2 Corĩtu 8:1-24
8 Wasisãnawã norĩ, wa wasima aiwẽ zaꞌra waꞌaba ni, ꞌRe ihâimana uꞌâsi mono hã tinhimizawi pese zéb zarina, isazeiꞌwa norĩ ma, ꞌre isõpru mono zé wasuꞌu hã, waihuꞌu zaꞌra waꞌaba da, Masédonia ãma rowahutu u, siré ꞌre isiꞌrãꞌõtõ mono norĩ ma, ꞌre isõpru mono zé wasuꞌu hã.
2 Ta norĩ hã da te ãma ꞌre irowasété zaꞌra mono na, te te ꞌre robzépata zaꞌẽtẽ zaꞌra mono nherẽ, duré sibrob ãna ꞌre hâimana zaꞌra mono nherẽ, ma tô to sina, dama tinhoprub zaꞌẽtẽ zaꞌra, tite robꞌuiprazém na hã.
3 8:3-4 Marĩ hã sa hâimana zaꞌra õ nherẽ, ma tô saꞌẽtẽ na dama sõmri zaꞌra, tinhoprubzém na te te ãma dazawi zaꞌra da. Siꞌuihâ na ma tô sima pisutu zaꞌra, ãne na wa te ãma saze zaꞌra wa, Zeruzalẽ ãma ꞌRe ihâimana uꞌâsi mono nhibꞌaꞌuwẽ norĩ te te siwi ãma pawaptob zaꞌra da, te te sima iwẽ uptabi zaꞌra zéb zarina. Tahawa, wẽ di ãne hã, dama ãma isõprub zaꞌra zé hã, Masédonia ãma isazeiꞌwa norĩ nhoprubzé hã.
4 ꞌMadâꞌâ 8:3
5 Wa norĩ hã ãne zô, wanhimipari õ nherẽ, ma tô Wanhibꞌapito ma uimrehẽne sisõmri zaꞌra ta norĩ hã, taha ma si ꞌre hâimana zaꞌra mono da. Taha zarina, ma tô duré wama sisõmri zaꞌra, te te wapawaptob zaꞌra da, ꞌRe ihâimana uꞌâsi mono te te tãma ipisutu zaꞌra zéb zarina hã.
6 Titu hã ãma atẽme morĩ ꞌrata aba wamhã, ma tô robꞌuiprazé ubumro na sãnaꞌrata, asõprub zaꞌra waꞌaba zém na hã. Tahawa, wa tô tãma roti pese ni, duré ãma atẽme morĩ aba wamhã, robꞌuiprazé ubumro na te te ãma sizusi da, romhuri hã wẽ uptabi na te te uprosi da.
7 A norĩ waꞌwa hã te Cristu hã aima umnhasi zaꞌra waꞌaba wa, ãma ꞌre isasõmri pese zaꞌra waꞌaba mo. ꞌRe ihâimana uꞌâsi mono nhimiroti na, te aimreme wẽ na dama ꞌre irowasuꞌu zaꞌra waꞌaba mo. Isimiroti hã ma tô duré ꞌre iwaihuꞌu pese zaꞌra waꞌaba mo. Tahawa, asimiꞌẽ na te ꞌre iromhuri pese zaꞌra waꞌaba mo, ꞌRe ihâimana uꞌâsi mono hã te te aima ꞌre iwẽ zaꞌra waꞌaba mono zéb zarina. Te duré asiwi ꞌre iwazawi pese zaꞌra waꞌaba mo. Ãne hã aima saꞌẽtẽ uptabi zaꞌra waꞌaba di, ꞌre aihâimana zaꞌra waꞌaba mono zém na hã. Tahawa, te za saꞌẽtẽ na dama asõprub zaꞌra waꞌwa duré.
8 Ãne hã wa hã te ãma aima ꞌru zaꞌra waꞌaba õ di. Taré wa aima ãma roti zaꞌra waꞌwa, ĩnhimiroti zarina, ꞌmanharĩ zaꞌra waꞌaba wamhã, ꞌre idazawi pese zaꞌra waꞌaba mono zém na, sena na da te ꞌre aiwaihuꞌu zaꞌra waꞌaba mono da. Masédonia ãma isazeiꞌwa norĩ hã simiꞌẽ na te te ꞌre idapawaptob zaꞌra mono ne zô pé, wa ãne na taré ãma aipibu zaꞌra waꞌwa.
