Éfézu 4:1-32
4 Tahawa, wa za aima roti zaꞌra waꞌwa, Wanhibꞌapito ma romhuriꞌwa ꞌre ĩmorĩ ꞌru te, dazazéb ꞌre da te dasiwi ꞌre ĩzai mono wa, ꞌre ĩza mono ré. Maꞌãpé dama ꞌre aihâimana wẽ zaꞌra waꞌaba mono za, ꞌRe ihâimana uꞌâsi mono te te sima ꞌre iꞌaiwẽ zaꞌra waꞌaba mono zéb uwaibaba. Taha da, ma tô te te sima ꞌre aipisutu zaꞌra waꞌwa.
2 Ãne te za ꞌre anomro aba mo. Aipire na asina ꞌre asõpré waꞌaba mono õ di za. Duré aiwamri aihâimana atãma na te za dama ꞌre aihâimana zaꞌra waꞌaba mo, aihâimana wẽ sina.
3 Wamama hã ma tô Tipẽꞌẽzani na te te wama ꞌre anharĩ, rowẽ na oto wasiré ꞌre wanomro mono da. Tahawa, ãne ꞌre aihâimana uꞌâsi zaꞌra waꞌaba mono da, te za ꞌrâwi asina ꞌre asõpré uꞌâsi aba mo.
4 Cristuhu nhibꞌaꞌuwẽ mono bâ misi dahâiba ne, wa simisutu oto ꞌre wahâimana zaꞌra. Misi te Ipẽꞌẽzani hã ꞌre hâimana. Taha si te wama ꞌre hâimana zaꞌra, wapẽꞌẽ mono bâ. Duré õhõ zô si wa ꞌre wanhimipari zaꞌra oto, rowẽ uptabi zô. Taha zô ꞌre asimipari zaꞌra waꞌaba mono da, ma tô tinhibꞌaꞌuwẽ da, aipisutu zaꞌra waꞌwa, ꞌRe ihâimana uꞌâsi mono hã.
5 Õhõ si, te Danhibꞌapito ꞌre hâimana. Misi te dama iꞌumnhasi uptabi ꞌre hâimana, da te ãma ꞌre isaze zaꞌra mono zéb da hã. Õhõ zadawa parap si, te â dawabzuri hã da te ꞌre ꞌmanharĩ zaꞌra.
6 Õhõ si uburé Damama te ꞌre hâimana, ꞌRe ihâimana uꞌâsi mono hã. Õhõ si te duré danhipai u ropâ ꞌre hâimana. Te duré wapẽꞌẽ mono bâ wapẽꞌẽ ꞌreb zaꞌra hã oto ꞌre sãmra.
7 Cristu hã ma tô marĩ iwẽ na iꞌmadâꞌâ waihuꞌu õ na wama ꞌre sõprub zaꞌra, wahâiba mono bâ, te te wama ꞌre iꞌapisutu mono zéb zarina, wa te tãma ꞌre idapawaptob zaꞌra mono zéb da hã.
8 Duréihã ma tô ãne na robꞌuiꞌéré ni, ibaihâ na hã:
“Hâimo oto dawi watobro wa, morĩ wamhã, ma tô sisarina daꞌahâ na te te danhimro. Marĩ iwẽ na ma tô duré dama ꞌre sõpru.”
9 E marĩ te tawamhã wasuꞌu, hâimo imorĩzé hã. Ãne te wasuꞌu: Ma tô siꞌra tiꞌai ꞌrowi uptabi, adâ ꞌre ihâimana zaꞌra mono zéb u.
10 Tiꞌai u we imorĩ hã ma tô apâ mo, hâiwa nhipai u ropâ uburé daꞌmadâꞌâꞌwa dama ꞌre hâimana mono da.
11 Cristu hã ma tô niꞌwam norĩ hã pisutu zaꞌra, isadawa wasuꞌuꞌwa ꞌre nomro mono da. Niꞌwam norĩ ma, ma tô duré pisutu zaꞌra, marĩ te te tãma iwaihuꞌu zaꞌra zéb zarina, ꞌRe ihâimana uꞌâsi mono te te ꞌre sadawa wasuꞌu zaꞌra mono da, isazeiꞌwa norĩ ma. Duré niꞌwam norĩ hã ma tô pisutu zaꞌra, iwasuꞌuwẽ na te te ꞌre dapoꞌre puꞌu zaꞌra mono da. Duré niꞌwam norĩ hã ma tô pisutu zaꞌra, dama rowahutuꞌwa da, isimiroti na te te ꞌre dapawaptob zaꞌra mono da, ãma ꞌre dahâimana wẽ zaꞌra mono da.
12 Ãne ma tô Cristu hã daꞌapisutu, ꞌRe ihâimana uꞌâsi mono nhibꞌaꞌuwẽ norĩ te te ꞌre pawaptob zaꞌra mono da, taha zarina ꞌre sipawapto pese zaꞌra mono wa, siptete sina duré oto ꞌre hâimana zaꞌra mono da.
