Mare di. Bíblia te wama watsuꞌu dzaꞌra wa te ĩꞌrowaptẽrẽ dzaꞌra da tsi Jeová wi tsi, duré Jesus nhitsi na. Jesus te tinha ĩtsiré ꞌre ĩnomro mono norĩ ma: “Tô taha wa, ãhã ne na atsõꞌre dzaꞌra waꞌaba: Wamama höiwa u ꞌre ĩꞌaihöimana mono, atsitsi hã ĩpetse na ꞌre höimana mono.” (Mateus 6:9, Rowatsuꞌu Tem Nhihödö) Niwa te te ĩnharĩ õ di ĩtsiré ꞌre ĩnomro mono norĩ ma hã te te rowaptẽrẽ dzaꞌra da dahöiba ꞌmanharĩ wi, dawatsuꞌuꞌwa norĩ wi, niwamhã nimahã ĩhöiba amo wi Höimanaꞌuꞌö nhowaꞌreꞌre.

Jesus te tãma nharĩ dzaꞌra duré: “Wa hã tô bödödi, tsena hã, duré dahöimanadzé. Niꞌwa hã, wei morĩ waihuꞌu õ di, Ĩ̠mama u hã, ĩ̱ꞌãna hã.” (João 14:6, RTN) Jeová ma pitsutu Jesus tsi waꞌãwitsi wẽꞌwa ꞌre höimana mono da. — 1 Timóteo 2:5.

Bété te rowaptẽrẽ wamhã Höimanaꞌuꞌö wi duré dahöiba ꞌmanharĩ wi.

10 tsina ꞌRe ĩhöimana uꞌötsi mono nhimiroti ꞌremhã te watsuꞌu: ‘Wa hã Uburé Danhibꞌapito, ate waꞌwa ꞌRe ĩhöimana uꞌötsi mono. Ĩ̠ꞌupana aimawi ĩhöibaꞌõ norĩ ãma dawatadzé hã ĩ̱ma ꞌru ti.’ (Êxodo 20:5) E marĩ na Dapotoꞌwai ma ꞌru ti. Waꞌuburé hã te te pibu wamhã, Jesus te atsa tãma tinha ãne: ‘Uburé Danhibꞌapito uptabi ãma tsi, te dza ꞌre aiwata dzaꞌra waꞌaba mo, ꞌRe ĩhöimana uꞌötsi mono ãma tsi.’ (Mateus 4:10) Höimanaꞌuꞌö ma tsi ĩꞌrudzahi ãma ĩwawata dzaꞌra da tsi, ãne duré wa te tiwi ĩrowaptẽrẽ dzaꞌra da tsi. — Êxodo 34:14.

Wa te rowaptẽrẽ dzaꞌra wamhã tsiwaꞌru dapoto wi, ãma ĩtsimiré dahöiba ꞌmanharĩ wi niwamhã dawatsuꞌuꞌwai wi, Höimanaꞌuꞌö te dza wadzada abꞌrui petse dzaꞌra. Höiwa ãma romhuriꞌwa nhoꞌre João hiꞌrãtitõ tsãmra wamhã ãma wata da aré, te tãma tinha ãne: ‘Tôꞌã. Ãne hã ꞌmanharĩ tõ. Wa hã atsinere hã, ꞌRe ĩhöimana uꞌötsi mono ma romhuriꞌwa, wa ꞌre ĩ̱höimana, duré atsitsãnawã norĩ nere hã, duré atsiré ĩtsadzeiꞌwa norĩ nere hã. Ta norĩ hã roti tô tsena uptabi hã, Jesus te te dama ꞌre ĩꞌawaihuꞌu mono hã te te ꞌre ĩwapari petse dzaꞌra mono. Ta norĩ ne hã, wa ꞌre ĩ̱höimana, wa hã. Maꞌãpé ꞌRe ĩhöimana uꞌötsi mono ãma tsi ꞌre aiwata mono.’ —Apocalipse 19:10.