1 Corĩtu 3:1-23
3 Ĩsisãnawã norĩ, ꞌRe ihâimana uꞌâsi mono pẽꞌẽzani, ipẽꞌẽ ꞌre, tãma ꞌre ihâimana zaꞌra mono norĩ ma si, wa Zezusihi wasuꞌuwẽ wama ipire uptabi si te tãma ꞌre wasuꞌu zaꞌra, dama isaꞌreseꞌõ hã. Tane nherẽ, aiꞌrata ꞌre ĩnhamra aba mono ré, ãne na te aima ꞌre rowasuꞌu waihuꞌu zaꞌra waꞌaba mono õ di. E marĩ wa. Isazeiꞌõꞌwa norĩ ꞌre ihâimana zaꞌra mono ne, zahadu ꞌre aihâimana zaꞌra waꞌaba mono wa, duré aiꞌuté hã marĩ te te ꞌre isaꞌrese zaꞌra mono õ ne, Zezusihi wasuꞌuwẽ hã ꞌre wapari zaꞌra waꞌaba mono nherẽ, asima ꞌre waihuꞌu pese zaꞌra waꞌaba mono õ wa.
2 Aiꞌuté hã tisai uptabi na ꞌre saihuri waihuꞌu mono õ wa, te za tina hâiwaꞌu si te te ꞌre wapsõmri zaꞌra. Ina hã isai uptabi hã te te tãma ꞌre sõmri waihuꞌu zaꞌra mono õ di. Tane, wa tô wa hã roti iwapure na si te aima ꞌre roti zaꞌra waꞌwa, Zezusihi wasuꞌuwẽ na hã, zahadu aima pibui prã zaꞌra waꞌaba wa, ꞌre iwaihuꞌu pese zaꞌra waꞌaba mono zéb da hã. Ãhã na hã bété. Zahadu tô aima waihuꞌu pese zaꞌra waꞌaba õ di.
3 E marĩ wa. Isazeiꞌõꞌwa norĩ ꞌre ihâimana zaꞌra mono zéb zarina, zahadu ꞌre anomro aba mono wa. Tahawa, te zahadu ꞌre asiꞌruiwapari zaꞌra waꞌaba mo, marĩ na. Te duré ꞌre asisadaꞌâbâ uꞌâsi zaꞌra waꞌaba mo.
Ãne na ꞌre aihâimana zaꞌra waꞌaba mono zé hã, e marĩ te aima wasuꞌu zaꞌra waꞌwa. Cristu hã ꞌre saze zaꞌra waꞌaba mono õ ré, aiwasété na ꞌre aihâimana zaꞌra waꞌaba mono zé, zahadu ꞌre irẽme waihuꞌu zaꞌra waꞌaba mono õ zé, te aima wasuꞌu zaꞌra waꞌwa, isazeiꞌõꞌwa norĩ ꞌre ihâimana zaꞌra mono zém ne hã.
4 Niꞌwam norĩ me asiré ꞌre aihâimana zaꞌra waꞌaba mono nherẽ, te ãne dama ꞌre asiwasuꞌu zaꞌra waꞌaba mo: “Wa norĩ hã Pauluhu nhimiroti si, wa wa te ꞌre ꞌmadâꞌâ zaꞌra.” Duré niꞌwam norĩ hã te ãne ꞌre siwasuꞌu zaꞌra: “Wa norĩ hã Apoluhu nhimiroti si, wa wa te ꞌre ꞌmadâꞌâ zaꞌra.” Ãne na dama ꞌre asiwasuꞌu zaꞌra waꞌaba mono wamhã, e marĩ te wasuꞌu. Tô isazeiꞌõꞌwa norĩ ꞌre ihâimana zaꞌra mono zém na, zahadu ꞌre aihâimana wasété zaꞌra waꞌaba mono zé, te aima wasuꞌu zaꞌra waꞌwa.