13 Tawamhã aihĩni wa za oto wanhimirosaꞌrata na wasina wa te ꞌre sazei pese zaꞌra, Wanhibꞌapito wasuꞌuwẽ hã wa te ãma ꞌre isaze zaꞌra mono zém na hã. Duré aihĩni wa za oto ꞌrâwi wa te ꞌre waihuꞌu zaꞌra, ꞌRe ihâimana uꞌâsi mono ꞌra hã, niha ꞌre ihâimana mono na. Ãne wamhã, wahâimana wẽ zé, wa za wasima wa te ꞌre saꞌẽtẽ zaꞌra. Tawamhã wa za oto wasina wa te ꞌre uwaimrami zaꞌra, Cristuhu ne ꞌre iwanomro wẽ uptabi mono zé hã.
14 Ãne wamhã, aiꞌuté ne wanhimizaꞌrese ãna ꞌre wanomro mono õ di za oto. Tawamhã dazadawa nhipese na da te wama ꞌre roti zaꞌra mono nherẽ, roti tô senaiꞌõ hã wa te ꞌre wapari zaꞌra mono õ wa, roti tô senaiꞌõ niwĩ ꞌre wasipizari zaꞌra mono õ di za.
15 Wa norĩ hã roti tô sena na si, wa za wasima wa te ꞌre roti zaꞌra, ꞌre wasisawi pese zaꞌra mono sina. Ãne wamhã, wahâimana wẽ na, wa za wa te ꞌre saꞌẽtẽ zaꞌra. Tawamhã wa za oto wa te wasina ꞌre uwaimrami zaꞌra, Cristuhu ne ꞌre iwanomro wẽ uptabi mono zé hã, Wanhibꞌapito ne.
16 Marĩ mono bâ wahâiba bâ wama ꞌre hâimana zaꞌra mono nherẽ, wa za waꞌrã zadawa para si marĩ hã wa te ꞌre ꞌmanharĩ zaꞌra. Tane wa norĩ hã Wanhibꞌapito zadawa para si marĩ hã wa te ꞌre ꞌmanharĩ zaꞌra mono wamhã, rowẽ na wa za wasiré ꞌre wahâimana zaꞌra. Tawamhã ꞌre iwasisawi pese zaꞌra mono zéb zarina, wa za ꞌre wasipawaptob zaꞌra, wa te wasima ꞌre saꞌẽtẽ zaꞌra mono da, wahâimana wẽ zé hã.
Cristuhu ãma oto ꞌre idanomro mono zép té wasuꞌu
17 Tahawa, tô sena Wanhibꞌapito zadawa para wa za oto aima roti zaꞌra waꞌwa, Wanhibꞌapito zazeiꞌõꞌwa norĩ ne ꞌre anomro aba mono tõ da, ta norĩ nhimirosaꞌrada hã tô senai õ wa.
18 Tobꞌa na ꞌre inomro mono norĩ ma, robꞌmadâ hã tãma iwaihuꞌu zaꞌra õ ne, ꞌRe ihâimana uꞌâsi mono nhimiroti uwaibaba rosaꞌrada hã tãma waihuꞌu zaꞌra õ di, isazeiꞌõꞌwa norĩ ma hã. Ta norĩ hã te te sima ꞌre wẽ zaꞌra mono õ wa, isimiroti hã te te ꞌre wapari zaꞌra mono da, te za tiwasété na siwaihuꞌu ãna ꞌre hâimana zaꞌra. Tahawa, rowẽ na ãma ꞌre idahâimana zaꞌra mono zéb ré, ꞌre hâimana zaꞌra mono õ di za.
19 Siséb ãna te ta norĩ hã te te sina ꞌre robꞌmanharĩ wasété zaꞌra, tihâimana wasété na. Tiwasété zô si te duré sima ꞌre sõpré, marĩ iwasété na si ꞌre hâimana zaꞌra mono da.
20 E ãne ꞌre aihâimana zaꞌra waꞌaba mono da, ma tô Cristu hã ihâimanazém na ꞌre iwaihuꞌu zaꞌra waꞌaba mo. Mare di.
21 A norĩ waꞌwa hã ma tô Cristuhu wasuꞌuwẽ hã aipoꞌre na ꞌre iwapari zaꞌra waꞌaba mo. Oto isiré ꞌre aihâimana zaꞌra waꞌaba mono wa, Zezusihi hawi roti tô sena hã aima waihuꞌu pese zaꞌra waꞌaba di.
22 ꞌRe anomro wasété aba mono da si, te aré asima ꞌre irosaꞌrata zaꞌra waꞌaba mo. Tahawa, te aré aiwi ꞌre siꞌutõrĩ zaꞌra waꞌwa, ꞌre anomro wẽ waꞌaba mono zé hã. Tane nherẽ, te za oto irẽme pese zaꞌra waꞌwa, ꞌre aihâimana wasété zaꞌra waꞌaba mono zé hã.
