1 Zuã 5:1-21
5 Niꞌwam norĩ hã, Zezusi, Cristu* na te te ꞌre isaze zaꞌra mono hã, ta norĩ hã te ꞌRe ihâimana uꞌâsi mono ꞌra, ꞌre nomro. Duré niꞌwam norĩ hã Wamama te te ꞌre sawi pese zaꞌra mono wamhã, iꞌra norĩ zama te za te te ꞌre azawi pese.
2 Ãne na, wa za wa te ꞌre waihuꞌu zaꞌra, ꞌRe ihâimana uꞌâsi mono ꞌra norĩ, wa te ꞌre isawi pese zaꞌra mono na hã: ꞌRe ihâimana uꞌâsi mono hã wa te ꞌre sawi pese zaꞌra mono wamhã, duré isimiroti, wa te ꞌre ꞌmadâꞌâ pese zaꞌra mono wamhã.
3 E marĩ wa. ꞌRe ihâimana uꞌâsi mono, wa te ꞌre sawi pese zaꞌra mono wamhã, isimiroti zahi hã wa za tô wa te ꞌre ꞌmadâꞌâ pese zaꞌra. Isimiroti zahi hã wa te ꞌre iꞌmadâꞌâ pese zaꞌra mono da hã, ipire õ di.
4 ꞌRe ihâimana uꞌâsi mono ꞌra, ꞌre inomro mono hã te za te te ãma ꞌre aiꞌuté zaꞌra, tiꞌai ãma marĩ iwasédé ꞌre ihâimana zaꞌra mono ãma hã. ꞌRe ihâimana uꞌâsi mono si, wa te wasina ꞌre iꞌumnhasi zaꞌra mono zéb zarina si wa za wa te ãma ꞌre aiꞌuté zaꞌra.
5 E ꞌwam norĩ hã, tiꞌai ãma marĩ iwasédé ꞌre ihâimana zaꞌra mono ãma, te te ꞌre aiꞌuté zaꞌra mono da bâ. Zezusi hã ꞌRe ihâimana uꞌâsi mono ꞌra na, te te ꞌre isaze zaꞌra mono norĩ si, te za te te ãma ꞌre aiꞌuté zaꞌra.
Zezusi hã ꞌRe ihâimana uꞌâsi mono ꞌra
6 Zezu Cristu hã, â* na duré tiwapru* na we imorĩ. Â na si wei morĩ õ di. Tiwapru na zama. Tawamhã ꞌRe ihâimana uꞌâsi mono Pẽꞌẽzani hã ãhã na tô sena iwasuꞌuꞌwa, ꞌRe ihâimana uꞌâsi mono Pẽꞌẽzani hã tô sena uptabi wa.
7 Siꞌubdatõ iwasuꞌuꞌwa hâiba hã:
8 ꞌRe ihâimana uꞌâsi mono Pẽꞌẽzani, duré â, duré iwapru. Ã hã siꞌubdatõ ihâiba hã, aiwap si isimirowasuꞌu zaꞌra hã.
9 Marĩ na tô sena na tiꞌai ãma danhimirowasuꞌu hã, wa za tô wa te ãma ꞌre saze zaꞌra. Tane nherẽ, ꞌRe ihâimana uꞌâsi mono nhimirowasuꞌu hã danhipai u pire uptabi di, tô taha nhimirowasuꞌu wa, Tiꞌra te te dama ꞌre iwasuꞌu mono hã.
10 Niꞌwa hã ꞌRe ihâimana uꞌâsi mono ꞌra te te sazei wamhã, taha wasuꞌu hã te za ipẽꞌẽ ꞌre tãma ꞌre hâimana. Tanei õ di, niꞌwa hã te te sazei õ wamhã. ꞌRe ihâimana uꞌâsi mono ãma te za isadawa nhipe hã tihi, te te sazei õ wa, ꞌRe ihâimana uꞌâsi mono Tiꞌra te te ꞌre iwasuꞌu mono zé hã.
11 Ã hã tô iwasuꞌu: ꞌRe ihâimana uꞌâsi mono hã ma tô dahâimanazé isiꞌutõrĩꞌõ hã wama sõmri zaꞌra. Tawamhã ã hã dahâimanazé hã te wama ꞌre hâimana zaꞌra, Iꞌra ãma ꞌre ihâimana mono hã.
12 ꞌRe ihâimana uꞌâsi mono ꞌra, niꞌwai ma hâimana wamhã, dahâimanazé isiꞌutõrĩꞌõ hã te za tãma tihâiba. Tanei õ di, Iꞌra hã niꞌwai ma hâimana õ wamhã, ã hã dahâimanazé hã tãma hâimana õ di za.
