba mo, isazeiꞌwa ꞌre anomro aba mono wa, da te aiꞌãma ꞌre rosaꞌrata wasété zaꞌra waꞌaba mono tõ da.
18 Asada ꞌre dahâimana zaꞌra waꞌaba mono nherẽ, rowẽ na si dasiré ꞌre aihâimana uꞌâsi zaꞌra waꞌaba mono da, te za asina ꞌre irosaꞌrata wẽ uꞌâsi zaꞌra waꞌaba mo.
19 Ĩsisãnawã ĩma asawi pese aba norĩ, da te aima ꞌre robꞌmanharĩ wasété zaꞌra waꞌaba mono wamhã, ꞌRe ihâimana uꞌâsi mono upana asiꞌuihâ na ꞌrâwi ꞌre asiꞌruiwaꞌâbâ zaꞌra waꞌaba mono õ di za. Taha si, tinhimihâzém na te te ꞌre aiꞌruiwaꞌâbâ zaꞌra waꞌaba mono da, te za õhõ si ꞌre iꞌmadâꞌâ zaꞌra waꞌaba mo. Duréihã ãne na ma tô Wanhibꞌapito mreme na robꞌuiꞌéré, Mozési hã:
“Wa hã ĩsiwaprosi, wa za te ꞌre daꞌaꞌruiwaꞌâbâ. Ĩwétési, wa za te dama ãma ꞌre awaꞌrãmi, marĩ, da te ꞌre iꞌmanharĩ wasété zaꞌra mono zém na hã.”
20 Duré ãne ꞌRe ihâimana uꞌâsi mono nhimiroti amo na robꞌuiꞌéré wasuꞌu hã:
“Asitobꞌru norĩ hã mra te te ꞌre sépata zaꞌra mono wamhã, isa na te za ꞌre ipawaptob zaꞌra waꞌaba mo. Duré ꞌrubu wamhã, te za tãma ꞌre iꞌõb zaꞌra waꞌaba mo. Ãne zarina, asitobꞌru norĩ ma, ꞌre ꞌmanharĩ wẽ zaꞌra waꞌaba mono wamhã, ta norĩ hã ꞌrâwi ꞌre siwaihuꞌu zaꞌra mono wa, te za aima ꞌre siséb zaꞌra waꞌwa.”
Ãhã zarina si te za dama ꞌre iꞌmanharĩ wẽ uꞌâsi zaꞌra waꞌaba mo. Tahawa, a norĩ waꞌwa hã ꞌrâwi asiꞌuihâ na ꞌre asiꞌruiwaꞌâbâ zaꞌra waꞌaba mono õ di za.
21 Ãhã wasuꞌu na, wa za oto ĩnhimirowasuꞌu na hã aima ꞌrãsutu zaꞌra waꞌwa. ꞌRâwi dasiꞌuihâ na ꞌre idasiꞌruiwaꞌâbâ zaꞌra mono zém na hã daꞌãma ꞌre sasõmri zaꞌra waꞌaba mono õ di za. Marĩ iwẽ si te za dama ꞌre iꞌmanharĩ wẽ uꞌâsi zaꞌra waꞌaba mo, taha na dahâimana wasédé hã dawi ꞌre uprosi zaꞌra waꞌaba mono da, duré taha zarina, tô sena oto aiꞌãma ꞌre dasiwadi zaꞌra waꞌaba mono da.
