Zuã 3:1-36
3 Aibâ hã te ꞌre hâimana farizeu, Nicodemosi na isisi hã. Ta hã rotiꞌwa, Zudeu norĩ ma hã.
2 Nimahã mara na Zezusihi u ma tô mo. Ãne te tãma tinha:
— Rowahutuꞌwa, wa tô aiwaihuꞌu zaꞌra ni, a hã rowahutuꞌwa ꞌRe ihâimana uꞌâsi mono we te te iꞌasatõrĩ na hã, e marĩ wa, niꞌwa hã marĩ te te ꞌmanharĩ waihuꞌu õ di, marĩ dama iꞌmanharĩ waihuꞌu õ ꞌre iꞌabꞌmanharĩ mono hã ꞌRe ihâimana uꞌâsi mono isiré hâimana õ wamhã.
3 Tawamhã Zezusi hã ma ãma sadaꞌâ, ãne:
— Tô sena, wa za ãne aima waihuꞌu: Niꞌwa hã poto téb õ wamhã, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb ãma hã ꞌre hâimana mono õ di za.
4 Tawamhã Nicodemosi hã ma tô ãma sadanha, ãne:
— E niha te za aibâ hã tipoto té, siꞌihi nherẽ. E apâ te za ãzé tina diꞌi ꞌre, duré poto téb da hã.
5 Tawamhã Zezusi ma tãma waihuꞌu, ãne:
— Tô sena, wa za ãne aima waihuꞌu: Niꞌwa hã ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb u sébré õ di za, â na poto téb õ nherẽ, duré Ipẽꞌẽzani na.
6 Niꞌwa hã tiꞌai ãma damama ꞌra na poto wamhã, tiꞌai ãma timama sipoto na te za tô ꞌre hâimana. Tane duré, niꞌwa hã ꞌRe ihâimana uꞌâsi mono Pẽꞌẽzani na poto té wamhã, te za oto ipẽꞌẽzani isiꞌutõrĩꞌõ iwẽ ré ꞌre hâimana.
7 Tahawa aꞌrãmi tõ, te aima inharĩzé ma hã. E marĩ wa. Tô iꞌru zahi, ꞌre iꞌaipoto téb zaꞌra waꞌaba mono da hã.
8 Rowaꞌu hã te za rowapõ, te te sima iwẽzéb zarina. Wapari pibui pese di, te te irobruruꞌuzé hã. Tane nherẽ, waihuꞌu õ di, nima hawi isãnaꞌratazé hã duré nimomo iꞌrãsutuzé hã. Tane te duré ꞌre romhâimana ꞌRe ihâimana uꞌâsi mono Pẽꞌẽzani na ꞌre ipoto téb zaꞌra mono norĩ ãma hã.
9 Tawamhã Nicodemosi hã te ãma sadanha, ãne:
— E niha tane hã.
10 Zezusi ma sadaꞌâ, ãne:
— A hã rowahutuꞌwa, Izaraéu nhihudu norĩ ma hã. E niha tane nherẽ, ã norĩ hã sadaihuꞌu zaꞌra õ di.
11 Tô sena, wa za ãne aima waihuꞌu: Wama iwaihuꞌu pese zarina, wa wa te ꞌre nharĩ zaꞌra. Duré wa wa te ꞌre wasuꞌu zaꞌra, wa te ꞌre iꞌmadâꞌâ zaꞌra mono hã. Tane nherẽ, a norĩ waꞌwa hã wanhimirowasuꞌu na ꞌre wazaze zaꞌra waꞌaba mono õ di.
12 Tiꞌai ãma ꞌre iromhâimana zaꞌra mono zém na te aima rowasuꞌu zaꞌra waꞌaba nherẽ, ãma ĩzaze zaꞌra waꞌaba õ di. E niha te za bété tawamhã ĩzaze zaꞌra waꞌwa, hâiwa ãma marĩ ꞌre ihâimana zaꞌra mono zém na te aima rowasuꞌu zaꞌra waꞌaba wamhã.
