AKO 6
Te Maʼuhiga ʼo Te Akoʼi Te Meʼa ʼAe ʼe Lelei Mo ʼAe ʼe Kovi
TONA FAKAʼUHIGA
Ko te hahaʼi ʼae ʼe natou fai te meʼa ʼae ʼe lelei, ʼe natou iloʼi pe te meʼa ʼae ʼe lelei pea mo ʼae ʼe kovi. ʼE mole mulimuli natou ki te ʼu meʼa ʼae ʼe natou logoʼi ʼi he temi pe. Kailoa. ʼE takitaki natou e te ʼu pelesepeto tatau aipe pe ʼe mole sio he tahi kia natou.
TONA MAʼUHIGA
ʼE logo e te ʼu fanau ki ni faʼahiga manatu hala ʼo ʼuhiga mo te meʼa ʼae ʼe lelei mo ʼae ʼe kovi. Ko te ʼu manatu ʼaia ʼe haʼu mai te fale ako, mai te ʼu musika ʼae ʼe natou fakalogo peʼe ʼi te ʼu ʼata ʼae ʼe natou sioʼi. Pea ko te ʼu fakaneke ʼaia, ʼe feala ke lotolotolua ai te ʼu fanau ʼo ʼuhiga mo te meʼa ʼae ʼe lelei mo ʼae ʼe kovi.
Pea ʼe moʼoni te manatu ʼaia tafito ki te kau tupulaga. ʼE ui ʼi te tohi Beyond the Big Talk, “ ʼe tonu ke natou mahino, ʼe lahi anai te ʼu fakaneke ke natou fai ni aga ʼe mole lelei ke tali natou e ʼihi. Pea ʼe maʼua foki ke natou toʼo ni tonu ʼe natou iloʼi ʼe lelei, tatau aipe pe ʼe mole leleiʼia e ʼonatou kaumeʼa.” ʼE ha ʼaki mai ai, ʼe tonu ke akoʼi e te ʼu matuʼā ʼanatou fanau ʼi tanatou kei liliki.
TONA AKOʼI
Akoʼi fakalelei age te meʼa ʼae ʼe lelei mo ʼae ʼe kovi.
PELESEPETO FAKATOHI-TAPU: Ko “te hahaʼi ʼae kua fotufotuʼa . . . [ʼe natou maʼu te] fealagia fakakaukau moʼo fakakehekeheʼi te meʼa ʼae ʼe lelei mo te meʼa ʼae ʼe kovi, he ʼe natou fakaʼaogaʼi tuʼumaʼu.” —Hepeleo 5:14.
-
Fakaʼaogaʼi ni kupu moʼo fakakehekeheʼi te meʼa ʼae ʼe lelei mo ʼae ʼe kovi. ʼI te ʼu aluʼaga ʼo te ʼaho fuli, fakaʼaogaʼi te ʼu kupuʼi palalau ohage la ko: “Ko he aga fakahagatonu ʼae kae ko te aga kaka ʼae.” “Ko te aga ʼae ʼe lelei kae ko te aga ʼae ʼe kovi.” ʼAki te temi, ʼe iloʼi anai e ʼakotou fanau te aga ʼae ʼe lelei mo ʼae ʼe kovi.
-
Fakamahino age he koʼe ʼe lelei peʼe kovi. Fai ni fehuʼi ohage la: He koʼe ʼe lelei ke ke aga fakahagatonu? Kotea te ʼu fua kovi moka ke lohiʼi ʼou kaumeʼa? He koʼe ʼe kovi te kaihaʼa? Kotou tokoni ke ina fakaʼaogaʼi tona leʼo loto mo tana fakakaukau.
-
Fakaha te ʼu lelei ka ina maʼu moka ʼe aga poto. ʼE feala hakotou ui age: “Kapau ʼe ke aga fakahagatonu, ʼe falala anai te hahaʼi kia koe” peʼe “Kapau ʼe ke agalelei, ʼe fia kaumeʼa anai te hahaʼi mo koe.”
Faigaʼi ke muliʼi katoa e te famili ia te ʼu pelesepeto ʼaia.
PELESEPETO FAKATOHI-TAPU: “Kotou haga sivisivi ia koutou totonu.”—2 Kolonito 13:5.
-
ʼE tonu ke ha ʼi takotou kiʼi famili ʼe kotou maʼuʼuli te ʼu pelesepeto, ke feala hakotou ui moʼoni:
-
“ ʼI tamatou famili, ʼe tapu te loi.”
-
“ ʼE mole matou ta peʼe munaʼi he tahi.”
-
“ ʼE mole matou tauvele peʼe fai ni palalau ʼe malave kovi.”
-
ʼE mahino anai ʼakotou fanau ko te ʼu pelesepeto ʼo ʼuhiga mo te meʼa ʼae ʼe lelei mo ʼae ʼe kovi, ʼe mole ko he ʼu lekula pe kae kua maʼuliʼi moʼoni e te kiʼi famili.
-
Kotou faipalalau tuʼumaʼu mo ʼakotou fanau ʼo ʼuhiga mo te ʼu pelesepeto ʼaia. Fakaʼaogaʼi te ʼu aluʼaga ʼo te ʼaho fuli moʼo akoʼi ia natou. ʼE feala ke kotou fakatatau te ʼu pelesepeto ʼae ʼe kotou akoʼi age mo te ʼu manatu ʼae ʼe haʼu mai te televisio peʼe ʼi te fale ako. Fai age te ʼu fehuʼi ʼaeni: “Kapau la neʼe ko koe, kotea anai ka ke fai?” “ ʼE feafeaʼi anai te fakatokatoka e totatou famili te aluʼaga ʼaia neʼe hoko?”
Kotou fakamalohiʼi takotou fanau ke ina fai te meʼa ʼae ʼe lelei.
PELESEPETO FAKATOHI-TAPU: “Kotou taupau he leʼo ʼo loto ʼe lelei.”—1 Petelo 3:16.
-
Fakamalo age ki te lelei ʼo tana aga. Kotou vikiʼi ia ia ʼi te ʼu temi fuli pe ʼae ʼe lelei ai tana aga, pea mo fakamahino age tona tupuʼaga. Ohage la, ʼe kotou ui fenei age: “ ʼE au fiafia ʼosi kia koe ʼi tau aga fakahagatonu.” Kapau ʼe ina fakaha atu neʼe ina fai he meʼa ʼe kovi, fakamalo age ki tana fakaha atu te moʼoni pea kotou fakatonutonuʼi leva.
-
Fakatonutonuʼi te fanau moka ʼe ina fai he aga ʼe kovi. Kotou fakamahino age ʼe natou utu pe anai te ʼu fua kovi ʼo te ʼu meʼa ʼae ʼe natou fai. ʼE tonu ke ina iloʼi neʼe mole lelei tana aga pea neʼe mole alu tahi mo te ʼu lekula ʼo takotou famili. Ko ʼihi matuʼā ʼe mole natou ui ki ʼanatou fanau neʼe kovi tana aga, he ʼe mole natou loto ke lotovaivai ai. Kae ʼe tonu ke palalau fakahagatonu age te ʼu matuʼā ʼo ʼuhiga mo te aga ʼaia ʼe kovi, he ʼe ko he tokoni ke iloʼi ai e te fanau te fakakehekeheʼi ʼo te meʼa ʼae ʼe lelei mo ʼae ʼe kovi.