23 Asimirosaꞌrata wẽ na si te za oto ꞌre irosaꞌrata zaꞌra waꞌaba mo, taha zarina ꞌre aihâimana wẽ zaꞌra waꞌaba mono da oto.
24 Daꞌuza hã ihâ tém na ꞌre idasiꞌuza zaꞌra mono ne, te za oto aihâimanazép tém na si ꞌre aihâimana zaꞌra waꞌaba mo, iwẽ na si. Taha da, ma tô ꞌRe ihâimana uꞌâsi mono hã aipoto téb zaꞌra waꞌwa aipẽꞌẽ ꞌre, isine ꞌre anomro wẽ waꞌaba mono da, tô sena na duré dama ꞌre aihâimana wẽ zaꞌra waꞌaba mono da oto.
25 Tahawa, dama ꞌre asadawa nhipese zaꞌra waꞌaba mono õ di za oto. Aihâiba mono bâ te za tô sena na si asima ꞌre irowasuꞌu zaꞌra waꞌaba mo.
26 4:26-27 Nimahã na ꞌre asitiꞌru zaꞌra waꞌaba mono wamhã, ꞌre aiwasété zaꞌra waꞌaba mono õ di za, aiwasédé hã ꞌre ꞌmanharĩ zaꞌra waꞌaba mono tõ da. Duré asitiꞌrui ré bâdâ hã wahuré aiꞌãma ꞌre siꞌutõrĩ zaꞌra waꞌaba mono tõ da, te za asiwi ꞌre iwẽꞌõ zaꞌra waꞌaba mo, Waꞌuburé nhimiwadaꞌuri zarina aiwasédé hã ꞌre ꞌmanharĩ zaꞌra waꞌaba mono tõ da dama.
27 ꞌMadâꞌâ 4:26
28 Danhibrom na dawi ꞌre iꞌasimisaihuri zaꞌra waꞌaba mono zém na hã, duré oto ꞌre asimisaihuri zaꞌra waꞌaba mono na hã ãma ꞌre sahu zaꞌra waꞌaba mono õ di za. Te za oto asibꞌrata na ꞌre iromhuri zaꞌra waꞌaba mo, aihâimana wẽ na oto ꞌre aihâimana zaꞌra waꞌaba mono da, duré asimiromhuri na isibrobꞌõ norĩ hã ꞌre pawaptob zaꞌra waꞌaba mono da, ãne na si hã wẽ wa.
29 Aimreme wasété na dama ꞌre aimreme zusi aba mono õ di za oto. Aimreme wẽ na si te za oto dama ꞌre aimreme zusi aba mo, asimiroti wẽ na si ꞌre dapawaptob zaꞌra waꞌaba mono da ãma.
30 ꞌRe aihâimana wasété zaꞌra waꞌaba mono õ di za, aihâimanazém na Wamama pẽꞌẽzani wi ꞌre robzeiꞌõ tõ zaꞌra waꞌaba mono da. E marĩ wa. Ipẽꞌẽzani hã te wapẽꞌẽ ꞌre, wama ꞌre hâimana zaꞌra, wapibui pese zéb da hã, ꞌRe ihâimana uꞌâsi mono te, tãma ꞌre iwahâimana zaꞌra mono na, bâdâ iwa waptãꞌã õ ré, te te iwaꞌanhoꞌreptuzéb da hã.
31 Tahawa, te za oto ꞌre irẽme pese zaꞌra waꞌaba mo, aipẽꞌẽ na ꞌre idaꞌruiwapari zaꞌra waꞌaba mono zé hã. Asitiꞌru na ꞌre iꞌaihâimana zaꞌra waꞌaba mono zéb zama te za ꞌre irẽme pese zaꞌra waꞌaba mo, asahi duré ꞌre iꞌaihâimana zaꞌra waꞌaba mono zéb zama. Aimreme ꞌrãihâ sina, duré dama ꞌre nharĩ zaꞌra waꞌaba mono õ di za. Daꞌãma zama duré ꞌre wasété zaꞌra waꞌaba mono õ di za. Duré dama ꞌre robꞌmanharĩ wasété zaꞌra waꞌaba mono õ di za oto.
32 Marĩ iwẽ na te za dama ꞌre asõprub zaꞌra waꞌaba mo, daꞌãma ꞌre aipẽꞌẽzé zaꞌra waꞌaba mono sina. ꞌRe ihâimana uꞌâsi mono hã Cristu dazada dâꞌâ wa, te te aiꞌãma ꞌre ꞌmadâꞌâ zaꞌra waꞌaba mono õ di oto, ꞌre iꞌmanharĩ wasété zaꞌra waꞌaba mono zé hã. Tahawa, a norĩ waꞌaba ma, iwasédé hã da te aima ꞌre ꞌmanharĩ zaꞌra waꞌaba mono nherẽ, isine dawasédé hã duré oto daꞌãma ꞌre ꞌmadâꞌâ zaꞌra waꞌaba mono õ di za.