5 Tazahã, ãhã zarina si te za waꞌãma ꞌre irosaꞌrata uꞌâsi zaꞌra waꞌaba mo. Wa norĩ hã ꞌRe ihâimana uꞌâsi mono ma si, wa te ꞌre iromhuri mono, wa ꞌre wahâimana. Iwasuꞌuwẽ na, wa te aima ꞌre irowasuꞌu zaꞌra waꞌaba mono zéb zarina, te oto asina ꞌre iꞌumnhasi zaꞌra waꞌaba mo, Wanhibꞌapito hã. Ta hã te te wama ipisutuzéb zarina si, wa wa te tãma ꞌre romhuri pese. Taha da si, wa wa norĩ hã ꞌre wahâimana.
6 Wa hã Paulu, buru na da te dasima ꞌre robdiꞌi zaꞌra mono õ ré, da te ꞌre irobzuri mono ne, wa tô dawana te aima ꞌre rowasuꞌu zaꞌra waꞌwa, Cristuhu wasuꞌuwẽ na hã. Duré, da te ꞌre robzuri mono pari, da te oto ꞌre irobdiꞌi zaꞌra mono ne, ma tô Apolu hã ĩzaꞌu hã te te aima ãma ꞌre rowasuꞌu wẽ zaꞌra waꞌwa. Tane nherẽ, ꞌRe ihâimana uꞌâsi mono si waihuꞌu pese di, te te ꞌre iꞌaipawaptob zaꞌra waꞌaba mono zéb da hã, ãma ꞌre aihâimana prédub zaꞌra waꞌaba mono da, Zezusihi si asina ꞌre umnhasi uꞌâsi zaꞌra waꞌaba mono da. Buru na hã ꞌRe ihâimana uꞌâsi mono waihuꞌu pese na si, dama ꞌre iroꞌwanhipré zaꞌra mono ne, ma tô ꞌRe ihâimana uꞌâsi mono si te te ꞌre aipawaptob zaꞌra waꞌwa, ãma ꞌre aihâimana prédub zaꞌra waꞌaba mono da.
7 Tahawa, robzuriꞌwa norĩ ne, iwasuꞌuwẽ na te te dama ꞌre irowasuꞌu ꞌrata zaꞌra mono norĩ hã, pire na ꞌre hâimana zaꞌra mono õ di. Duré robdiꞌiꞌwa norĩ ne, dazaꞌu te te dama ãma ꞌre irowasuꞌu zaꞌra mono norĩ hã, duré dama pire na ꞌre hâimana zaꞌra mono õ di. ꞌRe ihâimana uꞌâsi mono si, te pire uptabi na ꞌre hâimana uꞌâsi, taha si te te ꞌre daꞌapawapto wẽ mono wa, Zezusihi ne dahâimana prédup sina, oto ꞌre idahâimana zaꞌra mono zéb da hã.
8 3:8-9 Robzuriꞌwa norĩ hã robdiꞌiꞌwa norĩ me, tãma ꞌre iroꞌwanhipré zaꞌra mono da si, te aiwa misi haré siré te te ꞌre romhuri zaꞌra. Tane duré, wa hã iwasuꞌuwẽ na te aima ꞌre rowasuꞌu ꞌrata zaꞌra waꞌaba mono wamhã, duré Apolu hã ĩzaꞌu te te aima ãma ꞌre rowasuꞌu zaꞌra waꞌaba mono wamhã, aiwa wa tô wa zahuré, wa te wasima ꞌre aiwẽ zaꞌra waꞌwa, iwasuꞌuwẽ hã ꞌre waihuꞌu pese zaꞌra waꞌaba mono da. ꞌRe ihâimana uꞌâsi mono ma si, wa wa zahuré, wa te tãma ꞌre romhuri, aiwa. Tahawa, wa te tãma ꞌre iromhuri mono zéb zarina, te za ꞌRe ihâimana uꞌâsi mono hã wapawaꞌâ, iwẽ uptabi na.