13 Niꞌwa, niwamhã hâiwa u hã sébré õ di, Tiꞌai ãma Dasiré Ipoto upana hã. Taha si ma tô wei mo, hâiwa hawi.
14 — Mozési hã rop si ꞌre irosaꞌwari mono ãma, wahi ꞌmanharĩ ẽtẽ topsada brõzi ꞌmanharĩ hã te te isasõmri ne, tane Tiꞌai ãma Dasiré Ipodo hã iꞌru zahi, da te dasiwi isasõmri da hã,
15 uburé niꞌwam norĩ hã te te ꞌre saze zaꞌra mono wa, dahâimanazé isiꞌutõrĩꞌõ hã te te sina ꞌre uwaimrami zaꞌra mono da.
16 ꞌRe ihâimana uꞌâsi mono ma, tiꞌai ãma ꞌre idahâimana zaꞌra mono hã tãma dazawi pese uptabi wa, ma tô Tiꞌra hã misi nherẽ we satõ, uburé te te ꞌre isaze zaꞌra mono hã ꞌre dâꞌâ zaꞌra mono tõ da, dâꞌâ ãna ꞌre siꞌubumroi uꞌâsi mono da.
17 ꞌRe ihâimana uꞌâsi mono ma tô tiꞌra hã we satõ tiꞌai u, te te ꞌre daꞌanhoꞌreptui mono da. Te te ꞌre daꞌahâ zaꞌra mono da, we te te satõrĩ õ di.
18 — Niꞌwa hã Iꞌra te te sazei wamhã, tinhimihâzé hã te te tãma pisutu õ di za, ꞌRe ihâimana uꞌâsi mono hã. Tazahã, niꞌwa te te sazei õ wamhã, ma tô tinhimihâzé hã tãma pisutu siro, te te sazei õ wa, ꞌRe ihâimana uꞌâsi mono ꞌra, misi pese ꞌre ihâimana mono hã.
19 Ãne daꞌãma rowairébézé hã: ꞌRe ihâimana uꞌâsi mono hã tiꞌai u ma tô we datẽme satõ, rowaꞌa hã. Tane nherẽ, robra si ma tô dasima sawi zaꞌra ni. E marĩ wa. Marĩ, da te ꞌre iꞌmanharĩ zaꞌra mono hã iwasété si wa.
20 Niꞌwa hã marĩ iwasédé te te ꞌre abꞌmanharĩ mono wamhã, rowaꞌa hã tãma ꞌru ti. Rowaꞌa u te te sina irotété da hã, te te sima wẽ õ di, marĩ te te ꞌre iꞌabꞌmanharĩ wasété mono zé hã da te tiwi waihuꞌu zaꞌra tõ da.
21 Tazahã, niꞌwa tô sena na marĩ te te ꞌre abꞌmanharĩ mono wamhã, te za rowaꞌa u sina rotété, ihâimanazé hã sõꞌawi da te ꞌmadâꞌâ zaꞌra da, iꞌuwaibaba ꞌre ihâimana mono na hã, ꞌRe ihâimana uꞌâsi mono te te sima ꞌre iwẽ mono zéb zarina.
Zezusi duré Zuã Batista
22 Ãne parimhã, Zezusi hã ma tô mo. Duré isiré ꞌre inomro mono norĩ zama ma tô isiré aiꞌabaꞌré, Zudéa na danhiptiꞌa nhoꞌõmo nhisi u. Tame ma tô niha bâtâ na tihâiba. Â dawabzuri hã ma tô duré dama abꞌmanha.
23 Zuã Batista hã te duré â dawabzuri hã dama abꞌmanha, Eno ãma, Salĩ ꞌratamhã, tamemhã â zaꞌẽtẽ wa. Tamomo ma tô itẽme aiꞌabaꞌré ni.
24 (Ã hã, zahadu Zuã hã dazazéb ꞌre, da te sẽrẽ õ ré hã.)