Wasiwawãi ãna dahâimanazé isiꞌutõrĩꞌõ hã wama ꞌre ihâimana zaꞌra mono zé
13 Ãne hã wa aima robꞌuiꞌéré zaꞌra waꞌwa, ꞌRe ihâimana uꞌâsi mono ꞌra isaze zaꞌra waꞌaba norĩ ma hã, dahâimanazé isiꞌutõrĩꞌõ hã aima ihâimana zaꞌra waꞌaba na waihuꞌu zaꞌra waꞌaba da.
14 ꞌRe ihâimana uꞌâsi mono u wa te wasina ꞌre rotété zaꞌra mono wamhã, wa te ꞌre iꞌumnhasi zaꞌra mono zé, ãne: ꞌRe ihâimana uꞌâsi mono te te sima ꞌre iwẽ mono zéb zarina, siwaꞌru marĩ hã wa te tiwi ꞌre waptẽrẽ zaꞌra mono wamhã, te za te te wama ãma ꞌre aꞌuwaimrami.
15 Duré uburé marĩ na wa te tiwi ꞌre irowaptẽrẽ zaꞌra mono zéb zarina, te te ꞌre iwaꞌawapari mono na, wa sena na wa te wasina ꞌre waihuꞌu zaꞌra. Taha zarina, wa duré wa te ꞌre waihuꞌu zaꞌra, za te te wama ãma ꞌre iꞌaꞌuwaimrami mono zém na, wa te tiwi ꞌre iwaptẽrẽ zaꞌra mono zéb zarina, marĩ hã.
16 Niꞌwa hã, tisisãnawã tiwasédé dadâꞌâ u te te ꞌre idanhimroi mono õ, te te iꞌmanharĩ na, te te ꞌmadâꞌâ wamhã, ꞌRe ihâimana uꞌâsi mono ma, te te ãma rowaptẽrẽ. Tawamhã ta hã te za niꞌwai ma tisõ dahâimanazé hã, tiwasédé te te iꞌmanharĩ ma hã. Ã hã niꞌwa tiwasédé te te ꞌmanharĩ wapsi, za dahâiba te te iwĩrĩ õ na. Tazahã, oto niꞌwa dapãrĩ na, tiwasédé te te ꞌmanharĩ wamhã, te ãma nharĩ õ di, tiwasédé te te iꞌmanharĩzém na ãma rowaptẽrẽ aba da hã.
17 Uburé marĩ iwasété ꞌmanharĩ hã, ta hã dawasédé. Tane nherẽ, dawasédé iré hã, dadâꞌâ u te te ꞌre idanhimroi mono õ hã.
18 Wama waihuꞌu pese zaꞌra di, ꞌRe ihâimana uꞌâsi mono hã, ãma ꞌre iꞌra zaꞌra mono norĩ, tiwasédé te te ꞌre iꞌmanharĩ uꞌâsi zaꞌra mono õ na hã. E marĩ wa. ꞌRe ihâimana uꞌâsi mono ꞌra hã iꞌwawi ꞌre simapa zaꞌra mono wa. Tahawa, Iwasété uptabi hã* te te ꞌre upi waihuꞌu zaꞌra mono õ di.
19 Wama waihuꞌu pese zaꞌra di, wa norĩ hã ꞌRe ihâimana uꞌâsi mono te na hã, duré tiꞌai ãma siwaꞌru ꞌre idahâimana zaꞌra mono hã, Iwasété uptabi zadawa para ꞌre idahâimana zaꞌra mono na hã.
20 Wa tô duré waihuꞌu zaꞌra ni, ꞌRe ihâimana uꞌâsi mono ꞌra we imorĩ pari na hã. Ta hã ma tô duré rowaihu hã wama sõmri zaꞌra, tô sena ꞌRe ihâimana uꞌâsi mono ꞌre ihâimana mono hã wa te waihuꞌu zaꞌra da. Tahawa, ãhã na hã tô sena ꞌre ihâimana mono siré wa oto wahâimana zaꞌra ni. Iꞌra Zezu Cristuhu siré hã wa duré ꞌre wahâimana zaꞌra. Ã hã tô sena ꞌRe ihâimana uꞌâsi mono ꞌre ihâimana mono. Duré ã hã, tô sena dahâimanazé isiꞌutõrĩꞌõ zama.
21 Ĩꞌra norĩre, maꞌãpé ꞌre asiꞌmadâꞌâ pese zaꞌra waꞌaba mono, ihâibaꞌõ norĩ wi.