Duré daburu hã, e ꞌwa te hã. E ãma iromhuriꞌwa norĩ te hã, buru hã. Mare di. Misire te itedeꞌwa na ꞌre hâimana, buru tedeꞌwa hã. Tane duré, a norĩ waꞌwa hã ĩnhibꞌaꞌuwẽ, ꞌre anomro aba mono õ di. Duré Apoluhu nhibꞌaꞌuwẽ, ꞌre anomro aba mono õ di. Mare di. ꞌRe ihâimana uꞌâsi mono nhibꞌaꞌuwẽ si, te oto ꞌre aihâimana zaꞌra waꞌaba mo.
Ãne wa za duré aima ãma romnhimiréꞌé zaꞌra waꞌwa, ꞌri na. ꞌRi hã ꞌriꞌwa norĩ tei õ di. ꞌRi tedeꞌwa te, ꞌri hã. Tane, a norĩ waꞌwa hã wanhibꞌaꞌuwẽ, ꞌre anomro aba mono õ di, iwasuꞌuwẽ na, wa te aima ꞌre rowasuꞌu zaꞌra waꞌaba mono nherẽ. E marĩ wa. ꞌRe ihâimana uꞌâsi mono nhibꞌaꞌuwẽ si, oto ꞌre anomro aba mono wa.
9 ꞌMadâꞌâ 3:8
10 ꞌRi na romhuriꞌwa norĩ hã ꞌri naꞌrata uimrehẽne, te za siwi ꞌmanha, sipese na. Tane duré wa hã, ĩnhimiromhuri wẽ na, wa tô sãnaꞌrata, te aima ꞌre irowasuꞌu zaꞌra waꞌaba mono na hã, Cristuhu wasuꞌuwẽ na, ꞌRe ihâimana uꞌâsi mono, tiwaihuꞌu pese na te te oto ꞌre ĩpawapto mono zéb zarina. Duré ꞌri naꞌrada hã da te dasiwi ꞌmanharĩ pari, ihâiba amo ꞌriꞌwa norĩ isisiwi te te oto siwi iꞌri ne, tane te duré niꞌwam norĩ hã te te aima ãma ꞌre rowasuꞌu zaꞌra waꞌwa, ĩzaꞌu hã. ꞌRi naꞌrata ꞌmanharĩ nhisiwi, da te dasiwi ꞌri wamhã, pibui pese na te za dasiwi ꞌri ni, marĩ iwẽ na si hã oto. Tane niꞌwam norĩ hã Cristuhu wasuꞌuwẽ na te te dama ꞌre rowasuꞌu zaꞌra mono wamhã, pibui pese na te za oto te te dama ãma ꞌre rowasuꞌu zaꞌra, iꞌuwaibaba si.
11 ꞌRiꞌwa norĩ hã, ꞌri naꞌrata nhanaꞌrada te te siwi ꞌmanharĩ wamhã, misi haré iwẽ na si te za tô siwi ꞌmanha. Tane duré, misire iwasuꞌuwẽ hã te ꞌre hâimana, dawana te aima ꞌre iwasuꞌu zaꞌra waꞌaba mono hã, tô õ hã Zezu Cristuhu wasuꞌuwẽ hã. Iwasuꞌu aimawi hã ꞌre ꞌmaihâimana mono õ di, da te ãma ꞌre saze zaꞌra mono wa, ꞌRe ihâimana uꞌâsi mono te te ãma ꞌre idaꞌanhoꞌreptui mono zéb da hã.
