Pilgi Ding Ambajen Hulda Sinal Ne Ombol Erim Wal Sim
KULU INDONESIA tuwalro ailen kerei ende sem kangem Sangir Besar, kulu ele tuwalto kenem pilgi ding ambajen man talende meim. Kongar pende wopunom, enjep porpor apnol jeknema kongan ere ere enjip. Ailen ele meim alamb porpor enjep kanpol wei tonjup nalerim, alamb porpor pakeronambe—Baibel yumem pilpol tonam ne, kunum kunum Baibel yu neori kenjip. Ba enjip kongan jel ende pra enjip eri.
Ailen Sangir Besar noten Indonesia tuwalto seim
Enjep apnol tuwal pu, ku kerma mom kausi oriro tunjup, ku pende kerma konj soka mal mom. Ambajen man talende ondbol sem bar amine molo, ama si ku tunjup to kereikerei enjip, pende to ka kulkul mulom mal kenjip. Ala bulto ku to kereikerei er mokjup si plastik baketa tuwal kele, sise min papa enjip bar pupo enjip. Sip mokjup ku ala si bek kerma mom bar to tuwal kele, kara kelsip malma kongan enjip alamb ngo, ku sise enjip.
Hulda, apnol jeknema ku si makeronom
Ambajen man e, ende kangem Hulda. Olom nomolpa erim bar kol apis kem pile, anj dunglom puli kele kongan e, ere amb tal ngom. Ala kongan e er ku sim, kunum dingding ne pemili aiyem ambsik pam wal top toro erim. Ba, pi ku ende er sinda makero, wal jel ende sinal ne buro pim. Olom tablet ende topro si, JW Library® app tuwal pu konganem enal nepim. Vidio na wal pende JW Library app mom, olom pakero kelde Baibel yu neori kera woka pundo, ala olom pakero kelde Baibel yu kanau ninda pam.
Hulda pepe kinimba wakan 6-pel tuwalro, anj dunglom auwa tal kele, ku to kereikerei ere, kar kerei ende bulto, to pikrom. Embe erim bar olom pakerongo, tablet ende top tonda mal ku si kaple erim.
Hulda tablet ambil se meim
“Na embe erind bar dongal pornim, ala ku to kereikerei erind bar angel kopal molo bulnim eri.” Hulda yu ende embe nim, “Na tablet kolnga sind, Baibel yu neori kend bar na kongrikeisen make pambar, konganem er kapinj erkelnge, tablet sinal ne kongan ere nganj nimbil sind auro ne sikem.” Ala olom yu ende nim, kes kowet 19 tom kunum, tablet e na pakerom eri panim. Kes e min wom kunum, Baibel yu neori kenjip na kongrikeisen make zoom a enjip pile, Hulda tablet konganem ere tuwal punda kaple erim. Hulda sinal ne kapim wal kongan ombol wei ere sim bar, kenem kawei wei pismen.