9 Wanhibꞌapito Zezu Cristuhu nhimizawi pese zé hã aima waihuꞌu pese zaꞌra waꞌaba di oto. Ta hã Timama siré robze na ꞌre hâimana uꞌâsi mono nherẽ, ma tô hâiwa ãma tihâimanazé hã we tirẽ aꞌâ, tiꞌai ãma siꞌaꞌuwẽ da, te te aꞌâ dame ꞌre robzépata mono da. Asada zaꞌra waꞌaba, ma tô dawazari siꞌaꞌuwẽ, taha zarina, a norĩ waꞌaba zama ꞌRe ihâimana uꞌâsi mono ꞌrata ꞌre asimroi uꞌâsi aba mono da, hâiwa ãma hã. Tahawa, Wanhibꞌapito hã sisawi ãna ꞌre ihâimana mono ne, te za asisawi ãna dama asõprub zaꞌra waꞌwa, ate robꞌuiprazé waꞌaba na hã.
10 8:10-11 Ĩnhimirosaꞌrada hã wa za oto aima waihuꞌu zaꞌra waꞌwa, robꞌuiprazé asiwi iꞌubumroi waꞌaba zém na hã. Wahub ꞌrata na ma tô dawana asima ipisutu zaꞌra waꞌwa, robꞌuiprazé hã asiwi iꞌrãꞌõtõ aba zéb da hã. Dawana ma tô duré robꞌuiprazé ubumro na ãma isãnaꞌrata zaꞌra waꞌwa. Tahawa, maꞌãpé asiwi uprosi wẽ waꞌaba, robꞌuiprazé ubumro hã. Ato sina, ãma asisaze zaꞌra waꞌaba ne, te za oto ãhã na hã ãma iꞌuwaimrami zaꞌra waꞌwa duré, robꞌuiprazém na hã, aihâiba mono bâ aima ꞌre ihâimana zaꞌra waꞌaba mono zéb zarina, niha wamhã, isaꞌẽtẽ zarina, niha wamhã, duré isuru zarina.
11 ꞌMadâꞌâ 8:10
12 Ato sina, ãma asõprub zaꞌra waꞌaba wamhã, ꞌRe ihâimana uꞌâsi mono si te za asõprubzém na aiwẽsãmri zaꞌra waꞌwa. Asimarĩ aba õ wa, tô suru na isõmri zaꞌra waꞌaba zéb zarina, te za duré ãma aiwẽsãmri zaꞌra waꞌwa, ato sina ãma asõprub zaꞌra waꞌaba wa.
13 8:13-14 E a norĩ waꞌaba si, saꞌẽtẽ na isõmri zaꞌra waꞌaba na, daꞌupana ãma robzépata zaꞌra waꞌaba da, wa ãne na aima roti zaꞌra waꞌwa. Mare di. Taré ãhã na hã saꞌẽtẽ na aima hâimana zaꞌra waꞌaba wa, te za ãma ipawaptob zaꞌra waꞌwa, Zeruzalẽ ãma isazeiꞌwa norĩ hã, marĩ zô tiwi ꞌre rowaptâꞌâ zaꞌra mono wa. Tawamhã nimahã na marĩ zô, aiwi ꞌre rowaptâꞌâ zaꞌra waꞌaba mono wamhã, te za duré ta norĩ hã marĩ na te te ꞌre aipawaptob zaꞌra waꞌwa, asa, saꞌẽtẽ na tãma hâimana zaꞌra wamhã. Ãne wamhã, aiwa te za asõprubzém na asima ãma ꞌre iwaꞌrãmi zaꞌra waꞌaba mo.
14 ꞌMadâꞌâ 8:13
15 Duréihã Mozési ma tô ãne na ãma robꞌuiꞌéré, Izaraéu nhihudu norĩ hã aꞌubuni wi simizahâri mono sidâpâsi, mana na dasazém nhisi hã te te siwi iꞌubumroi mono na hã:
“Niꞌwam norĩ hã saꞌẽtẽ uptabi na te te sima ubumro zaꞌra mono nherẽ, tãma siꞌatarẽme zaꞌra mono õ di, tisiré norĩ hã te te ãma pawaptob zaꞌra mono wa. Tahawa, niꞌwam norĩ hã suru na te te sima ubumro zaꞌra nherẽ, ta norĩ wi hã tiwi sô rowaptâꞌâ zaꞌra õ di, isazéb zô hã.”
