Ako 5
Koteā Te Fakatuʼutuʼu ʼa Te ʼAtua ʼo ʼUhiga Mo Te Kele?
1. He koʼē neʼe fakatupu e te ʼAtua ia te kele?
Neʼe foaki e Sehova ia te kele ki te tagata pea mo te fafine fuli pē. Ko tonatou nofoʼaga. Koia ko te ʼuluaki taumātuʼa, ia Atama mo Eva, neʼe mole fakatupu ia nāua ke nā fakahahaʼi ia selō. He neʼe kua fakatupu e te ʼAtua ia te kau ʼāselo ke natou māʼuʼuli ʼi selō. (Sopo 38:4, 7) Neʼe fakanofo e te ʼAtua ia te ʼuluaki tagata ki te palatiso taulekaleka neʼe higoa ko te ʼōloto ʼo Eteni. (Senesi 2:15-17) Neʼe foaki e Sehova kiā ia pea mo tona hōloga ʼaē kā tupu anai, ia te fealagia ʼaē ke māʼuʼuli fiafia ʼo heʼegata ʼi te kele.
ʼI te kamata, neʼe ko te ʼōloto pē ʼo Eteni ʼaē neʼe ko he palatiso. Neʼe tonu ke fakahahaʼi e te ʼuluaki taumātuʼa ia te kele ʼaki tonā hōloga. Pea ʼaki te temi, ʼe natou puleʼi anai te kele kātoa ke liliu ko he palatiso. (Senesi 1:28) ʼE mole maumauʼi anai te kele ʼi he temi. ʼE ko te nofoʼaga tuʼumaʼu pē anai ʼaia ʼo te tagata.
2. He koʼē iā ʼaho nei ko te kele ʼe mole ko he palatiso?
Neʼe talagataʼa ia Atama mo Eva ki te ʼAtua, koia neʼe fakamavae ai e Sehova ia nāua mai te ʼōloto. Neʼe puli ai te Palatiso, pea neʼe mole lavaʼi e he tagata ke ina toe fakatuʼu te ʼōloto ʼaia. Pea talu mai ai mo te kaugamālie ʼo te hahaʼi agakovi ʼi te kele.
Neʼe tuku feiāʼi koa e Sehova tana ʼuluaki fakatuʼutuʼu maʼa te tagata? Kailoa ia! ʼE mole feala ia ke iku noa tana fakatuʼutuʼu heʼe māfimāfi ia. (Esaia 45:18) ʼE ina toe fakaliliu anai te tagata ki tona ʼuhiga ʼaē neʼe ina loto kiai.
3. ʼE feafeaʼi anai te toe fakatuʼu ʼo te Palatiso?
ʼE toe fakatuʼu anai te Palatiso ʼi te kele ʼi te lolotoga ʼafio ʼa Sesu ʼi tona ʼuhiga Hau ʼa te ʼAtua. ʼI te tau ʼaē ʼe fakahigoa ko Halamaketone, ʼe taki anai e Sesu te kau ʼāselo ʼa te ʼAtua pea ʼe natou fakaʼauha anai ia nātou fuli ʼaē ʼe fakafeagai ki te ʼAtua. Pea ʼe pilisoniʼi anai e Sesu ia Satana lolotoga taʼu e 1 000. ʼE haofaki anai te hahaʼi ʼa te ʼAtua ʼi te fakaʼauha ʼaia koteʼuhi heʼe takitaki pea mo puipui anai ia nātou e Sesu. ʼE natou māʼuʼuli fiafia anai ʼo heʼegata ʼi te Palatiso ʼi te kele.
4. Ko ʼāfea ʼaē kā gata ai te mamahi?
Ko ʼāfea ʼaē kā fakagata ai anai e te ʼAtua ia te kovi ʼi te kele? Neʼe tuku mai e Sesu te “fakailoga” ke ʼiloʼi ai pe ko te temi fea ʼaē kā ovi mai ai te fakaʼosi. ʼI te temi nei ʼe hā mai ʼi te ʼu ʼaluʼaga ʼaē ʼe fakatupu tuʼutāmaki ki te tagata ʼe tou māʼuʼuli nei ʼi “te fakaosi o te malamanei.”
ʼI te lolotoga ʼo te pule ʼa Sesu mai te lagi iā taʼu ʼaē e 1 000, ʼe ina fakagata anai te ʼu mamahi fuli pē. (Esaia 9:5, 6; 11:9) Pea ʼe mole gāue pē anai ia Sesu ʼi tona ʼuhiga Hau, kae ʼe toe gāue anai ʼi tona ʼuhiga Pelepitelō Lahi ʼo ina molehi anai te ʼu agahala ʼa nātou ʼaē ʼe ʼoʼofa ki te ʼAtua. Koia, ʼaki ia Sesu, ʼe pulihi anai e te ʼAtua ia te mahaki, te mātutuʼa pea mo te mate.
5. Ko ai ʼaē kā maʼuli anai ʼi te Palatiso ʼaē kā toe fakatuʼu?
ʼE ko te hahaʼi ʼaē ʼe fakalogo ki te ʼAtua ʼaē kā māʼuʼuli anai ʼi te Palatiso. (1 Soane 2:17) Neʼe fekauʼi e Sesu ʼana tisipulo ke natou kumi te hahaʼi agavaivai pea mo ako ia nātou ke natou ʼiloʼi peʼe feafeaʼi hanatou liliu ko he hahaʼi ʼe leleiʼia e te ʼAtua. Iā ʼaho nei, ʼe teuteuʼi e Sehova ia te toko lauʼi miliona hahaʼi ke natou māʼuʼuli ʼi te Palatiso ʼaē kā toe fakatuʼu ʼi te kele. (Sofoni 2:3) ʼI te ʼu Fale Fono ʼa te kau Fakamoʼoni ʼa Sehova, ʼe ako e te hahaʼi ke natou liliu ko he ʼu tagata ʼohoana, he ʼu tamai, he ʼu fafine ʼohoana peʼe ko he ʼu faʼē ʼe lelei. Ko te tamaliki pea mo ʼanatou mātuʼa ʼe natou tauhi fakatahi pea mo ako peʼe feafeaʼi hanatou maʼu he ʼu lelei mai te Tohi-Tapu.