Neʼe Foaki Te ʼu Kiʼi Moʼi Kato Ki ʼAku Kiʼi Kuli
NEʼE tohi fenei e Nick, neʼe maʼuli ʼi Oregon, ʼi Amelika: “ ʼI te 2014 ʼi te temi ʼae ʼe matala ai te ʼu fisi ʼakau, neʼe au alu ʼo fakahaʼele ʼaku kiʼi kuli ʼe lua ʼi te loto kolo. Neʼe tau tutuʼu te kau Fakamoʼoni ʼi te loto kolo mo ʼanatou laupapa. Neʼe natou teu lelei pea mo fakamalo fakafiafia ki te hahaʼi fuli.”
“Neʼe agalelei te kau Fakamoʼoni mo te hahaʼi ʼo feia pe mo ʼaku kiʼi kuli. ʼI te tahi ʼaho, neʼe foaki e Elaine ʼae neʼe tuʼu ovi ki te laupapa te ʼu kiʼi moʼi kato ki ʼanā kiʼi kuli ʼae ʼe lua. Ka matou fakaovi ki te laupapa ʼe fia olo te ʼu kuli ki te ʼu Fakamoʼoni ke ʼavage hanatou kiʼi moʼi kato.”
“Neʼe fakalaka leva ki ai ni mahina. Neʼe leleiʼia te ʼu kiʼi kuli tanatou ʼu kiʼi moʼi kato, pea neʼe au faipalalau mo te kau Fakamoʼoni kae mole fualoa. Kae neʼe mole au fia palalau tuʼumaʼu mo natou. Neʼe kua au taʼu 70 tupu kae neʼe mole au faʼa tui ki te ʼu akonaki ʼae ʼe tui ki ai e te kau Fakamoʼonni. Neʼe lahi te ʼu lotu neʼe au ita ki ai. Koia, neʼe au manatu ai, ʼe lelei age pe taku ako tokotahi te Tohi-Tapu.”
“I te temi ʼaia, neʼe au sio ki ʼihi Fakamoʼoni ʼi te ʼu kolo kehekehe mo ʼanatou laupapa. Neʼe natou toe agalelei mo natou. ʼE natou tali tuʼumaʼu ki ʼaku fehuʼi ʼo fakatafito ki te Tohi-Tapu ʼo tupu ai taku falala kia natou.”
“ ʼI te tahi ʼaho, neʼe fehuʼi mai e Elaine: ‘ ʼE ke tui koa ko te ʼu manu ʼe ko he meʼa ʼofa mai te ʼAtua?ʼ Neʼe au tali age: ‘ ʼEi.ʼ Neʼe vaevae mai ia Elaine ia te koga tohi ʼaeni ʼo Esaia 11:6-9. ʼI te temi leva ʼaia, neʼe au fia ako ia te Tohi-Tapu kae neʼe heʼeki au fia toʼo he tohi ʼi te kau Fakamoʼoni.”
“ ʼI te ʼu ʼaho ʼae neʼe hoa mai, neʼe au faipalalau leva mo Elaine mo tona ʼohoana ko Brent pea neʼe au leleiʼia tamatou ʼu faipalalau ʼaia. Neʼe nā ui mai ke au lau ia Mateo mo te tohi ʼo Gaue ke au mahino ai kotea te fakaʼuhiga ʼo hakita faʼifaʼitaki ia Kilisito. Ko te aluʼaga pe ʼaia neʼe au fai. Mole fualoa ki ai neʼe au tali leva ke au fai haku ako Tohi-Tapu e Brent mo Elaine. Neʼe fai ʼi te taʼu 2016.”
“Neʼe au fakaʼamu ki te ʼaho ʼae ʼe fai anai taku ako pea mo te ʼu ʼaho ʼo te ʼu Fono. Neʼe au fiafia ʼosi taku iloʼi te ʼu moʼoni ʼi te Tohi-Tapu. Hili ki ai te taʼu katoa, neʼe au liliu leva ko te Fakamoʼoni ʼa Sehova. ʼI te temi nei kua taʼu 79, pea kua au fakalofakafetaʼi ʼe tapuakiʼi au e Sehova he kua au kau ʼi tona foʼi famili fakamalamanei ʼo ʼana kaugana agatonu.”