12 3:12-13 Niꞌwam norĩ hã, ꞌri naꞌrata ꞌmanharĩ nhisiwi te te siwi ꞌri wamhã, ãté marĩ hã unhama roꞌo na ꞌre isiꞌunhama mono õ na si, te za siwi ꞌri, iwaꞌâbâ zaꞌẽtẽ na, ẽtẽ waipo pré oru na, duré ẽtẽ waipo prã prata na, duré ẽtẽ waipo na. Ãté ihâiba amo norĩ hã te za marĩ iwaꞌâbâ surure na si siwi ꞌri, unhama wa iroꞌo pese na si, wede na hã, duré du na hã, duré amnho teihi na hã. Tawamhã nimahã na ꞌri hã roꞌo nherẽ, siꞌunhama õ wamhã, te za waihuꞌu zaꞌra ni, marĩ iwẽ na si ꞌriꞌwa norĩ hã te te siwi iꞌmanharĩ na hã. Tazahã siꞌunhama wamhã, te za marĩ iwẽ prã na si te te siwi iꞌmanharĩ na waihuꞌu zaꞌra ni. Tane te niꞌwam norĩ hã Cristuhu wasuꞌuwẽ na, iꞌuwaibaba si te te dama ꞌre rowasuꞌu zaꞌra. Duré niꞌwam norĩ hã senaiꞌõ na te te dama ãma ꞌre roti zaꞌra. Tawamhã niwapsi te za ꞌRe ihâimana uꞌâsi mono hã pibu zaꞌra, Zezusihi wasuꞌu na te te dama ꞌre irowasuꞌu zaꞌra mono zé hã, pé tô sena zô. Za daꞌãma isipoꞌozéb ãma, te za pibu zaꞌra. Tawamhã te za waihuꞌu zaꞌra, sena na Cristuhu wasuꞌuwẽ na te te dama ꞌre irowasuꞌu zaꞌra mono norĩ hã, duré senaiꞌõ na te te dama ãma ꞌre irowasuꞌu zaꞌra mono norĩ zama.
13 ꞌMadâꞌâ 3:12
14 ꞌRiꞌwa norĩ hã marĩ iwẽ na si te te siwi ꞌri wa, unhama roꞌo na zata õ wamhã, ꞌri tedeꞌwa hã te za waihuꞌu, tiwi izata õ na hã, tãma ꞌre isab uꞌâsi mono na hã. Taha zarina, te za ꞌriꞌwa norĩ ma, marĩ iwẽ hã tãma sõmri zaꞌra, iwaꞌrãmi. Tane duré, niꞌwam norĩ hã iwasuꞌuwẽ na tô sena na te te dama ꞌre irowasuꞌu zaꞌra mono zém na, ꞌRe ihâimana uꞌâsi mono, te te waihuꞌu zaꞌra wamhã, tawapsi te za iwẽ hã tãma sõmri zaꞌra iwaꞌrãmi, za daꞌãma isipoꞌozéb ãma hã.
15 Duré ꞌriꞌwa norĩ hã marĩ iwẽ prã na si te te siwi ꞌri wa, unhama roꞌo na zata wamhã, ꞌri tedeꞌwa nhoprubzé hã te te sina uwaimrami zaꞌra õ di za, ꞌriꞌwa norĩ hã. Te za simini zaꞌra, ꞌri tedeꞌwa nhoprubzé hã. Tane duré, niꞌwam norĩ hã taré ãma ꞌre datobꞌuzu zaꞌra mono da, Cristuhu wasuꞌuwẽ na te te dama ꞌre rowasuꞌu zaꞌra mono wamhã, ꞌRe ihâimana uꞌâsi mono iwẽ hã te te tãma ꞌre sõmri zaꞌra mono õ di za iwaꞌrãmimhã, za daꞌãma isipoꞌozéb ãma hã. Ta norĩ hã te za tô simini zaꞌra. ꞌRe ihâimana uꞌâsi mono nhoprubzé hã za te te simini zaꞌra nherẽ, tane nherẽ, te za tô sõꞌreptu zaꞌra, ropipa hawi.
Ãté niꞌwa hã ꞌri para sãmra ré, te za isõrõwa hã iré ãro. Tawamhã ãté unhama roꞌo zaꞌẽtẽ ꞌrowim nherẽ, te za watobro rob u, sisõꞌreptu da. Tawamhã aré dâꞌâ da nherẽ, te za ꞌrâwi sisõꞌreptu. Tane, niꞌwam norĩ hã taré ãma ꞌre datobꞌuzu zaꞌra mono da, Cristuhu wasuꞌuwẽ na te te dama ꞌre irowasuꞌu zaꞌra mono norĩ hã, ropipa u siꞌabaꞌré da nherẽ, te za ꞌRe ihâimana uꞌâsi mono hã sõꞌreptu zaꞌra, Cristuhu zazeiꞌwa ꞌre hâimana zaꞌra mono wa. Tinhoprubzé hã za te te tãma sõmri zaꞌra dai õ nherẽ, te za tô ta norĩ hã sõꞌreptu zaꞌra, ꞌRe ihâimana uꞌâsi mono hã.