Titu hã to sina datẽme imorĩzé wasuꞌu
16 ꞌRe ihâimana uꞌâsi mono, ma tô Tituhu ma pisutu, tãma asawi pese zaꞌra waꞌaba zéb zarina, te te aipawaptob zaꞌra waꞌaba da, wa norĩ hã wa te duré ꞌre iꞌasawi pese zaꞌra waꞌaba mono ne. Tahawa, wa tô ãma wawata ni, ꞌRe ihâimana uꞌâsi mono ãma hã, tô sena wa, õ hã.
17 Tawamhã õne haré ma tô Titu hã sina wazaze, ãma atẽme imorĩ aba zém na da hã. Tahawa, siꞌuihâ na te te ãma sima irowẽzéb zarina, to sina te za tô ãma atẽme timorĩ zaꞌra waꞌwa ãhã na hã, atẽme zaꞌra waꞌaba.
18 Wasisãnawã hã wa za duré isiré ãma atẽme satõrĩ zaꞌra waꞌaba ni, aibâ hã. Ãme isazeiꞌwa norĩ hã ma tô te te sima ꞌre wasuꞌu wẽ zaꞌra, Cristuhu wasuꞌuwẽ na simiromhuri wẽ uptabi wa, ta hã.
19 Duré dama simiromhuri wẽ uptabi wa, ma tô isazeiꞌwa norĩ hã siwi pisutu, Zeruzalẽ u isazeiꞌwa norĩ nhoprubzéb ré, za iwasiꞌabaꞌré siré, ãma wasiré morĩ da. Tawamhã Wanhibꞌapito ãma wawatazéb da, wa za tô ãne hã ꞌmanharĩ ni, duré wato sina, wa te ꞌre idaꞌapawapto mono zém na, da te wawaihuꞌu zaꞌra da.
20 Wanhimisaihuri hã da te waꞌãma nomri tõ da, wa za asõprub zaꞌra waꞌaba zé hã wasitẽme wa te wasiwi ꞌmadâꞌâ pese zaꞌra, wasiꞌabaꞌréi wamhã.
21 Iꞌuwaibaba, wa te ãma iꞌuwaimrami zaꞌra da si, wa tô iré wasima robꞌmadâꞌâ zaꞌra ni, Wanhibꞌapito nhoꞌa, duré uburé danhoꞌa zama.
22 Wasisãnawã hâiba amo hã wa za duré ãma atẽme satõrĩ zaꞌra waꞌaba ni, Titu norĩ siré, ãma morĩ da. Ta hã wa tô nasi pibu zaꞌra ni, simiꞌẽ na te te ꞌre romhuri mono zô, Wanhibꞌapito ma. Tahawa, wa tô waihuꞌu zaꞌra ni, tô sena isimiꞌẽ na hã, duré to sina te te ꞌre iromhuri mono na hã. Ta hã aiwasuꞌu wẽ zaꞌra waꞌwa hã te te wapari wa, tãma aiꞌumnhasi uptabi zaꞌra waꞌaba di, za robꞌuiprazém na dama iꞌasõprub zaꞌra waꞌaba zéb da na hã. Tahawa, toi uptabi di ãhã na hã, robꞌuiprazé ubumro na za te te ãma aipawaptob zaꞌra waꞌaba wa.
23 Titu hã bété. Ta hã ĩsiré Wanhibꞌapito ma romhuriꞌwa te ꞌre hâimana, Cristuhu wasuꞌuwẽ na ĩsiré te te ꞌre iꞌaipawaptob zaꞌra waꞌaba mono. Duré wasisãnawã hâiba amo norĩ hã za isiré ãma ineb zahuré da hã, ta norĩ hã te za tisiré isazeiꞌwa norĩ zadawa para, ãma atẽme ine waꞌaba na siwasuꞌu zahuré, aima zaꞌra waꞌaba hã. Ta norĩ hã simiromhuri wẽ uptabi wa, te za Cristuhu ãma si ꞌre dawata zaꞌra.
24 Tahawa, maꞌãpé iwẽ na si uburé marĩ na hã ãma tãma uwaimrami zaꞌra waꞌaba za, asimizawi pese zaꞌra waꞌaba zém na te te aiwaihuꞌu zaꞌra waꞌaba da, duré sena na, wa te dama ꞌre iꞌaiwasuꞌu wẽ zaꞌra waꞌaba mono zém na, te te aiwaihuꞌu zaꞌra waꞌaba da. Duré ãme isazeiꞌwa norĩ, siré ꞌre isiꞌrãꞌõtõ mono norĩ hã, ãne na te te aiwaihuꞌu zaꞌra waꞌaba da, te za iwẽ na si tãma ãma iꞌuwaimrami zaꞌra waꞌwa za.