25 Zuãhã siré ꞌre inomro mono norĩ nima norĩ hã ma tô siwi sadaꞌâ Zudeu, ꞌRe ihâimana uꞌâsi mono ma, ꞌre idasihâiba pese zaꞌra mono zém na.
26 Tahawa, Zuã Batistaha u ma tô aiꞌabaꞌré. Ãne te tãma rowasuꞌu zaꞌra:
— Rowahutuꞌwa, Zodã zara niwĩ aihâimana ré, aibâ asiré ihâimana hã duré dama iwasuꞌu hã, â dawabzuri te dama abꞌmanha. Daꞌahâ na te uburé itẽme aiꞌabaꞌré ni.
27 Tawamhã Zuã ma sadaꞌâbâ zaꞌra, ãne:
— Niꞌwai ma marĩ hã hâimana waihuꞌu õ di, ꞌRe ihâimana uꞌâsi mono te te tãma pisutu õ nherẽ.
28 Asõꞌa zaꞌra waꞌaba, wa tô tinha, ãne hã: “Wa hã Cristu õ di. Wa hã, isõwa, ꞌRe ihâimana uꞌâsi mono we te te ĩzatõrĩ, bâdâdi te sô saꞌra pese da.” Ãne na hã aima ĩsiwasuꞌu zaꞌra waꞌaba zém na hã ma tô aré ĩwapari zaꞌra waꞌwa.
29 Dasina damro ãma, piꞌõ hã za aibâ, ãma imro te hã. Aibâ za imro siwaihu hã isiré te tihâiba. Te za wapa imreme. Te za duré ãma sima rowẽ, imreme te te wapari wamhã. Ãne, Zezusihi ãma iromhâimanazém na hã ãma ĩma rowẽ uptabi di.
30 Tô ta hã te te sina ihâimo uꞌâsi da si, pire na ꞌre ihâimana mono zém na hã. Duré wa hã ĩpire na te ĩsina itiꞌawi uꞌâsi da si, iwaꞌrãmi.
Hâiwa hawi we imorĩ si, uburé danhipai u ipire uptabi hã
31 Hâiwa hawi we imorĩ hã, uburé danhipai u pire uptabi di. Niꞌwa hã tiꞌai ãma aꞌuwẽ wamhã, ta hã te za te te ꞌre rowasuꞌu, tiꞌai ãma marĩ ꞌre ihâimana zaꞌra mono na. Hâiwa hawi we imorĩ si, uburé danhipai u pire uptabi di.
32 Ta hã te te ꞌre rowasuꞌu, te te ꞌre irobꞌmadâꞌâ mono zém na, duré te te ꞌre iwapari mono zém na zama. Tane nherẽ, niꞌwa te te sazei õ di, isimirowasuꞌu na hã.
33 Niꞌwa hã isimirowasuꞌu na te te sazei wamhã, ꞌRe ihâimana uꞌâsi mono mreme tô sena ꞌre ihâimana mono na, te za tô sena na waihuꞌu zaꞌra ni.
34 Ta hã ꞌRe ihâimana uꞌâsi mono we te te isatõrĩ hã, ꞌRe ihâimana uꞌâsi mono mreme zarina, te te ꞌre rowasuꞌu. E marĩ wa. ꞌRe ihâimana uꞌâsi mono hã Tipẽꞌẽzani saꞌẽtẽ uptabi na te te ꞌre anhomri mono wa, wahuré.
35 Imama hã Tiꞌra te te ꞌre sawi pese. Tahawa, uburé marĩ hã isibꞌrata ma tô tãma sõmri zaꞌra.
36 Tahawa, niꞌwa hã Iꞌra te te sazei wamhã, dahâimanazé isiꞌutõrĩꞌõ te za sina uwaimra. Tazahã, niꞌwa te te wẽꞌõ wamhã, dahâimanazé isiꞌutõrĩꞌõ tãma ihâimana da hã, mare di. ꞌRe ihâimana uꞌâsi mono nhimihâzép si te za te te ꞌre sépata uꞌâsi.