16 Duréihã ꞌRe ihâimana uꞌâsi mono nhorõwa ꞌri ꞌre, ma tô õ hã dama ꞌre hâimana, ꞌri iwẽ uptabi wa. Tane te oto aipẽꞌẽ ꞌre, aiꞌãma ꞌre sõrõwa zaꞌra waꞌwa. Ipẽꞌẽzani hã te oto duré aipẽꞌẽ ꞌre, ꞌre sãmra uꞌâsi zaꞌra waꞌwa. E ãne hã ꞌrâwi asina waihuꞌu zaꞌra waꞌaba õ di bété.
17 ꞌRe ihâimana uꞌâsi mono hã tite da si, ma tô sima pisutu, tiꞌai ãma isõrõwa ꞌre, ꞌri ꞌre waꞌwa hã siwaprosi ãma ꞌre hâimana mono da, wẽ uptabi na. Tane ma tô duré a norĩ waꞌwa hã aipisutu zaꞌra waꞌwa, isibꞌaꞌuwẽ si oto ꞌre anomro aba mono da, taha ãma si ꞌre aihâimana wẽ uꞌâsi zaꞌra waꞌaba mono da. Tahawa, niꞌwam norĩ hã apâ te te ꞌre aiwasété zaꞌra waꞌaba mono wamhã, ꞌRe ihâimana uꞌâsi mono si te za ta norĩ hã te te ꞌre aꞌuprosi.
18 A norĩ waꞌwa hã aihâimanazé senaiꞌõ na, taré ꞌrâwi asima ꞌre asadawa nhipese zaꞌra waꞌaba mono õ di za. Niꞌwam norĩ hã asiré ꞌre aihâimana zaꞌra waꞌaba mono nherẽ, te rosaꞌrada hã te te siꞌãma ꞌre upa zaꞌra, waihuꞌu pese newa, tiꞌai ãma isazeiꞌõꞌwa norĩ nhimirowaihuꞌu pese si te te ꞌre waihuꞌu zaꞌra mono nherẽ, te te sima ꞌre iꞌruiwapari zaꞌra mono hã. ꞌRe ihâimana uꞌâsi mono nhimiroti iwẽ uptabi hã ta norĩ te te ꞌre waihuꞌu zaꞌra mono õ nherẽ, te ꞌrâwi waihuꞌu pese newa, te te siꞌãma ꞌre rosaꞌrata upa zaꞌra, asiré ꞌre iꞌaihâimana zaꞌra waꞌaba mono norĩ hã. Tahawa, ꞌRe ihâimana uꞌâsi mono nhimiroti iwẽ uptabi zô si, te za asima ꞌre asõpré uꞌâsi aba mo, asimizaꞌrese sina ꞌre aihâimana zaꞌra waꞌaba mono da. Isazeiꞌõꞌwa norĩ hã asimizaꞌrese ãna ꞌre aihâimana zaꞌra waꞌaba mono newa, te za te te aiꞌãma ꞌre rosaꞌrata upa zaꞌra waꞌwa. Tane nherẽ, te za tô ꞌre aihâimana wẽ zaꞌra waꞌaba mo, asimizaꞌrese sina.
19 Tiꞌai ãma isazeiꞌõꞌwa norĩ hã tinhimirowaihu te te sima ꞌre iꞌruiwapari uꞌâsi zaꞌra mono hã, tarére ꞌRe ihâimana uꞌâsi mono ma hã. Duréihã ma tô ãne na niꞌwa hã ꞌRe ihâimana uꞌâsi mono ãma robꞌuiꞌéré siro, ibaihâ na hã:
“ꞌRe ihâimana uꞌâsi mono hã te isazeiꞌõꞌwa norĩ nhimirowaihuꞌu na ꞌre ihâimana zaꞌra mono norĩ ma, te te tãma ꞌre robꞌmanharĩ zaꞌra, tinhimirowaihuꞌu pese na, ꞌrâwi ꞌre sisimini zaꞌra mono da.”
20 Apito Dawi hã ma tô duré ãne na ãma robꞌuiꞌéré siro, duréihã:
“Ĩnhibꞌapito ma si, ꞌRe ihâimana uꞌâsi mono ma si, waihuꞌu pese di, tiꞌai ãma isazeiꞌõꞌwa norĩ nhimirowaihu hã marĩ da, ihâimana õ na hã. Tarére tãma hã, isazeiꞌõꞌwa norĩ nhimirowaihu hã.”
21 3:21-22 Niꞌwam norĩ hã asiré ꞌre aihâimana zaꞌra waꞌaba mono hã te sina ꞌre wata zaꞌra mono sina, te te sima ꞌre nharĩ zaꞌra, ãne: “Pauluhu nhimiroti si, wa za wa norĩ hã wa te ꞌre ꞌmadâꞌâ zaꞌra, uburé rowahutuꞌwa norĩ nhimiroti nhipai u, wẽ uptabi wa.” Niꞌwam norĩ hã te duré ãne te te sima ꞌre nharĩ zaꞌra: “Wa norĩ hã Apoluhu nhimiroti si, wa za wa te ꞌre ꞌmadâꞌâ zaꞌra, uburé rowahutuꞌwa norĩ nhimiroti nhipai u, wẽ uptabi wa, wama zaꞌra hã.” Ãne na ꞌrâwi asima ꞌre rosaꞌrata zaꞌra waꞌaba mono õ di za. Wa hã Paulu, duré Apolu, duré Pedru, duré uburé wasiré rowahutuꞌwa norĩ zama, simisutu wa wasiré wa te aima ꞌre romhuri zaꞌra waꞌwa, Zezusi hã ꞌre isazei pese zaꞌra waꞌaba mono da si. Uburé marĩ hã tiꞌai ãma ꞌre ihâimana zaꞌra mono hã, te aima ꞌre hâimana zaꞌra waꞌwa. Aihâiba ré, ꞌre aihâimana zaꞌra waꞌaba mono zé hã te duré aima ꞌre hâimana zaꞌra waꞌwa, Zezusihi ãma si ꞌre iꞌanomro aba mono zéb da hã. ꞌRe iꞌatâꞌâ zaꞌra waꞌaba mono zé hã, te duré aima ꞌre hâimana zaꞌra waꞌwa. Ãhã na uburé marĩ hã aiꞌãma ꞌre iromhâimana zaꞌra waꞌaba mono zé hã, te aima ꞌre hâimana zaꞌra waꞌwa, za aiꞌãma ꞌre iromhâimana zaꞌra waꞌaba mono zéb zama, ꞌRe ihâimana uꞌâsi mono te te aima ꞌre ipisutu zaꞌra waꞌaba mono zéb zarina, Zezusihi si ꞌre sazei pese zaꞌra waꞌaba mono da. Ãne te uburé marĩ hã aima ꞌre hâimana zaꞌra waꞌwa, isazeiꞌwa norĩ ma hã.
22 ꞌMadâꞌâ 3:21
23 Duré a norĩ waꞌwa hã te Cristuhu ma si ꞌre aihâimana zaꞌra waꞌaba mo, isibꞌaꞌuwẽ na hã. Ta hã, ꞌRe ihâimana uꞌâsi mono te te pisutu wa, ma tô wei mo tiꞌai u, Danhoꞌreptuiꞌwa da hã. Tahawa, Cristuhu nhibꞌaꞌuwẽ na si, te za asima ꞌre asiwasuꞌu zaꞌra waꞌaba mo. Wanhibꞌaꞌuwẽ na, asima ꞌre asiwasuꞌu zaꞌra waꞌaba mono õ di za.
